foodaholic_yumyum's Profile

上次同女友黎食完之後一直都好回味, 所以今次黎開九龍城就帶埋屋企人黎試下, 人多可以叫多幾款野食嘛！1）遊船河 呢個係上次叫左好味今次再encore 既！果然無令我失望, 同上次一樣咁好味, 湯底好濃郁, 而且呢度既河粉好粗身好特別, 平時好少地方食到。2) 馬拉盞炒通菜冬天其他餐廳好少有通菜食, 見到呢度有梗係即刻order 啦！d 通菜好新鮮翠綠, 一上菜既時候好香, 但炒得有少少油, 鍾意食濃味野既我就覺得馬拉盞味唔算好濃, 反而爹哋媽咪就覺得味道啱啱好。3) 椰汁咖喱牛肉呢個咖喱好香椰汁味, 甜甜地得黎帶少少微辣, 好啱送飯, 而且牛肉都有好多片, 我地仲特登嗌多左份印度薄餅去送咖喱4) 鐵板煎蠔仔蛋呢個餸真係超級驚喜同超抵食, 個蠔仔蛋超足份量, 大過塊面而且佢係放上一個熱辣辣既鐵板度, 超級香, 加埋附上既既甜辣醬, 不禁令人一吃再吃！不過提提大家一上菜時要即時撈起, 如果唔係會痴鐵板同燶,而且佢下面仲舖左好多芽菜, 聽媽咪講話連埋一齊食可以無咁熱氣喎。最後我地叫左咁多野食都係300蚊左右埋單, 係香港黎講真係好經濟, 推薦大家黎開九龍城一定要試下, 支持小店…Read More

想同媽咪打邊爐慶祝生日, 食量唔大所以唔想去食任食,咁啱上網見到呢間老百姓火鍋既評價幾好, 一於訂位去試下！咁多湯底入面, 媽咪話對滋潤百姓湯有興趣, 因為慶祝生日既緣故食豪dd 個湯底一上菜既時候令我地都十分驚喜, 因為成個湯底真係用雞去淆出黎,而湯料方面真材實料之餘一d 都唔吝嗇, 所以計返其實湯底既價錢(HKD338) 都算合理,除咗半隻雞外(佢係未斬開咁上既, 品嚐完湯底後店員就會幫你夾上黎分左佢, d 雞肉淆得冧得黎又唔會老)仲有大大片既花膠同埋滋陰既響螺頭(每樣都起碼有六粒左右) 至於另一種配料哈密瓜雖然唔係咩”名貴”野,但同個雞湯係出奇地夾！佢吸收晒湯既精華, 加埋佢自身既甜味同冧冧地既口感,不禁令人一吃再吃！所以我地每人都飲左2,3碗湯先捨得開始打邊爐🤩另外值得一提既係廚師係相當細心, 通常煲雞湯一定有雞油浮面, 但廚師預先隔左油先上鍋, 方便食客之餘又可以吃得健康！跟住我地就開始打邊爐啦!1)頂級安格斯牛頸脊 (細) 我地order 左細份, 但都夠3-4人吃, 佢既雪花紋好靚好平均, 肥瘦適中, 而且肉味濃得黎有口感, 值得推介！2)黑松露墨魚丸應該係用墨魚膠加黑松露醬自家製而成既, 裏面有細細粒既墨魚肉，有嚼勁得黎亦爽口, 仲有淡淡自然既黑松露香, 估唔到黑松露同墨魚膠係咁match!3)自家製四拼餃分別有黑松露餃, 水餃, 雲吞, 同韮菜餃, 可以一次過試晒4款手工餃粒粒都包到脹卜卜, 水餃同雲吞都有大大粒同有爽口既蝦包係裏面,好味！4)蔬菜什菌拼盤貪佢有齊幾款菇同菜得黎每款份量唔會太多，都算新鮮!5）蜂巢凍豆腐 & 6)芝士腸正正常常, 無乜特別啦, 始終係一般現成火鍋配料。整體黎講我地都好滿意呢一餐除左食物有質素外, 環境都幾好,冷氣夠, 唔會愈打愈熱, 而且抽風系統都ok , 打完個身無成陣味！不過我地因為唔知個湯咁足料所以叫多左少少配料, 建議大家可以先點住七八成想食既火鍋配料, 不夠再加單, 避免浪費嘛😝…Read More

