joyjoywai's Profile

餐廳好有氣氛星期五晚唔訂枱都幾難有位服務態度友善必叫Whole smoked pigeon Banana yogurt burger whiskey caramel 有特色嘅甜品大推試咗好多款前菜，估唔到份量望落唔多，但都幾飽…Read More

嚟幾次都好滿意Lunch set 有前菜兩款次次嚟前菜都有新意有驚喜銀雪魚、鰻魚、牛扒都係燒到剛剛好而且味道調得好啱炸豬扒都做到專門店質素生果試過菠蘿同橙都係好甜即係入靚貨比客👍🏻食物質素對得住個價錢…Read More

呢度總結左兩次用餐體驗。煙燻鵝肝凍係我最喜愛嘅菜式之一。煙燻味與鵝肝凍融為一體，有別於一般「餐桌煙燻表演」那一閃即逝的煙燻味道。鵝肝凍既絲滑感覺現在腦海中，我會為左佢再嚟。龍蝦湯拍得住Lawry’s Prime Rib既龍蝦湯味道，只係Lawry’s 多左舊龍蝦肉。煎鴨肝外香脆內嫩滑，最緊要係冇渣，亦冇肥膩油益嘅感覺。主菜我個人特別喜愛佢既煎魚。食西餐通常煎魚都唔會特別出色，因為都係急凍魚塊嚟。但係呢度用咗本地新鮮魚，熟成一日，而且煎既火喉剛好，配上炸得香脆嘅櫻花蝦，帶出咗整碟嘅鮮味。牛扒嘅重點係佢既sauce做得好，而且做到我心目中既medium rare。Homemade 油漬鴨腿唔會死咸，個皮係煎到香酥鬆化，配埋個sauce係非常對味。大廚既煎功確係好好，在我看來亦代表係用心去處理每一道菜。好清嘅一碟清燉牛臉頰牛舌蔬菜，好係法式家庭小菜既感覺，我食開重口味，所以冇揀，而注重運動健康嘅朋友仔就覺得呢碟好啱佢。今次嘅前菜係沙律，當然唔係求其沙律吧嘅沙律菜，材料新鮮完全係清新嘅感覺。上一次嘅前菜Roast raclette cheese pot with seafood，用上新鮮墨魚汁嘅海鮮薯蓉再加焗溶咗嘅raclette cheese ，非常之喜愛咁邪惡嘅食物。希望下次再去個Menu有呢一款前菜。一致認同個鳥結冰膏係好好味又唔會太甜, 而且餐廳話我知出面係無得食架，特別矜貴。Crème brûlée 蛋奶味平衡，帶有新鮮雲呢拿香味。最正係佢冇收開瓶費！ 佢嘅裝修好cosy, 同三五知己或者一大班朋友舒舒服服食嘢傾偈，係一個好嘅選擇。…Read More

大退步，完全唔係以前既上海婆婆。小龍包比較好，皮夠薄。黃金豆角，正常唔難食，但唔係好好味。上海炒面，唔好食。快餐店質素。紅燒肉，皮冧肉硬，都唔知係咩嚟。難食。不會再來。…Read More

雖然係新開分店，但食物同服務都keep到水準。侍應既服務親切有禮，不得不讚。2個人叫了二人餐，因為好餓，所以叫多一個意粉。其實不額外叫意粉的話，2人餐份量係夠食的。凱薩沙律菜脆口，醬少了一些，但我喜歡，因為無咁肥。肉丸肉質普通，但醬汁惹味。美國薄餅，簡簡單單芝士同辣肉腸，一貫好味。前菜同沙律都有少少pizza 包伴食，佢既包好好味。最推介係蟹肉意粉，差不多次次都叫。最後都係食唔晒，要打包了2件pizza. …Read More

約了一班姊妹食飯，剛好時香港最凍果幾日，打邊爐絕對是最佳選擇。當中一位姊妹是火鍋專家，推介了這一間，我立即打去訂位。這間是台灣風格的火鍋店，一班姊妹，當然是叫了「美人養生鍋」，湯底有烏雞桃膠等。先飲個湯，好味好補身既感覺。火鍋主要係睇食材係咪新鮮，呢間食材好靚，仲要有特式食材，靚肥牛、牛胸爽、鴨血係必叫的。餐前小食一樣唔失禮，鴨舌、炸雞粒都好味。呢個食物質素呢個價錢絕對要再encore. 後話，佢地訂位手續有點煩，打了一個電話，留了預約資料，但職員唔會即時話你知booking係咪confirm, 要等分店既人覆電話比我。 如果分店職員打比我時我唔得閒聽，咁係咪我訂既枱會比左人呢？ 呢樣要改善一吓。…Read More

