Nat coffee的個人專頁

環境差！食物質素差！服務差！ 一行到入去坐低就後悔，個環境好伏， 餐具又污糟，食物區啲嘢食一睇就知唔新鮮，食物選擇少，丸嘅種類得兩三款。炸物甜品望到都唔會想攞嚟，環境咁差，更加唔敢食軟雪糕。湯底冇味嘅，不過啲牛肉還可以。叫牛肉要侍應落單，但永遠無人招呼，下下都要行出去搵人過黎。上食物求其放低，明明見到餐盤放唔平，都就咁放低就走左去。呢個價位，食過其他餐廳，食物質素，環境同服務好過呢間好多倍！以後都唔會幫襯呢間！…查看更多

聽講呢度主打即磨芝麻，專登黎試下。第一次係食流心布丁，好驚喜，好濃芝麻味，加上中間流心芝麻醬，口感一流，超級好食，之後有再去食第二次。之後再試下黑芝麻荳漿啦，umm...完全無特別，亦飲唔出芝麻味，好普通。之後又再去，今次試芝麻糊啦，諗住布丁咁出色，芝麻糊一定好食，點知好！失！望！好稀，完全唔可以稱為芝麻糊，味道方面，食唔到芝麻味，淨係食到有陣芝麻油味加好似少少薑味？？好難食，完全唔係正常既芝麻糊！芝麻糊應有既味道同口感都無。平時有買開芝麻醬食，本身都諗住買黎試下，而家都唔敢買lu。總括黎講，淨係得流心布丁值得推介。…查看更多

食過另一間分店，好食，但要walk in無得訂枱，等枱既環境好差好擠迫。呢間新開既雖然地點唔算方便，但勝在有得訂枱，所以試下呢間。同另一間分店一樣，食物質素高，炸芝士有驚喜，炸魷魚都係，外脆內軟，無overcooked，一啲都唔韌，推介👍黑松露燉飯亦唔錯，另外千島醬雞肉pizza，雞翼正常水準。但飲品草莓沙冰略嫌偏淡味，甜品窩夫則普普通通，沒有太大驚喜。餐廳的環境非常好，坐得很舒服，值得再次光顧。👍…查看更多

見啲嘢好似幾靚，又平，買左件蛋捲同曲奇試下：🍰咖啡栗子蛋捲無乜咖啡味，栗子味更加無。蛋糕好乾，完全無蛋糕應有既甜味。未至於難食，亦唔好食。🍪咖啡嘅花曲奇又係無乜咖啡味，亦無嘅花曲奇應該要有既鬆化，脆身好似食緊餅乾。🍪焦糖脆脆曲奇又係無味既餅乾，講完。總結：唔好期望好食，但當平平地醫下肚都可以既…查看更多

朋友食過話好食，雖然價錢有啲貴，但睇相見啲嘢食幾吸引，本身又鍾意食芝士，所以嚟試下。星期五晚，都唔多人。餐廳地方唔大，但枱同枱之間唔會好近，坐得幾舒服。兩個人食，叫咗個pizza同意粉，炒意粉嗰陣侍應會叫你行過去影相。睇過食評見有人話啲嘢食無味，味道確係偏淡，pizza係比平時食嘅淡味，意粉好creamy，煙肉好香，亦都唔係重口味嗰啲。其實食物都係著重返芝士既味道，無多餘嘅調味，覺得無味相信只係個人口味問題。如果食慣重口味港式pizza可能食返P沙黑嗰啲會岩食啲。侍應全部都好有禮貌好nice，服務態度一流。如果想靜靜地食餐飯傾下計，係唔錯既選擇😃…查看更多

環境舒適，侍應有禮，好食，又唔貴，性價比高💜唯一挑剔係餐廳油煙味幾重（已經坐同㕑房距離較遠既位）🥞梳乎厘大大件，好厚，綿滑鬆軟，但略嫌唔夠甜。烏卒卒幾特別，但啲醬無味既，唔係好知食緊乜🤣紅色一粒粒酸酸地幾好食。🍝明太子大蝦燴飯好creamy，微辣，好開胃，顏色又靚，必試👍🍹沙冰沙冰係鮮果窄唔係糖水溝，勁清新，好綿，完全無冰粒，好好飲。見好多人推介雜莓，酸酸地幾開胃，但好多seeds，硬硬地，有啲影響口感。士多啤梨好飲啲，好香，好似瑞士糖味😋…查看更多