見呢排疫情無咁嚴重就開始約朋友出黎食下飯聚下，因為同友人都係紅磡返工又想食下中菜, 所以就揀左位於尖沙咀既翠林辣蟹坊。上到餐廳後發現有好多既小菜都做緊半價優惠(半價優惠菜單上show緊既係正價）。咁我同友人就一於師奶仔既精明心態,叫三個有優惠既餸試下, 食豪dd ！1）避風塘香辣蟹黎到呢度梗係要嗌隻蟹歎下啦🦀🦀隻蟹擺得相當架勢, 一上枱時我同友人都比佢既”霸氣”震懾左, 紛紛相機食先, 即刻打卡呃like! 📸同埋佢無因為做緊半價優惠而將價就貨, 隻蟹既size 相當大,係貨真價實既肉蟹, 我地兩個人一人食半隻都食得超級滿足！碟蟹用左好多既炸蒜, 十分之惹味, 同埋廚師都相當細心, 幫我地扑過d 蟹, 令我地唔需要好費力都可以啖啖肉咁享受隻蟹！佢調味調得好岩大眾口味, 就算唔食得辣既朋友都一定接受到！2）XO醬炒龍躉呢間辣蟹坊唔止蟹煮得出色, 中菜亦煮得相當好味！我平時好怕魚唔新鮮有陣腥味, 但我食得出呢個龍躉片係由新鮮魚肉拆出黎, XO 醬又唔會太濃, 令碟餸有味得黎又唔會蓋過魚本身既鮮味, 荷蘭豆又係炒得岩岩好, 十分爽口3)金絲酒槽骨呢個餸比較特別, 係平時既中菜館比較少見, 應該係用糯米酒秘製而成既, 有dd 甜甜地既味道, 而且佢係用左肥瘦適中既排骨, 口感鬆軟, 令我同友人都忘晒形咁不顧儀態咁用手品嚐呢間翠林辣蟹坊真係好有驚喜,食得好滿足, 我地嗌既份量應該夠三, 四個人食, 不過見少出黎食飯就放縱下啦同埋值得一讚既係呢度既侍應好有禮貌同細心, 我同友人食完留喺餐廳吹水, 侍應仲主動咁重新幫我地泡過壺熱茶 (唔係淨加熱水咁簡單) , 仲會問我地d 餸菜啱唔啱口味, 好有heart!呢間餐廳十分就腳, 價錢又合理, 餸菜好味得黎亦好足份量！我下次一定會帶爹哋媽咪同其他朋友再黎呢度試下其他新菜式…Read More

假日同女友睇完戲想鋸下扒,6點半左右就到左餐廳,可能時間尚早,入面暫時唔算多人, 所以我地唔洗等就有位坐, 但我地見到陸續有人walk in 但店員都話full booking, 所以有心黎食既都係訂定位穩陣d。呢間係繼上環普慶坊店之後另一間新店, 餐廳環境乾淨企理,燈光好有格調, 侍應態度殷勤有禮,雖然面積唔算大但好有隱世小店feel:)我地點左以下菜單,值得一讚既係佢地出品速度十分之快之餘, d 菜都係熱辣辣即叫即煮。美式煙烤豬仔骨賣相十分吸引,豬仔骨煮得岩岩好,可能因為係慢煮既關係, 肉質鮮嫩,加上用左BBQ去烤,味道好match, 忍唔住用手拎住大啖大啖咁食安格斯頂級平鐵扒牛扒煮到7-8成熟, 一切之後即刻有d 肉汁流出黎, 好juicy, 廚師亦加左適量既蒜鹽同埋黑胡椒去調味, 味道同賣相都好！無諗過咁經濟既價錢可以食到咁有質素既牛扒炸番薯條炸得好好食呀,外脆內軟,又甜甜地, 不得不提果個黑松露醬,將薯條沾上醬再一齊食,風味極佳,口感豐富,如果再比多dd 醬就好啦!蟹肉三文魚沙律食番d菜先,精選蟹肉同煙三文魚撈埋生菜,配搭新鮮又健康,而且三文魚同蟹肉既份量相當多，夠3-4個人share澳洲檸檬青檸特飲用左澳洲檸檬果然唔同,氣味清新,甜度適中,夠哂refreshing!總的來說,呢間餐廳出品唔錯,可以專程去試下佢既扒,不會失望而回！…Read More

