本身以店舖嘅人氣，環境亦相對簡陋，收$880一位8道菜嘅價錢我亦對佢有相對嘅期望，但整體而言我覺得呢餐私房菜係唔太合格嘅。首先評論翻個服務，本身都知係小店人手，冇期望過會有高檔服務，但係以海鮮omakase嚟講，侍應上菜嘅時候其實只係讀翻個菜式名出嚟，對於食材/煮法係無任何介紹。見到其他食評話會有好詳細嘅介紹，唔知道係咪今晚嘅侍應係part time，但佢哋上菜嘅介紹係令整晚嘅體驗大打折扣。第一道菜——壹品魚子蟹水晶。呢道菜我都係睇翻其他食評先知係咩嚟，雖然睇得出係心機嘢，處理蟹肉亦應該好繁複，但食落去真係唔好食，一食落口係有腥味，覺得食緊一舊好特別但係凍嘅腥腥地嘅啫喱，第一道菜嚟講比咗個好差嘅印象。第二道菜——香酥沙拉鮮蝦球。本身見到個名我幻想係炸嘅蝦球上面撈咗沙律醬。上菜嗰下真係呆咗，我覺得呢碟菜係成餐最難食嘅嘢，完全唔明個配搭係想點。第三道菜——潮式骨香鱈魚子魚飯。呢個係出色嘅，雖然我都係要睇翻其他人嘅食評先知道係咩嚟。呢度菜式的確好帶得出魚嘅鮮味，而且啲骨好似大部份都挑起左，食起上嚟好方便，配埋啲普寧豆醬食味道層次係十分之豐富。第四道菜——瑤柱老雞燉西瓜。呢個湯我會話係中規中矩，就係你見到個菜式名會期望嘅味道，冇特別亦冇乜值得批評嘅地方。第五道菜——冰鎮南非活鮑魚。呢道菜我都覺得係好食嘅，但食到呢個位就開始覺得好多菜式都係凍（應該話上到呢個菜除咗湯其實全部嘢都係凍嘅），係整個食飯體驗來講係十分之不良好，已經去到一個好想食返啲熱嘢嘅位，呢個我相信係小店人手不足，準備凍嘅菜式會能夠應付到多啲客人，不過以中菜嚟講我就冇諗過會食咁多凍嘢。不過講翻道菜，隻鮑魚係彈牙嘅，而且個調味都做得好好，配上wasabi係好好食。第六道菜——雪花本地菠菜苗。基本上就係上湯浸菠菜苗，雪花等於蛋白，同樣地中規中矩，幾好食不過冇乜特別。第七道菜——上湯焗海龍蝦煎米。呢個係幾好食嘅，我會話係中上表現，不過冇去到話好出色，係一都幾好食嘅菜式咁樣。龍蝦又食得出好新鮮彈牙，個上湯味道都唔錯不過係偏淡，煎米粉幾脆口，呢碟係唔錯嘅。第八道菜——鮮忌廉楊枝甘露。呢個我會話係比平時嘅楊枝甘露好食，因為多咗忌廉嘅奶香味，有少少驚喜，不過都冇話喜出望外咁樣。所以總括而言，我覺得當一間舖頭係標榜私房菜，但係又做唔到同客人有太多交流，而食材本身我都覺得唔值得收呢個價錢，味道嚟講亦係好壞參半，所以呢一餐我係覺得都幾失望。雖然係食得出啲工序係繁複，同埋係有心機，但大部份出到嚟嘅效果都幾一般，再加上頭兩道菜都幾難食，令到成餐飯嘅印象分大減。…Read More
