julie daily's Profile

今晚又凍又落雨想快快手解決晚餐衝返屋企煲劇，經過雲家見唔算太多人排隊，就佢啦！！叫咗一碗雞絲螺旋藻小鍋米線麻辣中辣走酸菜($49)，另一碗係腩肉少鍋米線麻辣小辣)($41)，注意小鍋米線叫唔辣係會自動走肉碎㗎，有辣先有肉碎。湯底好香好惹味，辣得有層次，勁多配菜，加埋超多肉碎，如果唔想叫餸，齋小鍋米線都夠正($31)。兩碗米線面底都好大個，男人食都夠哂飽，三款餸份量好多，唔會食到一半無哂餸。最中意食個腩肉，醃到好鹹香入味。$4x一碗米線又好食又大碗，性價比高過x仔好多。------------------------------值得一讚嘅係，雖然係小店又好多客，見啲員工極忙，但仍然好有禮貌…Read More

今日咁啱喺屯門嗰邊收工，車媽咪去試一間佢朋友推介嘅元朗泰國菜，如果唔揸車最好搭巴士或者小巴，或者由錦上路站轉的士。------------------------------一去到已經好有feel，位置好大，有好多白色帳幕同閃閃燈，有室外同室內位置，中間仲有一條小河有一啲小象同佛嘅裝飾，感覺幾寫意。------------------------------餐廳係用QR code落單，望咗望個餐牌，價錢中上，天氣凍凍，我哋就叫咗一個椰子雞湯，可以選擇辣度。煲湯都幾大份，四至五個人飲都得，我哋兩個人就每人飲咗三碗左右。值得一讚嘅係，呢個係我飲過嘅椰子雞湯入面最好飲嘅一次，甚至比喺泰國飲嘅更好飲，因為佢嘅酸甜到好適中，唔會搶味，飲落口好滑又濃，加上微微嘅辣度，超級保暖，湯入面仲好足料，有好多舊嫩滑雞肉同各式各樣嘅菇菌類。------------------------------主食方面我哋叫咗一個紅咖喱豬肉，媽咪叫咗一碗白飯，我叫咗一個果仁雜果印度薄餅。紅咖喱好重椰奶味，係我哋好鍾意嘅杰杰質感🤤 最正嘅係入面仲有好多菠蘿粒同荔枝果肉，咬落去好爽甜但係又有紅咖喱嘅香味，好特別。成餐飯令媽咪驚喜嘅係個印度薄餅，六大塊都只係$48，咬落去煙靭軟綿，口感超正，食到唔少奶酥味同埋果仁碎😳，香香甜甜，就咁食已經好好味，配埋紅咖喱豬肉就更加惹味，結果到最後我哋都食唔晒，外賣咗3塊薄餅返屋企。------------------------------另外仲叫咗一個鹹魚炒芥蘭，鹹到適中，🐟鹹魚粒好大粒好過癮，芥蘭都好新鮮好嫩。------------------------------整體嚟講，食完之後發覺真係物有所值，仲幾抵食，好想試埋佢其他泰國菜，下次再喺新界西收工一定會再嚟。買單時記得留意埋餐廳做緊OpenRice優惠，可以即買現金券即場用，用$85買$100面值嘅現金券，我哋用咗三張慳咗$45🤩🤩…Read More

之前已經食過呢間餐廳喺牛頭角嘅分店，環境好有feel，今次相約同事聚餐，就揀咗更就腳方便嘅黃埔分店，環境一樣咁chill，好適合幾個朋友傾偈食嘢。------------------------------我哋一行三人，總共叫咗一個小食加三個主食，包括避風塘雞翼、葡式香辣燒春雞配薯條、海鮮香草pizza同燒大蝦三文魚籽龍蝦汁扁意粉。------------------------------避風塘雞翼好香脆，勁多炸蒜粒，少少香辣好惹味。------------------------------葡式香辣燒春雞配薯條比想像中大份，雞烤完都仲保留到肉汁，好嫩滑。------------------------------海鮮香草pizza好足料，啖啖都係三文魚同海鮮，餅底厚身煙韌有口感，芝士都落得足，滿足同行嘅芝士控同事。------------------------------我個人最愛燒大蝦三文魚籽龍蝦汁扁意粉，好重龍蝦味，大蝦又彈牙，差唔多一個人食哂半碟🫢…Read More

