cherry tabo's Profile

早前天氣凍，好想食熱騰騰餃子，太子係餃子激戰區，「豐信」比較有名氣同好評。呢間小店真係幾小，環境擠逼，門外好多人，不過有一半係買外賣，所以唔駛等太耐。餃子可選湯餃或煎餃，口味有15款，數量可㨂7隻或10隻，size頗大，胃口唔大的點7隻都夠。湯底基本係椰子海帶鮮雞豬骨湯，如果轉酸辣湯加$10。嫌淨餃子唔夠飽，亦可加錢配粉麵。等位時爭扎咗一輪，結果敲定湯餃要韭菜豬肉（10隻$42），好大隻，摺得好靚而實淨，皮薄到見到餡料。韭菜同豬肉比例係各一半，韭菜味道本身濃烈，稍為蓋過豬肉味道。湯底清甜冇味精，帶淡淡椰子香。枱上有醋、豆瓣醬、辣油、辣菜脯輔助增味，辣菜脯好爽口，辣勁幾凌厲。煎餃就選冬菇豬肉（7隻$42，煎加$2），煎的當然香口好多，皮帶少少脆，少少油但可接受。冬菇豬肉比韭菜豬肉更有驚喜，味道濃郁，冬菇配豬肉從來都好夾。小吃的涼拌雲耳（小$15）正常發揮，爽脆微酸；雞中翼（3隻$23）似滷水但帶甜味，雞翼大小適中，質感滑溜。呢度的自製飲品都好值得一試，柑桔蜜一大支$10，冰凍，清潤香甜。…Read More

一山還有一山高。之前食過灣仔鳥華亭的雞白湯拉麵，已經覺得好食，今次試埋來自大阪的中環「座銀」（跑馬地另有分店），更見驚艷。排隊時同店員哥哥傾偈，先知之前食過附近的魚湯拉麵◯de▽係屬同一集團，兩者各有千秋。座銀貫徹日本貴精不貴多風格，只提供3款麵食（雞白湯、海鮮雞湯同沾麵），同3款小食（炸雞、牛蒡飯、煙燻蛋），專注只做幾樣，出品更有保證。試左最基本的雞白湯（$138），雖然個碗好大，但麵同湯的分量唔會好多，女仔食剛好。先飲一啖湯，個味道完全係喺日本食過的味道（雖然當時唔係食座銀），雞味極之濃郁，好重膠質，但唔鹹，面頭有一層由雞湯打成的薄薄泡沫，增加層次感。麵條冇得㨂曲直同軟硬度，看來店家好有信心佢煮的已經係最配合個湯嘅效果。果然微曲帶點粗的麵條掛滿湯汁，而且爽滑煙韌，帶點蛋香。掛在旁邊有一塊雞肉同一塊豬肉，放回湯裏浸一陣，雞肉同豬肉都保持嫩滑，兼且有肉香。實在要一讚旁邊炸成一捆的牛蒡絲，香脆惹味，一啖麵一啖牛蒡絲，口感相映成趣，但兩者又唔會互相搶去味道，就算佢獨立成為一款小食都可以。上次已講過，雞白湯已成為我頭號最愛湯底，而呢間亦已超越左鳥華亭暫時成為香港雞白湯拉麵第一位（我覺得），佢係最接近日本味道，如果想一解鄉愁，呢度好值得一來，雖然頗貴。…Read More