鍾意食pizza，又係芝士控既話，一定要去試下😍店地方唔大，但卡位坐得舒服。炸雞正常發揮，飲品唔太甜，一般啦。但Pizza真係世界級好食，超多芝士，皮超鬆軟，餡料足，醬汁好好味，大家都食得好滋味，係咁讚好食😋仲要讚店員好有禮貌好nice。一定會再幫襯❤️…查看更多

Open rice見食評唔錯，決定黎試下，點知 ...先叫個main，再add on小食。🍝香烤大頭蝦手工意粉蝦ok，但意粉，無乜味，又乾，唔好食。🍟黑松露薯條唔脆，講完！🍗水牛城雞翼普通急凍炸雞翼，同自己喺屋企氣炸 CP雞翼加啲茄汁無分別。🍹巨峰堤子乳酪沙冰一飲，頂！藥水味。2人飲完當晚及第二日都肚疴。無飲沙冰既就無事，咁問題喺邊，明晒！最後，唯一好食既係甜品。🍫朱古力麻糬窩夫。雖然麻糬分佈唔係太均勻，但淨係個窩夫都好食既，外脆內軟，好濃朱古力味，真係好好食😋。不過同open rice睇到既相唔同，無薄片朱古力舖滿喺面，得少少朱古力碎。但個窩夫真心好食，配埋雪糕，已經好正。🤑至於抵唔抵食，正常價錢，但埋單餐飯算平。原先諗住叫幾樣食完再叫，但唔好食，所以直接叫甜品，食得少嘢就自然平。總結：環境舒適，啲枱都幾寛落，完全聽唔到隔離枱講嘢，坐得舒服，侍應有禮，不過嘢食嘢飲真係好唔惦，差啲想俾劣評，但甜品同環境加返唔少分，下次再黎齋食甜品都ok既。希望改善下食物質素❤…查看更多

見新開嚟試下，有啲失望。菠蘿乳酪沙冰，沙冰夠綿，好清新，好好飲。 明太子薯條，好奇怪，點解會有蔥？ 薯條唔夠脆，明太子醬好咸，麻麻地。跟住叫咗個蟹黃蟹肉意大利麵， 又係好咸，陣味怪怪哋唔識形容。平時一定會食甜品，但呢度甜品冇乜特別，最後叫多個大頭蝦意大利麵。大蝦啲肉霉嘅，反而蝦仁好食，而意粉個汁係出色嘅，唔錯👍不過係幾好坐嘅，唔會逼逼夾， 但食物種類唔多，想食雞翼，但焦糖/南乳味真係無乜興趣😅咁既價錢真係好唔值。總括而言，麻麻過麻麻🙇‍♀️…查看更多

一直都想黎食buffet，點知有啲失望。其實食buffet總有嘢係好食，有嘢係難食，呢度熟食無一樣放入口係覺得難食，算好難得，但亦都無乜嘢覺得特別好食，好平均，亦好普通。剌身新鮮，燒味幾好，海鮮、點心、意粉正常，牛扒唔好食。甜品方面，cake好普通，開心果Macaroon似藥水味，曲奇同朱古力唔錯，最好食係焦糖海鹽脆脆蛋糕，叫做唯一驚喜。特別想講，咁既價錢，無Häagen-Dazs雪糕，唔緊要，都唔好俾啲咁差質素既雪糕人食丫（唔知乜雪糕黎），尤其咖啡味，嗰陣味畢身難忘，又苦又怪，人生第一次食咁劣既雪糕🤢我呢啲乜甜品都放得入口既人都嫌棄，唔想浪費，但真係食左2啖投降🤮。至於服務，同食物一樣咁一般，壽司bar嗰位西口西面眼超超，侍應無話唔禮貌，但想叫餐飲又話要收錢（其實有包餐飲一杯），問多幾問又話自己係幫工其實唔清楚，要問返著背心嗰啲侍應，其實唔知就唔好亂答。出面又無嘢飲攞，好似湯都唔覺有（唔知我睇唔到定點），等好耐先問到有餐飲，叫左好耐要追先飲到，杯咖啡落好多奶同糖都係好苦😖總括而言，咁既價錢黎講，好失望，無下次。…查看更多