去銅鑼灣特地去幫襯一間比名牌告到就嚟執既小店（間鞋店响跑馬地多年好出名的，連名媛都有幫襯），肚餓中又諗唔到食咩，因為銅鑼灣太多選擇，唔想又食果d食到厭既連鎖店，咁啱見到呢間好街坊feel既燒味店，望見佢既燒味外表唔係好吸引，猶豫之際想到自己來銅鑼灣是支持小店的，為何不試一試這間？ 不想開openrice 看別人食過什麼讚過什麼，索性直接問哥仔有什麼推介，哥仔一笑，應該係無咩人會咁問，佢問返我想食咩😅，我果刻太肚餓咩都想食，咁就會出現選擇障礙症，好彩佢最後話「不如叉雞飯」，好，就要叉雞。師傅斬左雞肶比我😍，肉好嫩，味道剛好。叉燒望落好似有d乾，但咬落好爽，係我最喜歡的部位。葱油咸左少少。今次既叉雞飯斬中我最喜愛既部位，$47仲邊有得彈？一路食見有好多熟客仔買外賣。小店係值得支持既。…Read More

身為觀塘打工仔，見J2飲食節目介紹呢間工廈餐廳，點都要試吓。Lunch都有得訂枱，每張枱之間空間足夠，好適合約朋友午餐一聚。Set lunch 有湯、主菜、餐飲。今日個湯係紅腰豆忌廉湯，第一次飲呢款湯，唔錯。主菜由$78-118 都有，性價比高，尤其是佢promote緊燒牛扒任食，係buffet果種燒牛扒，你可以同佢講想要生d定熟d,只係$118，啱晒胃口大既朋友，反而擔心佢蝕本做唔住。雞卷$78，份量較細，適合胃口細既朋友，但係三個主菜之中我覺得味道最好。原來佢地有甜品師傅坐鎮的，可另外叫甜品，可惜佢menu無寫，今次試唔到。餐廳服務非常親切，見佢門口放了一包包nuts, 細問之下知道係佢地自家調味焗製，比市面油炸的健康，而且有多款口味。12:00前訂枱既話，lunch有9折，仲要無加一，抵。…Read More

第一次見識到咁虛撼既排隊場面，人山人海個個好有耐性去等位，唔齊人唔可以入座，入座後2小時交枱。Reception 哥仔服務態度一流，就算係提我地夠鐘還枱都係好友善，唔係趕客走咁款，值得加許。雞煲確係好味既，我唔太食辣，小辣己經好夠味。其他火鍋食材都係新鮮料，尤其喜歡佢個蝦滑墨魚滑，夠彈牙又食到墨魚肉，真材實料。手打丸類都唔錯，但墨魚滑太出色令佢地失色了。今餐食得太飽仲有嘢剩要打包，每位都係四百有找，旺區以呢個質素既食材計算係ok的。場地好大，但只有2格女廁，清潔度不足。…Read More

叫了一碗魚腩肉丸粥，先上了一小碗薑䓤豉油，第一次食魚粥配薑䓤豉油，不錯不錯，魚腩有豉油真係多一種滋味，無咁悶。肉丸屬於爽口的，但不是我期望的鮮肉丸。肉丸5-6粒魚腩四厚片，份量很足。第一口粥確係嘗到好甜既魚鮮，不過粥的質地有點稀，而且愈食愈似粥水，是粥品店敗筆的地方。服務很好，座位空間好窄，但阿姐見我有一大袋嘢，安排了最入個角位比我。可惜個位背住廁所正一正，不停有人出入廁所，仲要聽到佢地有無洗手，所以一路食一路感覺不太良好。萬萬不要坐這個位。另外，當日唔係落雨但舖頭地面好濕。老實講，環境真的影響食慾。…Read More