香港愈來愈多sukiyaki（壽喜燒）店，城中最出名要數中環「すき焼森」。雖然中環有三間分店，但訂位係超級難。佢每月1號開放預訂下個月booking，1號開店後開始打電話，打咗過百次都打唔通，就算打通都冇人聽。過多兩日再打去，係有人聽，但會同你講下月已full booking，幸運的仲可能有少量平日午市空位，非常誇張。咁仲有咩方法訂到呢？就係1號walk in去鋪頭訂，係傻嘅，但好多人都咁做，條隊仲唔短添，所以想確保訂到，最好喺開店前到。正式用餐當日，其實唔滿座，師傅煮嘢時候同佢傾偈，先知每間店大約得3位師傅，每人最多只serve到兩三枱客（可以專注一點），所以先至唔會安排坐滿，亦解釋到點解咁難book。入正題，呢度晚市只提供sukiyaki、shabu shabu同omakase，以sukiyaki最受歡迎。晚市$680一位，午市$580一位，分別在於晚市會多一款肉，咁當然畀多$100試多款。餐廳供應嘅係著名日本近江牛，不吃牛肉，都可以㨂豬肉。想再飽足啲，可以追加牛舌（$100）。先上開胃前菜（按時節更換），師傅有簡單介紹，係我唔記得個名，當中最好食係炸日本芋頭，軟糯得嚟充滿芋頭香。後上蟹肉蒸蛋，蒸蛋係超級滑，蟹肉加海藻同薑蓉口感同味道都豐富，只係鹹左啲。主角上場，包括一籃蔬菜同牛肉，食嘅次序係一塊肉，一碟菜，全程由師傅席前主理，可以睇住師傅點煮，有問題又可以問佢。呢度係用關西風煮法，同關東風相比，汁比較少，牛肉亦以煎為主。首先師傅會喺鑊落一層糖，然後鋪上牛肉快煎幾秒，然後落少少醬汁半煎煮，幾秒後翻轉就可以上枱。牛肉由淡至濃味食，先食肉眼，再來西冷，之後係兩款牛肩肉，最後係牛舌。肉眼最腍最有油脂香，但我比較鍾意西冷同牛肩肉，肉味好香濃，雖然師傅形容肉質比較實，但入口都好軟綿，唔需要點蛋漿都已經好滑。牛舌好薄，但仍然食到爽脆口感。蔬菜當中以洋蔥最好食，日本洋蔥一點辛辣感都冇，而且甜度好高。將牛肉蔬菜伴附上的小碗白飯一齊食真係好開胃，白飯可以任食，但唔建議食太多，之後仲有滑蛋牛肉飯的。食完之後，師傅將碎牛肉落鑊炒，再倒入蛋漿快煮，將之蓋喺飯上，就成滑蛋牛肉飯，蛋係嫩滑，牛肉味唔出，對比之前幾塊，呢碗飯就比較普通。最後上甜品，今次係士多啤梨奶凍同朱古力慕絲，兩者都有質素，食埋已經有十分飽。講咁耐，呢度值得咁千辛萬苦訂位嗎？同日本比，呢間完全唔遜色，如果你係sukiyaki粉，或者好掛住日本，呢度係值得來。日籍師傅係長駐卑利街店，但無論日籍還是香港師傅主理，水準應該一樣（師傅話佢哋要考試的），所以你幸運地聯絡到其中一間就唔好猶豫了。…Read More

闊別日本剛好兩年，回來後呢兩年間有好多始料不及的變化，唯一不變係對日本的掛念。掛念的程度，已非靠食個拉麵或者壽司就可以彌補。早前睇片，見一位日本人推介尖沙咀的「吉田舍料理」，主打正統日式家庭料理同小菜，係好多在港日本人的秘店（經佢推介之後已經唔秘了）。喺呢度，不但聽到客人的日語對話，店主同部分廚師侍應都係日本人，感覺更似身處日本。係咪好耐冇見日文menu？當然如果見你係香港人，佢會畀返中文menu，但識日文的話不妨問侍應拎份日文，重溫下日文之餘，日文有是日精選餐牌，中文冇的。餐牌有好多選擇，研究都用左好多時間，還好本身已有幾個心水選項，再唔係，第一次嚟可以叫店員推薦，大部分都好有禮的。忌廉蟹肉薯餅（$120）係好代表日本的小食，熱騰騰的上枱，炸衣好薄好脆，裡面係超滑忌廉，蟹肉就不太感覺到，不過都好滿足。第二樣想食係和牛腸炒野菜（$120），係日本人話好食的一道，辣度可以選擇。唔鍾意肥膏的或者會嫌惡，但喜歡的會欣賞佢的油脂香，比豬腸更香，雖然邪惡，但偶一為之好值得試試，不過外皮比較韌。椰菜更係精華所在，沾滿惹味醬汁，係一流的佐酒佳餚。見隔離枱點了蔥拖羅卷（$80），又試着來一碟。呢個相對有點失色，拖羅鮮甜軟滑，但蔥好少，而且飯同紫菜都好腍，口感一般。最重點係，做功課時見午餐餐牌有拿破崙意粉，非常想食。日式的拿破崙意粉係好好食的，我曾經喺登別車站附近一間不知名小cafe食過，一直念念不忘。即管問侍應係咪午市先有，佢話都可以整，不過因為係日本師傅做，所以要等耐啲。問完價錢後（$100）就即刻落單。意粉用鐵板上，以煎蛋皮墊底。調味做得唔錯，酸甜得宜，火腿、椒絲等配料都落得多，蛋皮好香，只係意粉比較腍，整體同日本的仍然有少少距離，不過總算解一解思念。想去的話切記預約，walk-in一定冇位。另外lunch有比較相宜的定食，每份一百上下。…Read More

