食好西。食到盡's Profile

聽講中大近期開咗間日式canteen，口碑都唔錯，而且日日都排長龍，搞到我都好想試吓。咁啱依排比較得閒，所以就揀左星期六入去試一試佢嘅嘢食同咖啡啦。原本諗住星期六會少人啲，點知一去到canteen就見到條人龍等買嘢食 好彩嘅係搵位都唔算太難。依度買嘢食嘅方式似足IKEA，首先同職員講要幾多碗飯，然後就揀想食嘅餸，最後就到收銀處落埋咖啡俾錢。依度每碗飯都一定會跟(炒/烚?)雜菜，非常注重學生嘅健康至於餸嘅方面，我揀左慢煮柴魚味噌五花腩同日式炸雞，加咖喱汁。慢煮五花腩炆得好腍好入味，食落唔會太油膩，無膻味，唔錯。日式炸雞個皮夠脆，炸粉唔太厚，大大件幾抵食，不過略嫌唔太juicy，加蜜糖芥末醬一流。咖喱汁反而出乎意料之外，我一直以為會係甜甜地嗰隻日式咖喱，點知食落居然有香料嘅味道，不過又唔係好辣，幾惹味，好好餸飯。嘢飲方面試左flat white，拉花拉得好靚，咖啡味雖然唔算太出，不過都沖得比出面連鎖咖啡店好(雖然都有一段時間無飲過)。雖然依間canteen係唔錯，不過對於學生黎講其實都偏貴左啲，一個飯一杯咖啡起碼都要60蚊，希望佢哋未來提供啲學生優惠啦。…Read More

放暑假番黎香港 又唔讀書 又唔做嘢 唯有周圍行下今日就黎到西貢 試吓香港嘅aussie brekkie今次叫左最普通嘅organic scrambled egg with avocado on sourdough同埋soy flat white炒蛋滑 加左少少黑椒幾香 牛油果無得挑剔 火箭菜新鮮Soy flat white同平時飲嘅差唔多 係好飲嘅👍🏻總括嚟講 味道同澳洲嘅差唔多 係份量細左啲 但係總算係幾完美 可接受 可以改善個份量 值得推界…Read More

以前嘅香港政府辦公大樓 - 美利大廈，不知不覺間原來喺2018年已經完成活化，變成一間五星級酒店。之前睇到好多關於依間酒店下午茶嘅介紹，非常吸引，一直都好想去試下。到左一年之後，我終於的起心肝去訂位試一試。酒店入面嘅環境唔錯，用左好多花去裝飾，睇落優雅高貴，但係由於有好多人打卡嘅關係，就無謂同佢地爭位影相啦......Garden Lounge喺Lobby上一層，可能比較早嘅關係，入去嘅時候唔太多人，幾舒服。今次我地點左最classic嘅THE MURRAY AFTERNOON TEA，飲品方面點左Darjeeling Tea同埋Lychee Red兩款茶。Tea Set有兩層，下面係鹹點，上面係甜品，另外有一籃曲奇同Scones。先逐樣講鹹點：SMOKED SALMON - 欣賞牛油果，不過真係好鹹 ............... HARD BOILED ORGANIC EGG - 青瓜新鮮，賣相唔錯，味道正常BEETROOT TART - OMG!! 畢生難忘，鹹典黎講，依個都算係我食過最唔啱我口味嘅。自問唔討厭紅菜頭，但係佢嘅味係強到我食完成個tea set，飲左幾壺茶之後，都仍然喺口腔入面逗留住PRAWN SALAD- 比較好食嘅鹹點，沙律醬甜甜酸酸幾開胃PASTRAMI - 欣賞麵包有烘過，煙熏牛肉都唔錯，不過不失再講甜點：GREEN APPLE, MASCARPONE AND DILL SHOOTER - 麻麻地，有啲膩TARRAGON AND BLUEBERRY CAKE - 都係唔太啱口味，不過唔太甜STRAWBERRY AND FENNEL CREAM - 士多啤梨Cream酸酸甜甜唔錯，加上下面酥皮幾夾MINT AND BERGAMOT MILK CHOCOLATE TART - 朱古力無得輸到Cookies and SconesLAIN AND CARDAMOM WITH APRICOT - 原味嘅Scone加上clotted cream高質趁熱食更佳，外脆內軟，又唔會太乾。另外嗰個大同小異，但係加左味反而無咁好味...STRAWBERRY TOMATO WINDOW - 士多啤梨jam嘅曲奇，幾好食CHOCOLATE CHARCOAL SHORTBREAD RING - 朱古力曲奇，正正常常OSMANTHUS ALMOND ARCH - 杏仁曲奇，麻麻地...環境方面其實唔錯，都坐得舒服嘅。不過越坐越多人，越黎越嘈，咖啡機嘅聲都有啲令人心煩氣燥，有啲破壞左食tea嘅mood。總括黎講，以依個價位嘅afternoon tea黎講，我相信有更好嘅選擇…Read More