本身係芝士控，好有興趣試下個 Brunost cheese croffle，今日放假黎試下。Brunost cheese croffle芝士真係好好食既，驚喜，但個包就麻麻地，無想像中酥脆。不過芝士實在太出色，整體黎講都係好食😊Mocha之前睇食評見啲人話咖啡難飲，又話酸又話唔岩口味，可能飲返即溶咖啡岩口味啲掛。咁我就穩陣啲叫左Mocha。點知幾好飲喎，唔同平時飲嗰啲好似飲朱奶咁無咖啡味，下次再黎試埋其他先。呢度裝修好靚，有特色，不過啲枱係細左啲逼左啲。店員親切有禮貌，尤其係女店員，要讚👍至於價錢，經濟實恵肯定唔係，想慳錢我會去食茶記，想食下Cafe，都預左係呢啲價錢😄…查看更多

Open rice見到個甜品併盤幾吸引，身為甜品控決定嚟試下🤗喺其他地方食過好好味嘅西班牙蛋餅， 但呢個蛋餅確實令人失望，完全唔好食，又乾又無味，感覺好似食緊隔夜蛋咁🥴飲品方面，之前睇到有食評話好淡冇味， 但我又覺得ok喎，好清新，唔似多數飲到既沙冰，好似飲緊糖水咁，好飲😸最後，最期待既甜品，方形嗰舊好煙韌，冬甩好好食，Macaroon 都出色，至於焦糖燉蛋，口感幾特別，比較creamy，不過甜左啲。 兩個人食已夠食，食唔到其他嘢。整體嚟講，飲品、甜品非常出色，但蛋餅確實 令人失望。 不過環境舒適闊落，服務員有禮貌，令人滿意嘅晚餐😃…查看更多

買左伯爵茶、朱古力同菠蘿皮。好無食？ok la，都好食既，啲排隊嘢黎講，亦唔算話好貴，$8至$10個都合理。但等左半個鐘，又唔係好食到不得了嗰隻，如果唔使排隊，都值得買黎食。…查看更多

見open rice呢間啲甜品好似ok，又有7折，決定黎試下。一開始有啲失望，因為太少嘢食，唔多款。刺身好難食，牛又普通。但跟住食叉燒、芝士肉丸、咖喱雞等熟食，又唔錯喎。芝士長通粉芝士味濃，有驚喜（平時食buffet啲意粉通粉列牌又乾又難食）。海鮮雖然少，得蝦同青口，但好新鮮。最驚喜係甜品，款式唔行貨，仲要好食添，尤其Opera Cake、朱古力撻，仲要好少buffet有水玄餅。雪糕好多味道選擇，味道ok la。至於飲品，自助凍檸茶同熱咖啡，個檸茶幾好飲。特別要讚一讚，因爸爸想飲凍咖啡，問侍應有無餐飲，佢話自助出面拎，問有無凍咖啡，侍應話無，但可以沖一杯俾爸爸，服務好貼心❤👏。總括嚟講，如果鍾意食自助餐要求好多款式，會失望。但食物質素唔差，環境亦舒適，服務態度一流。如果鍾意食甜品，係值得去既。😄…查看更多

食lunch buffet，2nd round有58折，好抵。卜枱時，接電話既服務員態度超差🤷‍♀️期待食既麵包蟹無左，改左鮑魚關東煮，完全無味既，鮑魚林但腥腥地。海鮮得蝦新鮮，其他都唔ok。魚生仲精彩，三文魚有根，吞嗱魚梅既，未試過食buffet會覺得魚生難食，朋友話×鮮仲好食😅不過驚喜既係，好多熟食都好食，尤其鎮江骨，仲有牛腩、叉燒、串燒、咖哩雞，估佢唔到。最後甜品，榛子朱古力蛋糕超好食（相最左邊），食左3舊，蝴蝶酥曲奇都好食，不過其他蛋糕都好一般，又無Macaroon，有少少失望。 總括嚟講，咁既價錢黎講，都接受既。…查看更多