適逢元宵節，同男朋友仔即興想打邊爐，六點幾打電話去竟然成功book到八點半😍------------------------------今次係我哋第二次嚟別忘了，上次試咗個藥膳湯底，今次就揀一個招牌麻辣鍋加椰皇雙子鍋，一紅一白嘅湯底一上枱已經好吸引，先飲咗一啖椰皇湯，有少少似椰奶，唔同平時清清地椰子雞嗰種，反而更滑更香濃，我同男朋友仔都覺得好驚喜😍用嚟烚菜烚肉都好好食。而另一個招牌麻辣鍋，辣得來好有層次，超級香，連平時唔係好食得辣嘅我都忍唔住不停夾😂肉類方面我哋揀咗最抵食嘅餐，因為我哋其實都唔係食好多肉，牛板腱嘅質素真係好好，而西班牙豬梅肉亦都好爽滑彈牙。肉類、小食、甜品、餐飲等等都係用電話QR code落單，好方便，仲可以每人攞一隻蘭王蛋㖭😍------------------------------自助有唔同嘅蔬菜、丸類、面類、豆製品等等，最驚喜係有紫色嘅蘿蔔同埋好新鮮嘅紫色羽衣甘藍，而牛丸仲係爆汁嘅，我哋食咗好多粒🤭------------------------------別忘了嘅台式小食都好正，除咗有鹽酥雞同台灣腸，仲有花雕醉雞，花枝丸等等，我哋全部都叫咗兩轉，質素唔錯。------------------------------除此之外，仲有10幾款任叫任飲嘅台式飲品，我最鍾意嘅就係檸檬冬瓜茶同埋鮮果茶，另外仲有珍珠奶茶，全部都沖得唔錯唔會太甜。------------------------------最後點少得甜品呢？男朋友仔叫咗其中兩款嘅雪花冰，可以一次過滿足佢想食芋圓同埋仙草嘅願望，我就試咗紅豆窩夫，窩夫勁重蛋味外脆內軟，而蜜紅豆同窩夫都好夾，果然食甜品係有另一個胃😂最後我哋再各自叫咗一個Movenpick嘅雪糕結尾，實在太滿足啦。…Read More

今日朋友帶咗我去一間佢成日食嘅西餐廳，佢話性價比極高，仲有我最鍾意食嘅黑毛豬，一入到餐廳環境好舒服，係半開放式可以望住出邊嘅街道好chill咁食lunch。今日朋友帶咗我去一間佢成日食嘅西餐廳，佢話性價比極高，仲有我最鍾意食嘅黑毛豬，一入到餐廳環境好舒服，係半開放式可以望住出邊嘅街道好chill咁食lunch。我叫咗一份西班牙黑毛豬肉眼，$135包一杯餐飲，餐湯要另外加$10。order食物後好快就上碟，厚厚嘅黑毛豬切成幾大塊，未放入口已經望到充滿肉汁，咬落去果然好Juicy，完全冇煮過龍，配搭菠蘿杜卡香料醬，口味好夾完全中和哂油膩感😍 其他薯菜都好新鮮，最驚喜係個粟米蓉，平時食薯蓉就食得多，呢個粟米蓉真係好特別又滑又香濃同行嘅朋友叫咗個海陸大餐，有牛扒有魚有蝦仲有三文魚沙律，視覺上好豐富。朋友分咗一小件紐西蘭西冷牛扒同炸鱈魚俾我試食，西冷牛扒好重牛味又軟冧，炸鱈魚絕對係我嘅至愛，啱啱炸起入口仲係熱辣辣，魚肉好爽口勁香，絕對食得出唔係平價嘅鯰魚柳。總括嚟講，今次嘅用餐體驗好輕鬆好食，而且兩個餐點價錢都好合理，因為用料真係唔錯，廚師嘅火候都控制得唔錯，下次經過炮台山都有興趣再試。…Read More