今日同女友去開觀塘整野, 見天氣熱無乜地方hea 就諗住去試下工廈d Cafe悠閒下食下野, 見呢間Urban Cafe 咁多好評就一於試下啦！好彩我地預先book 左枱姐, 去到見到門口企滿晒人, 如果無book 定枱walk-in 就未必有位啦！我地order 左個2人set, 再加多左個小食(水牛城雞翼)試下。1）沙律+南瓜忌廉湯 D 沙律菜好新鮮, 加埋酸酸地既汁, 十分開胃平時去一般其他西餐廳或者cafe 叫忌廉湯十次有九次都中伏, 大部分都係用粉開既水咁,得個白色同”結”,但完全無味。但呢度既南瓜忌廉湯就令我十分驚喜, 因為加入左好多南瓜蓉，真材實料, 味道亦調得啱啱好。2a)即磨芝士黑松露菠菜大啡菇忌廉意大利飯呢個飯一上枱已經傳來陣陣黑松露味, 熱辣辣, 值得一讚既係呢碟飯既黑松露味好自然, 飯亦煮得煙煙韌韌, 雖然用上芝士同忌廉, 但一d 都無果種好heavy 好滯既感覺, 女友亦讚口不絕2b)安格斯牛肉手工竹炭漢堡配脆薯個竹炭包既外型好得意, 係炭黑色, 味道就同平時d 包一樣。呢個漢堡包既份量十足, 塊牛好厚好juicy ,入面既番茄同生菜都好新鮮, 加埋d 汁同半溶既芝士, 至於d 脆薯亦都係新鮮炸起, 卜卜脆, 同漢堡包簡直係perfect match!3）水牛城雞翼雞翼係新鮮炸起, 熱辣辣, 水牛城醬唔會好辣, 啱晒一般大眾既口味！4a)凍檸茶凍檸茶茶底ok, 甜度適中, 有茶餐廳既水準！4b)藍塘乳酸雲朵沙冰呢杯飲品既外貌勁吸晴, 係大部分女仔都愛既baby blue, 打卡一流！女友見到都即時心心眼味道就係酸酸甜甜既乳酸沙冰, 飲完之後透心涼！值得一提既就係呢間餐廳仲有多🐱🐱駐場, 除左可以價錢合理咁享受美味既一餐之外, 仲可以同呢度既貓貓玩, 難怪吸引到咁多人黎幫襯啦！…Read More

星期五喺灣仔放工,大約7點幾,見一虎拉麵冇乜人,又好耐冇食拉麵,所以選擇呢間。店舖環境乾凈企理,店員有禮貌地幫客人量體溫同埋安排座位,可惜店入面冷氣唔夠,愈食愈熱:(我叫一個普通一虎拉麵,點知咁啱撞正網上外賣平台有人叫外賣,而且係大單,個師傅就整左外賣先,搞到我要等一段時間,可能因為成間舖只得一個廚師一個夥計,人手似乎不足。等左一段時間後,拉麵終於上枱啦,我先飲啖豬骨湯,味道尚算ok但好“傑”,湯温又唔高,碗麵入面仲有爽口木耳（很爽口）,蔥,很薄很普通的三片叉燒,及流心蛋,個人認為湯温本身溫度不足,仲要比d配料吸哂d熱度,碗麵真係麻麻地喎,同期望有落差總括而言,以一碗$95既拉麵,性價比唔高,有d失望,希望可以改善…Read More

