N183L's Profile

今晚約咗幾個舊同學聚舊，其中一個話想食韓國野，另一個話想打邊爐，於是揀咗呢間韓式火鍋放題。我地Book咗位，所以唔駛等。如一般放題，限時90分鐘，都算合理嘅。由於其中一個Friend唔食辣，我地order咗牛骨湯底，由於我地全部人都係牛魔王，所以揀咗每位$178嗰個肥牛套餐。呢間放題火鍋同一般放題火鍋店有啲分別，客人係唔需要自己寫order紙， 除咗牛、豬、雞、魚肉類之外，其他食物都係响自助Bar枱，呢個安排都幾好，好有自助餐Feel，鍾意食乜就攞乜。牛骨湯底唔多覺有牛骨响裡面，不過味道就唔錯。我地點都估唔到，响自助沙律Bar可以揀到西式沙律菜，值得一讚！肥牛肉片及豬肉片都幾新鮮，丸類及菇類亦不過不失，與其他放題火鍋店無異；反而，有一些特式的食品：豬大腸、韓式年糕、豆卜串、泡菜餃等等，有一定水準，沒有令大家失望。甜品方面，除咗普通的蛋糕之外，值得一提，佢地有一部自助乳酪機，可自選配料及糖漿，夠晒gimmick！埋單連埋加一每人$200有找，都幾抵食，可以再黎。…Read More

今日同個Friend去又一城Shopping，行到差不多Lunch Time，嗱嗱聲揾地方醫肚。由於今日係星期日，大概1點鐘，好多食肆都要等位，眼見呢間西餐廳唔駛等位，諗都唔諗就入咗去。我地order咗兩個Set Lunch，分別係莧菜汁龍利柳飯同埋燒汁烤豬柳扒飯。餐湯揀咗1紅1白湯；羅宋湯味道不錯，湯料亦很豐富，亦不太油膩；忌廉湯就麻麻地，唔太夠creamy，配料略少。主菜方面，個莧菜汁mix得幾好，唔算太杰，都幾creamy；龍利柳好大塊，分量十足，咬落亦無淋晒。至於個豬柳扒都好大塊，肉質鬆軟，但係個燒汁就冇乜特別。兩個人埋單$200幾蚊，價錢算合理，但食物就冇乜驚喜，不過環境就唔錯嘅。…Read More

跟女友去黄埔探完朋友，順道响附近揾野食，佢話想鋸扒，就揀咗黄埔呢間Outback Steakhouse。撞啱今日係星期六的緣故，要响門口等咗成20分鐘先可入座。我地order咗凱撒沙律配忌廉蘑菇湯，肉眼牛扒拼豬肋骨同埋牛肉漢堡。首先，黎咗一條贈送嘅餐飽，都幾鬆軟，唔錯！凱撒沙律就比較普通，麵包粒唔脆，啲菜都算新鮮，不過個醬好鹹，好彩係另上啫！忌廉蘑菇湯又係超鹹，飲兩啖已經再飲唔落去。接住嚟主菜，肉眼扒我地order咗5成熟，但係煎到好似全熟，好乾，冇乜肉汁；豬肋骨好淋，不過又係略乾，唔夠Juicy！反而個牛肉漢堡叫做合格，夠晒件頭，塊漢堡扒都幾Juicy，啲薯條都幾crispy。呢餐我地覺得好壞參半，有少許失望！…Read More

今日放假同女友去 “The One” shopping，行到有啲肚餓，女友話想High Tea，就黎咗呢間人氣cafe，出奇地唔駛點樣等位，排咗一陣就有位喇，可能係閒日的關係。我地order咗草莓繽紛冰淇淋鬆餅，個鬆餅有啲淋淋地，士多啤梨酸咗啲，不過舊雪糕幾好食，同埋啲syrup都夠甜！另外嗰個草莓蜜糖吐司，吐司焗到暖暖地，舊雪糕好大個，如果多啲士多啤梨會仲好啲，啲蜜糖淋落去個吐司到都幾夾，幾好食！總括來講，不過不失，價錢略貴。…Read More

今晚約咗女友响尖沙咀睇戲，女友話想食Pizza，行經呢間餐廳，見唔駛等位，就入去試吓啦！我倆揀咗張Corner位座，呢度燈光較暗，又有背景音樂，都幾適合情侶撑枱腳嘅！由於趕住睇戲關係，我地order咗個2人套餐，頭盤好似係火雞片沙律，塊火雞片食落好似夾麵包啲火腿，冇乜特別，反而個黑醋汁幾酸吓，都幾醒胃。個湯係甘筍忌廉湯，好重甘筍味，都幾creamy，不過不失。主菜個海鮮燴飯就麻麻地，冇乜配料，同埋啲飯煮得唔係太夠淋，好彩都夠多汁。反而個煙三文魚Pizza有啲驚喜，個餅底係薄批，似係手打嘅，幾脆口，啲芝士亦都好多，咬落有芝士絲，三文魚略咸，不過都算唔錯。甜品係芒果奶凍，食落有啲似芒果布甸，都ok嘅！餐飲叫咗兩杯橙汁，飲落好似果X先生，不過都好過橙汁汽水嘅！埋單兩人夾埋300幾蚊，都算抵食，都可以接受。…Read More