去婚宴都未試過食咁耐，第一次食手工私房菜，由19:30食到23:30。大家都食到超超超～飽。今次主題係印尼+土耳其菜，係好考時間同工夫又好特別既手工菜，等得耐都值得既。東主每道菜都會好詳細介紹，連phy chem bio都講埋，又會講下印尼同土耳其既飲食文化，好似上左堂旅遊特輯咁。佢仲講埋材料清單、作法俾你知，有興趣可以自己試做（道道菜都咁多工序時間，真係聽完都唔想做🤣）🍪香草帕馬臣脆餅沙律，勁好味，超級脆。配埋酸酸甜甜既牛油果蕃茄沙律，真係食到non-stop。加多加多，即印尼沙律，可以配米飯、米糕一齊食！加多加多係「混合」既意思，就係將時令既蔬菜、雞蛋、炸豆腐等混合而成。今次東主用左青瓜、芽菜和合掌瓜等。配上自家製的沙嗲醬，惹味可口。蘇門答臘全鴨古麗，鴨肉勁入味好鮮甜好冧，加埋大樹菠蘿真係食到😋（雖然都唔係好分到邊件係大樹菠蘿）👍🏻👍🏻🐬古法脆香拆釀奶酪鯖花魚，鄂圖曼帝國嘅宮庭菜。將加大碼的冰島鯖魚原條起骨削肉，要保持魚身原好無缺，否則不能釀入餡料。鯖魚一釣起立即船上急凍冰鮮，直到整既前一晚先解凍。東主話要將條魚撻好耐（好似要45分鐘），令魚既骨肉分離。削肉亦非常講究，太多太少都唔得。超費神既手工菜！我本身唔太好魚，覺得有少少腥，但滴些少檸檬汁就去到陣腥。魚皮非常薄同脆，配埋清爽酸甜嘅地中海式沙律，一流。🦑愛琴海灘畔懶洋釀烤烏賊，除左好好味都唔知仲有咩形容詞。烏賊嫩得黎又爽口，好有口感，中間釀既材料佢有介紹不過我邊有可能記得🙄總之好食啦。Dolmast，即係都瑪，係一種地中海菜好常見嘅做法，即係釀乜乜，釀鴨釀雞釀菜都得，佢地覺得香港煎釀三寶既魚肉茄子都係Dolmast既一種。🍕土耳其烤餅，我覺得佢應該同巴東牛肉一齊上，中和番。我就咁齋食，都覺得好味，因為我本身好鍾意食饅頭類既東西。招牌巴東牛肉，正宗的巴東牛肉係乾身，將醬汁炒至乾身，令醬汁焦糖化，完全黏在牛肉上。正宗的印尼巴東牛肉是超級辣的，東主話辣度大概5萬，胡椒噴霧大概5萬6辣度。東主為左遷就香港人，將菜式減辣，好似減左半以上，但我都覺得頗辣。配上印尼玫瑰花醬解辣，東主教如果你覺得辣，就直接食一小匙玫瑰花醬，甜可解辣。佢話無玫瑰花醬，用蜜糖都得。🌽印尼黃金粟米餅，好似話無加麵粉定好少麵粉，好脆好脆的，可惜當時我地已經勁飽。🐔香草乳酪雞，用乳酪煮雞。講起乳酪，東主話如果牛肉唔夠嫩，都可以搽乳酪令佢嫩滑d。個汁勁正，撈飯一流，不過我飽到無空間食一啖飯了。特別飲品都要預先order，我自己就叫左杯牛油果🥑奶昔，好好味好濃郁好杰。不過好飽😂黑色既係朱古力醬😈🐔梅爾辛紅飯釀烤嫩雞，好香好嫩既烤雞，皮脆肉嫩！東主話用左少量乳酪醃製，令雞肉纖維軟化，肉質自然嫩滑。飯吸收左雞既肉質精華，好鮮味，飯用香料煮過，加左番茄、紅洋蔥和紅燈籠椒等。東主話係印尼家常菜，媽媽為左令小朋友食飯同菜，將飯+不同既菜混合，釀入隻雞裡面。印尼人食米種類好多，唔係淨食白米，小米、泰國長米等都常食。東主原隻上俾我地望下佢個樣，再幫我地剪開。🎂鮮製千層牛油蛋糕一磅，我前排去完印尼，喺機場都買左個，但絕對無今次呢個咁好食！呢道甜品尾二上，大家飽到要企起身行黎行去中場休息😂本來個個都話好飽唔食，最多食一件試下，點知食完個個話好好食，勁飽都忍唔住食2-3片🤣東主話下午1點左右入爐，焗到7點先攞出黎！蛋糕大概係20層，好難形容嗰種感覺，又唔係海綿蛋糕咁空氣，但又唔係好煙韌。東主話原receipt好甜，依家減左一半甜度，我覺得剛剛好。雖然東主好好咁俾左材料份量我地，但大家食完都係問有無得直接係度買😆送嘅home made 法式雪糕有兩種味，岩鹽同咖啡冧酒。東主話，法式雪糕同平時食到嘅雪糕最大分別就係無水份，唔係用牛奶，係用忌廉去打（超肥🙄），而且唔打空氣入去，一定要用雪糕機打。我叫左岩鹽味，我未食過咁滑咁重奶味既雪糕，好綿密，每一啖都好有份量同好邪惡🙈。仲有🍓送飯後健康水果：車厘子、蘋果、奇異果。…Read More