今日喺將軍澳覓食，醒起依間餐廳唔錯，於是過黎睇下洗唔洗排隊。去到可能時間尚早，未見人龍，仲安排我地坐窗口位，真係非常好彩。第一份Lunch set點左忌廉番茄牛柳絲意粉。意粉偏軟身，配上酸酸地嘅汁幾開胃，牛柳絲唔韌。第二個係蜂蜜紫薯烤雞意大利飯。喺點之前我係完全幻上唔到會喺點嘅樣，純粹抱住試試下嘅心態去點。上到黎嘅賣相算係唔錯，有驚喜。食落蜂蜜味好重好香，加上紫薯粒，有啲似食緊甜品，味道係唔錯嘅。烤雞唔太燶，不過調味夠，皮勁脆。加25蚊可以要一件cake，我就當然唔會錯過我最鐘意食嘅抹茶卷蛋啦。卷蛋入面嘅Cream濃抹茶味，但係又唔會好heavy。蛋糕唔太甜，同cream同紅豆嘅甜中和番，非常好食。另外，跟餐係包一杯野飲，分別係蜂蜜檸檬、黑糖薑母茶，同埋美式咖啡，都唔錯嘅。…Read More

今日番工last day，決定同朋友試下間舒服啲嘅餐廳。Mr. And Mrs. Fox有三層，地下係酒吧，一樓係餐廳，二樓係搞私人聚會嘅地方。今次我地就去一樓餐廳，食一個正式嘅dinner。Roasted Chicken Salad雞烤得好香，唔會好鞋，但係食落就幾淡。菜係新鮮嘅，加上啲dressing幾清新。Paella Negra譯番做中文係黑色嘅西班牙炒飯。咁大條嘅八爪魚煮得非常稔，完全係意料之外，值得一讚。飯軟硬適中，都幾入味。1kg Cowboy Steak係斧頭扒，我地選配左Tomato Salsa。依個重頭戲有啲令我地跌眼鏡，因為佢有啲overcooked，食落有少少韌，不過牛味都有喺度嘅。Pork Chop不過不失，係淡左少少。Fries新鮮炸起，唔會太鹹，唔錯。最後點左幾杯Lemonades同Cocktails。Cocktail都好易入口，味道偏甜。再加多shot vodka，吹下水，歡愉嘅一晚眨下眼就過去。…Read More

行開將軍澳，喺Popcorn入面見到有間幾得意嘅野飲鋪頭，門口有大大個謝曬皮嘅插畫，鋪名又咁鬼死長，大大咁吸引左我嘅注意。依度野飲種類都幾多，珍珠奶茶、水果茶、黑糖珍珠鮮奶嗰啲都有，水果茶嘅名仲好盞鬼添。今次我就試下佢嘅熱珍珠鮮奶鐵觀音烏龍(走甜)。除左隻杯靚之外，個味道都唔錯㗎！走甜之後茶味好出，用上鮮奶感覺比平時嘅奶精更加健康。欣賞佢連珍珠都唔太甜，咬落煙韌，唔太稔亦唔太硬，總括黎講算係唔錯。…Read More

難得請半日假，終於可以試下其他餐廳嘅下午茶。每一份下午茶餐有一份主食，兩款點心，同一份甜品。我地今次要左兩份下午茶，其中一份再加20蚊要多三款點心。先逐樣講點心甜品。左上嗰三款同右下嗰三款係一樣嘅。最左邊嘅係蕃薯包，中間係雪耳糖水，右邊係白米糕。蕃薯包暖笠笠，咬落有微微嘅蕃薯香味，甜甜地。雪耳糖水飲落清潤，紅棗嘅酸更加中和到糖水嘅甜。白米糕類似白糖糕，不過係微甜版，食落有微微嘅白米發酵香味。至於中間嗰行由左至右係扁肉，糯米丸，同埋黃金磚。扁肉類似酥炸雲呑，配上甜酸醬，滋味無窮。糯米丸其實係擂沙湯丸，湯丸煙韌，芝麻餡香滑。黃金磚類似蝦多士，不過上面嘅係肉而唔係蝦。多士金黃香脆，記得趁熱食。主食方面，我點左醬爆肉絲湯麵。個人覺得好似糊仔咁，麵身比較稔身同漿身，不過就索曬湯嘅精華。肉絲不過不失。總括以味道黎講的確唔錯，而且份量都非常足夠。…Read More