今日又去左紅磡做野, 因為疫情既緣故都唔敢出去食堂食, 唯有去紅磡國際都會既美食廣場買外賣。一入去門口, 就會見到一間和風裝修風格既壽司大大, 見到佢做緊D 49蚊Lunch Set, 包一個麵食, 幾件壽司同埋飲品,好似幾抵咁就試下啦! 壽司方面仲可以根據自己既喜好自由配搭, 可以選擇魚生, 熟既, 或者係素既, 照顧到唔同食客既需要。一返到office 打開外賣, 令我十分驚訝, 估唔到一個50蚊都唔使既午餐竟然會包裝得咁細心,我叫既係D Set, 廣島蠔同烏冬係分開裝. 以防炸廣島蠔會比D湯浸到淋晒, 另外湯碗仲包左一個透明膠袋, 為免湯會倒瀉整爛裝住食物既紙袋。一打開個湯烏冬, D 煙仲飄緊出黎, 睇得出係新鮮煮出黎, 個湯仲係好熱, 要放係室溫一陣先放到入口, 至於烏冬則係我至愛既煙韌口感, 醬油湯既味道適中, 唔會偏咸偏淡, 好味!廣島蠔亦都係新鮮炸起, 好酥脆!壽司方面我揀左鹽燒三文魚2件, 蟹柳同熟蝦, 始終依家疫情嚴重, 唔係好敢食太多魚生。壽司既質素亦係相當唔錯, 有一般大型中價位既連鎖壽司店既水準!今次既午餐真係令我十分驚喜, 難怪呢間小店既食評都係清一色好評!我下次一定會再幫襯, 試下其他麵食同壽司!…Read More

每次當我係紅磡食晏, 又想歎返杯香滑既奶茶既話, 我一定第一時間諗起 1仔冰室 。聽講好似坐鎮係呢度既師傅曾經拎過沖茶大獎, 所以絕對係信心既保證。今日我又同朋友去左 1仔冰室開餐, 貪呢度奶茶好飲之餘, 午餐亦有相當多既選擇, 可以遷就到唔同朋友既口味。而且佢每日既午餐都唔同, 就算一個禮拜黎食兩三日都唔會怕悶怕重複。今日我地就分別叫左 1) 豚肉生薑燒飯 2)土魷蒸肉餅飯。1) 豚肉生薑燒飯雖然呢度係港式茶餐廳, 但呢個日式豚肉飯絕對唔失禮。佢D豚肉係半肥瘦, D油香佈滿左成個飯, 再加埋惹味既生薑燒汁同埋舖在上面木魚片, 感覺尤如日式餐廳既便當, 十分有驚喜!2) 土魷蒸肉餅飯 肉餅既份量都唔細, 可能佢用左半肥瘦既豬肉, 令到成塊肉餅既口感彈滑, 加埋上面既蔥花同豉油既點綴, 令整體既味道昇華到另一個層次, 送飯一流! 難怪平時食量比較細既朋友都可以食晒成個肉餅啦!最後, 當然要歎埋杯香滑既奶茶啦! 呢度既奶茶水準一貫的高, 茶味夠濃得黎又唔會澀, 加入奶後令口感更滑, 但又唔會掩蓋到茶香味, 黎食1仔冰室既朋友一定唔可以錯過呀!…Read More

喺疫情肆虐期間,都係買外賣安全D,今日就去左位於灣仔廈門街既福膳便當買午餐食,呢間舖門面普通,好低調,內裏裝修簡約,見到唔少日本擺設,例如招財貓,廚房亦都好乾淨,觀察一會之後發現佢地店員全部都係日本人, 因為佢地用日文溝通,但係收錢果位姐姐就識講廣東話。食左best-selling既南蠻雞便當再追加一塊薯餅,總共84蚊,唔算平架,但便當包裝企理,飯既份量適中,係用左日本米,雞塊都嫩滑既,最好味係佢加左他他醬同埋甜醋,有汁撈埋好食好多,牛肉薯餅則炸得岩岩好,卜卜脆,亦夠厚身,幾好味架整體感覺唔錯,呢間舖主打用日本米+日本廚師+新鮮製造既便當, 下次都會再幫襯！…Read More