想寫間小店支持一下，幾欣賞老闆的膽色同堅持。尖沙咀金巴利街係有名的韓國街，韓式食肆同食品店幾乎佔九成。街中間有間細得完全唔起眼小店「海 三碗麵」，窄長鋪位只得三張枱共六個位。店員得一個，就係老闆。店家唔賣韓國菜，而家貌似平常不過的麵。全店只賣三款湯麵加一款漢堡，好有日本小店的感覺。雖然選擇少，但每一項細節都包含老闆的心思。海蝦濃湯roast beef伊麵（$75），湯頭橙紅得來都幾清，飲落鮮甜唔腥，加上大量櫻花蝦，味道更鮮。因為完全冇落味精，真材實料熬成，所以多飲都唔會口渴。所有湯麵都用上伊麵冇其他選擇，麵質係爽滑，但唔太掛湯。最出色係隨麵附上的烤牛肉，每碟有5、6片，下單後店主切出牛肉片，再用火槍略燒。牛肉僅僅熟，口感非常軟腍，牛肉味甚濃，略帶黑椒味，將櫻花蝦同蔥捲埋一齊食，更添口感同食味。金華火腿煲雞濃湯roast beef伊麵（$80），相對海蝦湯，我更喜歡呢個，雞湯清潤得來帶火腿鹹香，亦咬到好多一絲絲火腿，好似住家湯。呢個質素收呢個價錢絕對值，去尖沙咀如果又未必想食韓國菜的話，不妨試吓（當然好容易滿座），老闆好健談的。…Read More

自己好少去深水埗至荃灣一帶（葵芳除外），今次去長沙灣都係為咗去一間cafe「contrast」，喺元州邨附近。今時今日，對好多人嚟講，一間cafe開喺邊唔重要，最緊要地方靚，食物飲品靚（好唔好食次要），有小道具協助影相更好，呢間都算符合條件。cafe有提供沙律、飯、意粉，不過還是主打甜品。本身唔太喜歡食窩夫，但呢度的招牌之一就係窩夫，唯有試下。抹茶糯米窩夫配自家製牛奶雪條（$96）以大堆頭作招徠，講真，唔係好明白點解窩夫要加支雪條，反正都唔可以夾埋一齊食，應該都係gimmick多於match，不過，雪條的牛奶味係幾濃郁。窩夫有4件，有淡淡綠茶味，冇糯米的香，但有嗰種煙韌口感。綠茶cream同綠茶醬冇苦味，搭配的紅豆亦唔會好甜，整體還算可以。另一名物係雞蛋布甸配espresso（$58），當然唔會係超市貨色，質感輕盈軟滑，有蛋香，配焦糖醬已經好滿足。另一種食法係加espresso，會多種甘苦味，唔太習慣的加少少好了。天氣好熱，飲咖啡都想飲得冰涼解渴啲，近期幾喜歡espresso tonic（$48），之前喺#coffee第一次飲驚為天人，呢度的都唔差，咁樣飲espresso唔會苦，不過香氣當然不及#coffee。注意呢度6點收，好多人5點幾來已經冇得堂食，所以有心去時間上要安排早少少。…Read More

早已聽聞過尖沙咀的「Urban coffee roaster」，今次去的係銅鑼灣店。呢間cafe提供的餐飲都唔少，有飯、意粉、小食、沙律、湯等等。是次冇食好多人點的法式焦糖班戟，反而試左鹹點，焗金文筆芝士配多士、新鮮黑松露（$108），上枱時店員叮囑要趁熱食，因為芝士凍左就冇半溶狀態。多士有5-6件，表面少少硬，裡面都算鬆軟。金文筆芝士係成舊畀你，芝士迷絕對食得滿足，芝士軟綿，唔太濃太鹹，配多士係啱啱好，新鮮黑松露雖然比較細片，但都落得慷慨，非常惹味。配搭簡單，不過已經完全中我喜好。來cafe當然唔少得咖啡，dirty（$45）係espresso加凍牛奶的組合，適合唔飲得太濃咖啡的人，又解渴。…Read More

