zero_qoo's Profile

喺韓國食過，今次首次來港當然要一試，十一點半去到已經有唔少人，11點55分開始叫入坐，入到去地方闊落企理，我地點一小時88蚊任食再加30蚊爐邊芝士，等主菜同時就不停食任食區食物，炸雞，牛肋骨，炒粉絲，炒豬肉不停供應，夠熱，味道唔錯，飲品選擇都多，但食咗半個鐘主菜仍然未有，時間只淨30分鐘，同職員講，原來漏單，不過職員都好有禮貌話補番時間俾我地，主菜終於到，好大兜，職員幫手煮，好熟手，雖然落咗醬料，但雞肉同拉麵味道偏淡，但芝士就超咸，不過夾埋啲雞肉食就唔錯，而且份量夠多，食到一半有職員叫我地埋單，於是同另一職員再講你地漏單我地怕食唔切，不過職員好有禮貎叫我地慢慢食，一定會補足夠時間俾我地，呢方面真係值得加分。 最後食埋雪糕，雪糕味道尚可，但我嗰杯未食已經有少少溶，不過我都食晒，好彩最後冇事，總括都唔錯，會再一試。…Read More

路過見有新店而且又未食lunch於是開開心心走入拉麵店，入到去冇人理我，企咗一陣有個人行過嚟大嗌NO NO SORRY NO NO，再用打發我走嘅手勢叫我離開，搞到當時所有食客都望住我，我唔知發生咩事就出番去，原來下午3時係落場時間，當時係下午3時05分，我都冇心特登走入去，不過已經俾佢嚇到唔想再去……Read More

見到啲甜品好吸引，雖然要排隊但都一於試吓。 入到去安排我地坐大枱角位，好逼好辛苦，但又想食所以照去……最後遲我地入嚟嗰3隊人(佢地全部都食芭菲)食完走人我杯芭菲都未到(前後等咗四十分鐘)，我都算好脾氣，催咗3次都話整緊，我都唯有照等，終於等到，但好失望，第一眼望落已想退貨，因為杯嘢溶得好利害，好似擺咗好耐咁，味道好普通，最慘身為芭菲但都完全唔凍，果凍冇味，士多卑梨酸，不過脆米及豆腐都ok，但成80蚊，食過一次就算………Read More

第一次寫食評，因為真係頂呢間嘢唔順。同阿爸細佬路過呢間嘢，見倒間舖幾特別，門口好多明星相我又鍾意食辣，於是入去試吓，望吓嗰餐牌見啲價錢都唔平，心諗又唔係成日食所謂啦，細佬叫個HK$5X咖哩飯，我就叫個唔知咩麻辣米線，門口仲大大隻字寫住食嗰種米線又於指定時間(廿分鐘內)內食晒就可以免費，食之前問個伙記佢都仲話指定時間食晒係免費，於是我就試一試挑戰吓，我只用了12分鐘就食晒仲立即同個伙記講咁係咪即係免費(心諗其實碗嘢唔算好貴就算冇免費都冇所謂啦，我只想知嗰伙記會點處理)，但兩個伙記竟然扮失憶，問咗佢地兩次又扮聽唔倒，又唔肯答我係咪免費，咁我見佢地扮晒傻所以費事繼續再問，走嗰時當然全數埋單，事後問細佬啲咖哩飯好冇食，佢先話未食過咁唔好食嘅咖哩，咖哩又唔夠香，呢個價錢一啲都唔值，大家樂都好食過佢，所以我永遠、以後、呢世都唔駛旨意會再去…Read More