望住枱面嘅三層架，盛載住豐富嘅鹹點甜品，可以過一個悠閒嘅朝早真係好。。。等陣，朝早食下午茶？無錯，馬莎Cafe嘅三層架係成日都有㗎！馬莎作為英國嘅品牌，今次可以話係歎番個英式嘅下午茶，睇下佢嘅質素如何先。三層入面最吸引到我嘅係中間嘅Scones，上黎嘅時候熱熱地，仲要係幾大件下，所以我決定食左佢先。個mega size嘅Scone完全無令我失望。佢雖然係reheat左，但係都做到外面少少脆，裏面都唔太乾。中間切開搽上一層cream，食落去更加軟滑。但係佢嘅士多啤梨果占返而同依個scone唔太夾，其實馬莎出產嘅果占一向都唔差，可以考慮轉用第二款味道嘅果占。之後到最底層嘅三文治🥪。依度嘅三文治有三款，包括有煙三文魚，吞拿魚，同蛋沙律。全部都係凍嘅，款款都two-bite size，食落都幾方便。不過我比較偏好食熱嘅三文治，所以覺得一般。另外，煙三文魚三文治入面竟然有好大條魚骨，依度扣分。最頂層有兩件macarons同兩件fruit tarts。Fruit tarts正正常常，不過撻底比較鬆脆，食落好易散，味道係ok嘅，甜酸適中。Macarons做得唔錯，尤其係紅色嗰粒，食落有好香嘅果仁味。口感方面係比較實，中間個餡幾煙韌。另外，餐係跟兩杯野飲。我地就試左English Breakfast Tea同Latte。茶係用茶壺上，不過茶包留係茶壺入面會越飲越苦。咖啡ok，不過熱啲會更好。作為三層架黎講，$199 for 2其實係唔貴，份量算多，幾抵食。而作為早餐就可能誇張左啲😂，建議都係下晝黎食。…Read More

行開ifc想搵個地方坐下休息下，見到Tea WG有afternoon tea，環境唔錯，價錢相宜，於是就入去試一試。今次我地點左Mahattan Tea Set，有4款canepés，2件Scone，4件Macarons，同埋兩壼茶。依度有過百種茶可以俾你揀，有選擇困難症嘅你同我真係唔知點算好，好彩侍應們都好樂意跟據你嘅喜好推薦幾款茶俾你。最後我地揀左牡丹茶同埋朱古力伯爵茶。朱古力伯爵茶聞落去有好香嘅朱古力甜味，飲落去首先有淡淡嘅朱古力味，之後citrus嘅香味再慢慢滲出黎，飲落非常舒服，好放鬆。三層架嘅底層係四款鹹點，每一款都幾精緻。我今次就試左依兩款嘅小食，每一款都係一啖就食曬。後面嗰個菇幾juicy，配上鵪鶉蛋幾夾。第二層係Scone，配上jam同whipped cream。Scone濕度適中，食起上黎唔會太辛苦，不過有啲實，如果鬆軟少少會更好。另外，果占果味好香，配上Scone食唔錯。最頂層係四件Macarons of your choice。今次我試左Earl Grey Fortune & Chocolate(lowkey配番我壺茶)，同埋Pink Garden Tea & Lychee。前者朱古力味比較濃，啱曬chocoholics，後者偏甜，荔枝味好淡。以三層下午茶黎講，依個算係值得食嘅，食物唔錯，茶更加出色。…Read More

「吃什麼」嘅前身其實係「請坐」，之前佢被逼要放棄「請坐」依個名營業落去震驚成個飲食界，跟住就有好多人介紹依間台灣小餐廳，令我一直都想試下。可惜，期望太高，我覺得有少少失望。「吃什麼」位於大館對面，門口出面大大隻字寫住「WHAT TO EAT」，非常顯眼。食物方面選擇頗多。今次我地點左原味蛋餅，外省牛肉麵(半筋半肉)，滷肉飯(小碗)，同埋花枝丸。其實，依度嘅食物普遍唔差，可惜牛肉麵係致命傷。先講好食嘅：-滷肉飯：份量幾多，肉同飯嘅比例啱啱好。肉肥瘦適中，唔會有羶味，亦唔會太鹹，唔錯。-花枝丸：彈牙，新鮮炸起，夠熱夠脆。一般嘅：-原味蛋餅：少少煙韌，不過略淡，加少少調味會更佳。失望嘅：-牛肉麵：湯底同平時食開嘅好唔同，感覺係落左西式嘅調味品，同牛肉麵好唔夾。牛肉燘得唔夠腍，調味唔夠。唯一欣賞嘅係個麵條，咬落爽彈。總括黎講，作為台式餐廳，依間唔係我嘅首選，不過每個人嘅口味唔同，可能大家會有唔同嘅諗法。…Read More