元朗有間高質台灣牛肉麵店，位置幾偏僻，由又新街行到尾，然後要行入一條掘頭路橫街。短短一條街上有三四間食店，「二悅」正是是次目標。二悅內部好細，大約得十個位，冇得訂位，冇得攞飛，只可以排隊等，所以要有心理準備，假日去的話要等差不多一個鐘。Menu驟看好似好多選擇，其實大致只係分為兩類：麵類同小食，麵就分牛肉麵同乾撈麵。二悅紅燒牛肉麵（$68）有兩個食法，一上枱的時候係冇湯的，店方建議先食蔥油撈麵，少少腍的麵好有醬油味，但唔係鹹，蔥味唔明顯。旁邊有壺紅燒湯底，可以先當湯飲，味醇，但又冇平時食紅燒牛肉麵咁重口味，辣度好輕微，好飲。食到一半可以將湯倒入拌麵同食，不過始終覺得分開食更滋味。麵碼有牛肚同牛腱，兩樣都好入味，又腍，牛腱雖然厚身，但一夾就可輕易分開。另一款係手工肉燥乾拌麵定食（$62），有麵、牛清湯、前菜同兩款自選小食，非常豐富。麵的底味同紅燒牛肉麵一樣，加左肉燥完全蓋過左蔥油香，肉燥係好食的，煙韌豬皮下係半肥瘦豬肉，口感多層次，分量亦多。前菜係通菜，雖然得少少，但都有調味，不錯。小食㨂左糖心蛋同炸花枝丸，蛋黃有流心效果，唔死鹹，花枝丸雖然唔彈牙，但都咬到粒粒魷魚，感覺似真材實料。店面雖然得一個女仔一腳踢，但非常有禮，對食法亦講得好清楚，欣賞。…Read More

成日覺得香港好少台式鹽水雞店，想食通常會買ET，有幾間分店，質素亦唔錯（覺得仲好食過台灣夜市嗰啲）。元朗的「肥仔黎」都好出名，去開當然要排隊買來試。佢每日只有兩輪賣雞時間，分別係1:00同6:00，供應數量有限，想食雞髀部位更係少，所以有心就一定要預早去。我5:15去到，前面有4個人排，排到5:30左右開始派剔剔紙，6:00就會準時開賣，畀咗錢大約等10分鐘左右先有得攞。我㨂左獨享餐（$45），要雞髀，可以配3款配菜，我㨂青瓜、甜不辣、豆乾，辣度係BB辣。如果鍾意濃味，可以加多蔥同蒜，想再勁啲可以點重口味，但會偏鹹。店方做好會用有密封膠條的膠袋裝好，獨享餐分量都唔少，雞肉極之嫩滑，皮好薄好爽脆，醬料非常入味，撈得均勻，BB辣剛剛好。食濃味嘢最好搭青瓜，可以平衡下，又夠爽；甜不辣純粹係個人喜好，正常發揮；豆乾有少少滷水味，亦吸收左醬汁，係最佳配搭。相對於ET，呢間確係更勝一籌，只係地點比較遠（對我而言）。除咗鹽水雞，佢仲有滷肉飯、麻辣鴨血、燒賣、腸粉等等，如果只係買呢啲，就唔需要排隊。…Read More

有日喺北角，一心諗住去食酸菜魚，行到半路，見「夏娃」門口豎了午餐餐牌，上面寫住烤春雞配黑松露意大利飯只係$68，除咗組合吸引，價錢更是超值，於是臨時轉軚。午餐有好多選擇，以飯同意粉為主，跟餐配湯或沙律，仲有飲品。呢個價錢會以為佢分量少或者hea做，但原來有完整一隻春雞，意大利飯分量正常，賣相吸引。雖然春雞唔算好嫩滑多汁，但已經合格有餘，調味適中，只係雞胸部分有點柴。意大利飯落咗唔少黑松露醬，仲有野菌，飯粒唔會煮到太硬太腍，醬汁亦唔會好水，拍得住意大利餐廳。另外一款係醬燒豬肋骨配飯（$65），呢個就好一般，豬肋骨雖然入味，容易切開，但肉唔多，醬汁太少，大部分時間在食白飯，而且飯粒好乾，食得有點吃力。唔知其他食物質素如何，但只食春雞+意大利飯係抵食又好食。想再抵啲，星期一至五午餐係免加一的。…Read More