住附近已經食燒鵝食到厭，今日想食吓家常便飯，諗住有蘇民峰加持唔太差掛，點知中伏了。其實幾年前幫襯過一次燒鵝，食完覺得麻麻己經無返轉頭，今次想試吓佢小菜得唔得，所以無叫燒鵝。花雕煮花甲，花甲好大隻，但無咩鮮味，少少腥。雖然花雕味好濃又有勁多薑，但都係唔好食。煎蓮藕餅，咬落膠膠地，初時仲諗究竟食緊咩，蓮藕少得可憐，於是問侍應呢塊嘢除了蓮藕仲有咩，佢好直接答係粉，哦⋯⋯原來粉多過蓮藕，佢改名做煎蓮藕糕會好d。要讚既話只能讚佢可以將d粉達到咁膠，好功力。個生菜豆腐鯪魚球湯味道比較正常。 成餐飯靠呢個湯送白飯先至飽，本來有諗過要唔要燒鵝送飯，但心諗都係博唔過，唔比佢賺$160蚊。結論，唔會再去。…Read More

愛羅宋湯的人有福了。以前什麼也好味，現在什麼也變了味。 80-90年代，求其一間西餐廳都做到濃郁的羅宋湯，現在的西餐廳只有蕃茄雜菜湯，而不是真正的羅宋湯。今晚終於嚐回以前的羅宋湯，不是看到餐桌上的簡介也不知道，原來一直認為最正宗的羅宋湯，屬於「上海派羅宋湯」，由落難俄羅斯貴族帶到上海發揚光大，再傳入香港。其他食物也很好，看得出餐廳有用心。蝦多士比炸魷魚圈好味，魷魚圈的外皮稍為硬了。帶子沙律新鮮，醬料味道也好。雞卷外脆內juicy, 推介菜式之一。最後還叫了俄式牛柳飯，味道很住家。餐廳招呼十分周到一流。我會為了這羅宋湯再回來。…Read More

曾經何時，Outback 是年輕人聚腳的好地方，食物有質素，服務貼心，我差不多每月都要品嚐一轉佢既signature dish。大約兩三年前開始，食物水準每況愈下，只有餐前面包沒變，越吃越失望，起碼有一年沒有光顧。到近期愉景新城裝修了，Outback位置也搬了，但沒有燃起光顧的心。剛巧星期日逛完Ikea,實在想不到吃什麼，於是就給他一個機會。Outback 面包一直都是我欣賞的,但不能盡吃，因為要留肚吃肉。白汁蝦意粉，係呢個味道喇！ 終於做得返以前個味，蝦肉新鮮肉質實淨，唔係我最怕既無味水晶蝦。另外叫了澳洲牛扒+ ribs combo, 牛扒7成熟都唔會乾柴，ribs亦焗得剛剛好，side dish雜菜同甜薯質素就令整碟菜式如虎添翼，真係做返以前既水準。啤酒差在唔夠凍，得呢樣扣分。服務都係好既，不過無左以前單對單侍應服務咁溫暖。Outback 回復當年勇，我又可以重回佢懷抱。…Read More

估不到觀塘有咁型格既地方食飯，一進門左邊是賣衣物，午餐未有時間去看有沒有心頭好，但裝置格局就好像去了日本的時裝店，尤其是幾部vintage 電單車將整體感覺推上另一層次。右邊是餐廳範圍，是open kitchen的設計，亮點是有年輕有型的廚師坐鎮，座位用上實木長枱，有些地方有鐵片修補的痕跡，很有粗獷豪邁的感覺。 三個餐最好味係fish and chips. 做到外脆內軟。每個餐跟免費salad bar, 選擇足夠，味道不錯，因為沙律醬有麻醬，錯不了。餐廳氣氛輕鬆，看來很適合大班朋友包場party. …Read More

其實回家路上己經過這小店無數次，每次也想過要光顧，但每次在考慮晚餐吃什麼時，總不會想起這店。今天不經意在街市聽到街坊的對話中，推介這家粥店的豬潤腸，說現時很少地方有豬潤腸食，而且是新鮮即製。我一聽到當然鎖定目標要去一試。阿姐在門外熱情招呼我入去，有選擇障礙症的我在考慮吃什麼時，店員並沒有催促，反而走開讓我慢慢想。今時今日好多小店懶有性格要客人比錢買難受，這些小事己是很難得了。豬潤腸是不二之選，無揀錯，腸粉皮又簿又滑，豬潤熟度剛剛好。鯪魚球生菜粥係有「手指公」的其中一款，我食完都比個手指公佢，鯪魚球有好多粒，夠彈牙，魚味果皮味剛剛好。最正係個粥底，好綿好好味，食到最後都無出水，真材實料，個味係同細個食街市檔既粥一樣咁好味道，食返嗰個味真係好開心。 最重要係食完無口乾，即係無咩味精。真心推介呢間粥店，希望佢繼續做好粥比我地街坊。…Read More