打開電話相簿，睇番兩年前去北歐嘅相，真係有啲掛住嗰邊嘅所有野。可惜又無錢，又無假去旅行，惟有食下餐北歐菜當去左啦。講起北歐菜，其實除左三文魚同鹿之外，真係我難講得出佢嘅獨特菜色，反而我覺得北歐菜嘅特色係食氣氛，同埋菜色精緻嘅賣相。F.I.N.D.S.作為香港北歐菜嘅代表餐廳，唔知質素又如何呢？F.I.N.D.S.入面用上綠色做主調，配上一兩張marimekko式嘅花型pattern櫈，營造出北歐嘅感覺。今次我地黎試依度嘅lunch，喺Menu方面，其實係無乜濃厚北歐色彩，同一般西餐差唔多。先黎一份麵包。麵包用上有彩色花pattern嘅籃盛住，每人會伴隨送上一份牛油、橄欖油。麵包新鮮烘起，暖暖地，包邊脆，中間都幾軟熟，唔錯。前菜方面，我地點左慢煮鴨胸同埋香烤南瓜湯。慢煮鴨胸賣相精緻，鴨胸肉質嫩，不過加上下面薄荷醬嘅配搭，令我有啲適應唔到，可幸嘅係，個醬唔算太濃。反而露荀爽脆無渣，成為一大加分位。主菜方面，我地今次試烤有機嫩雞胸同埋什菌意粉。先講雞胸，佢講得真係無錯—「嫩」。雞肉一啲都唔「鞋」，亦都好juicy，同埋唔會over-seasoned，非常有水準。什菌意粉個汁好creamy，意粉al dente，唔錯。甜品方面，我地點左越橘莓杏仁撻，同埋瑞典牛奶芝士。橘莓撻偏酸，配上雲呢拿雪糕，啱啱好balance番。瑞典牛奶芝士唔會有太過濃烈嘅芝士味，味道偏鹹，配上莓乾唔錯。最後係跟餐熱咖啡。咖啡好strong，味道有啲苦，不過加左奶之後就非常好飲。隻杯亦都好靚。總括黎講，F.I.N.D.S.嘅食物質素中上，可惜北歐嘅味道唔夠濃厚，未能解除我對北歐嘅掛念。可能，北歐菜嘅精粹始終係在於嗰度嘅自然景色而帶黎嘅舒適感覺～…Read More

香港最近開左好多間梳乎厘班戟過江龍，而Flipper’s係其中一間最受歡迎嘅專門店。今次我地去到都要排隊，大概排左半個鐘頭多啲，好彩佢有提供櫈仔，令我地等得無咁攰。Flipper’s除左有甜嘅pancakes，亦都有鹹嘅。今次我地就揀左兩款甜嘅。首先係「奇蹟之栗子班戟」。班戟空氣感好足，做到梳乎嘅感覺，蛋味都有嘅，不過唔係好出。上面嘅cream有栗子味同原味，栗子cream栗子味好香濃好滑，但係又唔會太杰，配上pancake亦唔會太膩。另外，上面個栗子都好好味。士多啤梨藍莓香蕉班戟集合左三款好好味好新鮮嘅水果，莓嘅酸味加上蕉糖cream嘅香甜好match！最後仲有珍珠奶茶，味道正常，但係無得走甜，有啲可惜。今餐可以話係用「甜」字黎總結呀！題外話：佢杯水好好飲😂，鐘意飲mojito嘅朋友一定鐘意。…Read More