睇youtuber介紹西營盤「bones & blades」的炸五花腩，好似幾好食，就被吸引而來。去到目的地會見到兩間同名店，餐廳喺右邊，左邊係肉店，餐廳供應的所有肉類菜式會直接去肉店攞，質素有保證。肉類有牛、豬、羊選擇，仲有好多唔同部位，啱晒食肉獸。炸五花腩（$68）係此行主打項目，但反而最普通，唔係唔好食，調味簡單但有肉香，但瘦肉部分有點鞋，肥膏頗多，垂直切的話肥膏會從兩邊唧出來，就算平時食嘢幾唔健康，見到都要切走一啲。旁邊係少少辣的醬，都可以中和下肥膩感。不過以價錢來說，一碟有7大件算幾抵，人多分享會冇咁飽滯。招牌牛柳（$119/100g），牛扒類最少要點200g，大約等於7oz，足夠一個女仔食。上枱用鐵板上，賣相毫不花巧，就一件扒加一撮鹽。採用里脊肉，要求medium rare，表面煎得微微焦脆，切開肉係粉紅色，但唔會有血水，火候拿捏得好好。雖然外表平平無奇，但一咬就知質素好高，肉味甚濃，而且嫩滑，冇筋，雖然旁邊有鹽，侍應亦提供左芥末醬，但咩都唔點已經超級美味，呢個質素放喺扒房最少要double價錢。少肥薯條（$55），又係外表普通但有驚喜之作，薯條條條飽滿，炸得熟度剛好唔會燶，質感粉嫩，鹹度適中。不過亮點其實係茄汁，因為係自家用鮮茄肉製作，誠意十足，而且唔會好酸，且帶甜味，好食到用左三分一支茄汁嚟食薯條。所以為咗佢的茄汁，薯條係必點的。呢度整體菜式質素都高，而且唔貴，好值得再來。星期一至五有提供set lunch，有扒、漢堡包等等配薯條，平均百幾蚊，更加抵食。除咗西營盤，仲有元朗、西貢、愉景灣分店，多點選擇。…Read More

銅鑼灣告士打道一帶係車行車房集中地，冇咩事好少會行經嗰頭。「Al Forno Cafe and Bar」就開喺呢條人流疏落的街上，如果冇特色，應該都難捱。呢日去到，座席已滿，等位都大約半個鐘先有，看來大家都係睇中佢的特色餐飲慕名而來。餐廳裡面唔算好特別，牆身有好大個展示櫃擺放店主的玩具收藏品，男仔應該會幾鍾意。不過最吸引應該係近門口的半露天座位，冇玻璃窗阻隔，感覺開揚，氣氛悠閒。9成顧客嚟呢度必點兩樣嘢，其一就係呢杯latte tiramisu（$58），最初睇相以為係凍飲，原來係熱的。基本上佢係一杯普通latte，但面頭多左條lady finger，唧上忌廉同灑上可可粉，就變得特別咗。你可以先邊飲咖啡邊食脆脆的餅乾，食到中途將餅乾浸落咖啡度，就變成tiramisu的味道。呢度亦供應近來韓國人氣小食牛窩夫（croffle），其實係結合牛角包同窩夫的做法，將牛角包麵糰放入窩夫機壓成窩夫。其中一款口味係好港式的鹹牛肉炒蛋流心花生醬（$88），兩塊窩夫中間夾住好澎湃的餡料，食用時再淋上花生醬。牛窩夫烤得微脆，有牛油香，不過墊底嗰塊就畀餡料整濕咗冇咁脆。炒蛋半熟，鹹牛肉唔會太鹹，本身唔喜歡花生醬都覺得幾幼滑同幾香。呢度仲有意粉、pizza、幾款小食同甜品，選擇都算多。…Read More

