Siu_Siusweet's Profile

Green Monday去咗食傳統嘅齋菜，平時食得比較多係西式嘅素菜，想食下中式嘅味道，於是去咗呢間之前路過嘅齋舖。餐廳環境舒適整潔，好快就安排入座，馬上研究Menu有咩菜式可以試啦。齋鹵味一定會點啦，都係因為想食呢樣所以去食傳統中式齋菜。幾款都唔錯，最like係酸齋，酸酸甜甜一向係我嘅至愛。咖喱齋都好食，咖喱味道足，唔會淨係得個顏色。魚香茄子煲味道濃郁，無落豬肉碎但係完全無影響味道，一樣係好好送飯。所有餸菜份量都幾多，食到好飽，食齋係一樣可以食到好飽嘅。…Read More

之前都有聽過Origami呢個親子場地，不過一路以為佢只係兒童遊樂場，唔知道佢其實係一間餐廳，直到家姐同我講，話會帶佢囡囡去食飯+玩，問我會唔會join，我先知道佢係有食物供應嘅。我去主要係食，所以事前上網查咗個menu，未去到已經知道想點咩菜食式。見到好多評論都話咕嚕肉係好好食，好多好評+推介，咁就要試下啦。食完都真係無中伏，醬汁味道調得唔錯，唔會過酸或過甜。另一款就點咗黑松露炒飯，炒飯炒得好乾身，粒粒分明。家姐點咗滷肉飯，同埋1個兒童餐。我share咗家姐嘅滷肉飯嚟食，味道比較濃郁，滷肉份量唔少，加上1隻滷蛋，夠晒送飯。…Read More

同事介紹去咗一間懷舊舖頭打邊爐，尖沙咀通常泊車都比較麻煩，好彩喺附近搵到個停車場，停低部車行少少就已經到門口啦。入門口就見到D特色裝修，真係有好多上世紀嘅老香港風味，環境充滿懷舊氣息，配搭上本土特色餐具，氣氛良好。叫咗花膠雞湯做湯底，我地未落料之前，梗係每人飲1碗先啦，超好飲，真係feel到花膠嘅膠質溶入D湯度，飲嘅時候有少少黏口嘅感覺，好足料。點咗手切牛肉，見到牛肉肥瘦平均，顏色紅潤，好新鮮，肯定唔係雪藏貨。食落有濃郁牛味。其他火鍋配料，點了唐生菜、四寶丸、芋絲、炸魚皮等，全部都中規中矩，特別係幾款自製餃類，食落都唔錯。…Read More

點咗鴛鴦墨丸墨汁麵。墨汁墨魚丸味道都濃郁，食完又無成口變黑喎。傳統白色墨魚丸望落就無乜特別咁，但係食落就非常好味，好彈牙有咬口，墨魚味都足夠，相對墨汁墨魚丸，我更加歡喜傳統白色嘅味道。墨汁魚麵都比較特別，顏色望落去就真係黑蚊蚊嘅，同墨汁墨魚丸顏色一樣。同墨汁意大利粉有異曲同工嘅感覺，當然食入口係有分別。墨汁意大利粉本身質感更加煙韌，部份餐廳甚至會煮到8-9分熟，保持少少唔透心嘅口感。墨汁魚麵比普通麵較粗，入口軟軟滑滑，保持魚麵嘅texture。…Read More

出開emax時有D肚餓，諗緊展貿有咩地方可以食少少嘢，夜晚又要去打波，唔想食得太飽。咁啱就路過好燒味，見到下午茶有燒味嘅包賣，就去了解下係咩嚟架喇。睇圖片似係刈包，比較有特色。刈包係台灣嘅地道小食，外貌似係饅頭中間開一半，中間夾住肉餡。咁台灣通常都係夾住滷豬肉所以亦有「虎咬豬」嘅說法。我點咗個係夾叉燒嘅，所以都係「虎咬豬」。入面嘅叉燒好淋，雖然肉質偏瘦，但係唔會好乾，食落有肉汁，亦都醃得入味。加上2片青瓜就唔會有漏嘅感覺。整體上唔錯，對比傳統茶樓叉燒包又係另一種風味。…Read More

去咗間特色餐廳食飯，入面以機場離境大堂、登記閘位、飛機艙等作為餐廳場景。環境精緻，座位舒適，食物水平唔錯。我們點了經濟艙晚餐，有前菜、沙律、湯、主菜及甜品。燒香腸拼盤有辣肉腸和香草腸，2款都好食， 辣肉腸唔會過辣，好惹味，送酒一流。煙肉芝士忌廉汁意粉，煙肉、磨菇、洋蔥等配料，creamy醬汁加上芝士，又點會唔好食呢燒西班牙黑毛豬鞍，上菜時已切片，肉質嫩滑有肉汁食埋沙律甜品好豐富，下次叫埋阿哥阿嫂嚟，帶埋大小2B去應該啱佢玩，入面有好多介紹飛機資料，展覽櫃有好多飛機模型，又可以同佢地影下相。…Read More

唔知喺孤獨級別排行榜，一個人食蒸氣鍋係排第幾呢？不過我覺得一個人唔一定會覺得孤獨嘅，有時一個人都幾樂得清靜同自在。獨處都係一種幾好嘅休息方法。於是我就獨自踏上船~~~渦，食個一人蒸氣鍋啦。睇MENU見到都有唔同套餐，唔同餐海鮮種類同數量就唔同，我個人比較大食，又貪心，於是就揀咗八府巡按套餐，想食勻晒咁多款海鮮。佢嘅間隔設計真係幾得意嘅，會用竹簾間住啲位，雖然話可以多啲私隱空間，不過我一個人前面，左右都間住一塊簾就有啲焗~ 不過都唔錯嘅，可以係蒸嘅時間放空下自己，唔會見到隔離啲人，無咁尷尬。個set 三百零蚊，有成10款海鮮咁多，包括蟹，黃金蚌，蝦，鮮魚片，白蜆，鮑魚，貴妃蚌，元貝，龍蝦（半隻），聖子皇。又鮑魚又龍蝦，真係食得好豪啊。唔單只係海鮮，仲有自家製嘅特色點心，蔬菜拼盤，最後仲有粥底，食完粥底仲有雪條食。一個SET食落嚟，食得飽肚又滿足！我就覺得價錢唔多合理啦，咁多嘢食點解先$328？！哈哈，講笑。我當然係希望佢越平越好啦。有啲人會覺得一個人食飯好慘，我就唔覺啦，我覺得因為一個人食而求其食啲嘢，唔好好地食餐飯嘅人先係慘。（雖然食到最後發現自己無帶紙巾，無得抹嘴係有啲慘……）我想講嘅係，一個人都要食好啲，食豪啲~。…Read More