星期六無乜野做，最啱一家人去飲茶。平時去黎去去都係大集團嘅酒樓，有啲悶，於是就上Openrice搵下「飲茶」，點知又俾我搵到一間叫「飲茶」嘅地方，所以我地就去左「飲茶」飲茶啦。依度同一般嘅酒樓好唔同，感覺好新派，餐廳中間仲有張bar枱，非常型格。一坐低揀左茶先，今次我地要紅棗紅袍茶。依個紅袍茶底甘香，味濃但係唔澀。幾粒大紅棗為茶加上微微嘅酸味，正好為豐富嘅一餐解膩。「飲茶」作為一間酒樓，點心種類包羅萬有，但係依度卻為佢地重新包裝成得意嘅模樣，亦都為佢地改左好搞笑嘅名。尤其係啲包，為佢地加上眼耳口鼻，每一樣都好似卡通公仔咁。首先係「睇住流奶」，佢嘅正身係流沙奶黃包。依個包嘅玩法係先用筷子篤開佢個口，再㩒扁佢，然後佢入面啲奶黃餡就會係佢個口度流出黎㗎啦。佢個奶黃有少少鹹蛋香，亦都做到流沙嘅效果，唔錯。「吉川奶子」係綠茶異色版嘅「睇住流奶」，入面嘅餡都做到流心效果，不過綠茶味唔夠出，味道偏甜。「有色蝦餃」賣相好靚，個餡亦都唔馬虎。隻蝦好大隻好爽，無加太多調味，食得出係新鮮嘅。皮厚薄適中，煙韌得黎唔粘牙。「一籠八戒」顧名思義係一籠叉燒包，造型方面真係成個豬樣😂，好正。味道方面，其實同一般嘅叉燒包差唔多。「鴿呑鳳梨」其實係BB鴿形嘅鳳梨酥，用鐵籠上，細節位都做得好足。鳳利酥酥皮脆，不過個人覺得有少少奶精味，鳳梨餡香得黎又唔太甜，當甜品幾好。牛肝菌炆伊炒得幾香，伊麵吸收曬牛肝菌嘅香味，不過略為油膩，落少啲油會更佳。另外，牛肝菌如果落多啲會更香。「近墨者黑」其實係墨汁海鮮蛋白炒飯。炒飯入面嘅海鮮唔少，主要係蝦同帶子。飯炒得粒粒分明，不過比較硬身。題外話：依度有外籍員工，所以有時候都要用英文溝通，真係一個幾特別嘅經驗呢～…Read More

吓，乜原來東海堂有堂食㗎？😱係呀，將軍澳廣場依間東海堂係有得坐低食早餐/常餐㗎，仲要係平靚正添！今次我就過黎食佢嘅早餐。依度嘅早餐有三款，而我平時都係食開螺絲粉餐。依一份35蚊嘅早餐份量十足，有一大碗嘅雞湯(可轉蕃茄湯)火腿螺絲粉，仲有炒蛋多士同埋野飲(凍飲+4蚊)。先講炒蛋多士。炒蛋足料，炒得好滑，仲有少少蛋漿，唔會太熟，比大型連鎖高級茶餐廳好食得多。多士用上東海堂自家牛奶麵包，軟熟香甜，可惜今次烘得唔夠脆，不過依然好好食。雞湯火腿螺絲粉湯底濃，但唔會太鹹，加左少少香草提升味道。螺絲粉軟硬適中，口感啱啱好。火腿有兩塊，都係好味嘅。飲品方面係咖啡奶茶檸茶檸水，凍飲+4蚊。咖啡係幾香嘅，飲落都無乜澀味。平時飲開凍奶茶，佢比較多奶，飲落好滑，不過偏甜少少，非常好飲。早餐，緊係要食好啲先係good morning嘛~…Read More

夜媽媽喺將軍澳真係無乜餐廳營業，不過喺富康入面就有間開到凌晨3點嘅Burger鋪，連報紙都有介紹過。今次我決定同fd子一齊去試下。一去到富康商場就見到搶眼藍色嘅招牌。見到鋪頭細細，啲人都喺出面食。依度主打burger，但係都有pasta同snacks食。我地今次點左Chicago Burger，LA Burger同埋Parma Ham Pizza，再加三枝啤酒。Parma Ham Pizza餅底薄脆，好似crepe咁，Parma Ham唔會太鹹，加上酸酸地嘅醬汁好match。Chicago Burger係Double Cheese Burger，有兩層芝士加兩塊Patty。個肉好juicy，加埋Cheese食落去簡直係雙倍嘅滿足！LA Burger係腸burger，面包係用左bagel，比較實身，但係索左啲bbq汁之後就變軟身少少，口感啱啱好。腸外面脆，入面juicy，加上爽脆嘅生菜同smoky bbq sauce好正。每一份burger都會跟tortilla同牛油果醬，tortilla脆卜卜，牛油果醬少少辣，好香濃，唔錯！最後係啤酒，今次我地嗌左ipa手工啤。依隻啤酒幾香，都幾易入口，不過就貴左啲。…Read More