西環開咗間簡約工業風餅店，就喺阿元來了隔離，名叫「soft thunder」，以簡單閃電作標誌。店鋪供應產品唔算多，招牌的有牛角puff、肉桂卷、撻、鬆餅等。Unicorn puff有原味、綠茶、朱古力、榛子，原味（$38）即係吉士味，唧成花狀的吉士唔只得面頭嗰層，食到底都仲有的，非常足料，吉士醬軟滑，有蛋香。外層個筒係用486層酥皮製成，鬆化唔硬，但又唔會邊食邊粉碎。朱古力（$42）唔係唔好食，但味道太濃，牛角包都係同吉士醬比較夾。價錢係幾貴的，不過勝在足料而且大個，食一件都幾飽。本來想試佢另一據聞超好食的名物蛋撻，但去到已經賣晒，只得綠茶撻（$17），講真賣相唔多討好，撻餡亦唔飽滿，綠茶顏色偏泥綠。撻皮係近似puff，綠茶味好弱，蛋味較強，合埋眼食當係蛋撻都得。如非必要，呢個可以略過。本來買埋肉桂卷（$24），但太大個同有點飽，所以冇食，聽聞都不錯的，肉桂卷愛好者可以買來試試。…Read More

已經好一段日子冇喺香港食拉麵，是日唔太肚餓，就去尖沙咀「麵処一家」試吓。厚福街幾乎所有食店都人龍不絕，呢度都唔例外，晚飯時間要等一等先可以入座。店家有點日式風格，講嘅唔係裝潢，而係好專門只有3款拉麵選擇，唔會好似港化咗嘅拉麵店咁多花款，甚至連餃子都唔會有。首先係弟の選択（$88），拉麵上有火炙豬腩肉、筍、紫菜碎、蔥、洋蔥，另加$10要溏心蛋。湯頭混合豬骨、魚介同醬油熬成，入口冇我唔喜歡豬骨湯的濃郁質感，醬油味唔重，反而好有魚介香氣，有幾分似金色不如歸，頗接近日本的味道，幾有驚喜。麵條係幼身版本，爽身，掛湯力幾好。豬腩肉燒過後帶焦香，肥瘦比例適中。平時拉麵上的紫菜都係一片片，呢度係整碎咗，我覺得咁樣仲好，撈勻的話幾乎每啖都可以食到紫菜，洋蔥粒亦增添咗口感。溏心蛋熟度剛好，蛋白滑，蛋黃有流心效果。妹の選択（$88）除咗叉燒外其他嘢相同，叉燒換成慢煮豬肩肉，雖然嫩滑，但冇火炙咁香。頭先講過有3個選擇，第3個係料理長の選択（$98），有齊豬腩肉同豬肩肉，想試勻兩款可以一試。…Read More

近期幾鍾意留連咖啡店。當然講到飲咖啡我係門外漢，飲來飲去都係flat white、latte、dirty等等（還要近來先知大概的分別），不過飲完呢間，又有另一個新喜好。講嘅係西營盤的「#coffee」，老實講唔算好好坐，大部分係高椅或冇椅背的櫈，座位亦唔多，不過單為咖啡就好值得嚟。呢度老闆兼咖啡師係世界拉花大賽的亞軍得主，所創的拉花款式非常多，或者你有特別喜好可以請佢試整（額外收費），所以每次嚟都可能會唔同。所以當日雖然熱，都點左杯flat white（大$40）。今次拉花係一隻飛馬，畫得好精細，不過唔知係咪因為flat white比latte少咗層奶泡，所以飲一啖就已經散開（有錯請指正）。咖啡唔苦唔酸，咖啡比奶味香濃，飲落亦順喉。至於剛才提到的新喜好，就係佢的招牌hashtag（$60），其實即係可能其他cafe都有的espresso tonic。最基本做法就係espresso加tonic，而呢度會加檸檬。咖啡師先將espresso加入tonic，然後榨少少檸檬汁，將檸檬皮搽一搽杯邊，再用火槍燒燒檸檬皮等香味釋出，最後噴兩下檸檬汁，整個工序好流暢。咁當然唔會冇實際，第一啖係好清新的檸檬香氣，然後咖啡味先慢慢湧上來，兩者平衡得好好，唔會互相搶去味道，唔酸亦唔苦，只有香味，加上tonic water同冰塊，夏天飲好有解渴提神效果，我都係第一次飲咁refresh的咖啡，好切合貼在咖啡機前面「一杯入魂」四字。雖然貴，但絕對會為咗呢杯製法好似cocktail的咖啡再來。店鋪有提供蛋糕、bagel、牛角包，仲有一樣叫車仔包，即係由包到配料可以自由配搭，有興趣者可以一試。…Read More