星期日和女友去食大壹燒鵝,午餐時段都尚算多人,門口都多人排隊等買外賣,我地等左一陣就有位,十分幸運！餐廳環境尚算光猛企理,基本衛生條件不錯,侍應姐姐殷勤有禮,冷氣充足,亦可以用八達通結帳。叫左一個燒鵝飯同埋一個乳豬燒鵝雙拼飯,加埋一杯熱奶茶及一杯少甜凍檸茶,加埋129蚊,價錢尚可接受。乳豬真係燒到脆卜卜,中間夾左層豐厚軟綿既肥豬肉,配埋汁醬一齊食落口,本人覺得十分滿意,連不愛食肥肉既我,都唔會抗拒,大口大口咁食,盡情享受燒鵝皮脆,肉汁都不錯,佢咁啱切到鵝脾位,所以唔使加錢都有脾食但本人略嫌鵝肉少左d,如果鵝再大隻小小就好了, 不過呢度既鵝一向都唔算好肥, 所以感覺上無咁邪惡凍檸茶同奶茶都係一般茶記既水準總括而言,本人十分滿意呢間食肆…Read More

因為疫情緣故,決定同同事一齊係公司叫外賣,避免出外用餐。因為天氣熱而且無乜郁動,成個人都飽飽滯滯,所以就決定食素 - 三杯杏鮑菇飯加黑糖珍珠奶茶。三杯杏鮑菇飯雖然配料簡單, 但其實都幾考功夫, 因為始終菇都係比較容易出水, 我係屋企試過煮過幾次都係失敗告終！但呢間古早味既三杯杏鮑菇絕對無令我失望！佢既杏飽菇煮得好入味, 個芡都好濃味送飯一流! 至於菇既表面雖然煮得乾爽香口, 但入面卻是十分juicy! 菜式簡單既充滿驚喜！黑糖珍珠奶茶因為外賣關係送到黎d 冰都溶晒，但反而溶晒冰之後甜度適中, d 珍珠都好煙韌,好味同埋呢排疫情關係, 少左係街除口罩飲台式飲品,依家午餐包埋就啱晒lu!…Read More

今朝去馬鞍山新港城既泰巷食早餐,呢間係我其中一間好鍾意去食早餐既地方, 貪佢環境乾淨企理, 坐得舒服。而且呢度既早餐可以話係港式早餐加泰式食品既fusion,除左有一般既炒蛋煎蛋多士外,仲可選配遊船河或者冬蔭公公仔麵, 價錢都係三十幾蚊左右,十分合理！今日我就嗌左我至愛既手撕雞冬蔭公公仔麵, 碎蛋沙律多士同埋凍既泰式奶茶。我黎親呢度都會叫碎蛋沙律多士, 因為其他茶餐廳一黎比較少呢個揀, 而且我對呢間食店既衛生情況比較有信心! 呢度既碎蛋沙律份量唔少, 味道正常, 佢仲配有番茄同沙律菜, 感覺清新健康！手撕雞冬蔭公公仔面呢度既冬蔭公湯底應該唔係用即食麵湯粉沖開既, 而係用原料自己煲出黎, 因為成日都見到有d 湯渣係度。呢度既冬蔭公酸辣度啱啱好, 唔會好辣, 適合一般大眾口味！凍泰式奶茶我黎親呢度都會加3蚊轉凍飲, 因為泰式奶茶只限凍飲。黎到呢度梗係要揀泰式奶茶啦,其他地方少機會飲到嘛, 而且佢沖得好滑, 甜度適中, 大家黎到都不妨試下啦！…Read More

位於灣仔廈門街既魚八日本料理,門面唔算大,外表相當樸實,毫不起眼,係灣仔返工既我平時都會經過,但冇入去,趁今日星期五happy firday,我一個人行入去幫襯下,試下好唔好食先初初以為佢好細間舖,得一張長bar枱,原來佢入面仲有位架,仲好似有兩層,長bar枱上面放滿各式各樣既日本清酒,店入面播放日本音樂,環境簡約舒適,好似去左日本咁！侍應亦好有禮貌帶我入座點左一個鰻魚飯午餐再追加蟹籽沙律,首先端上枱既係麵豉湯,湯底唔錯幾好味,等左5分鐘左右,侍應再拎左個小小既黑色餐盒上黎,原來係鰻魚飯,真係好驚喜,鰻魚燒得幾好味,油脂分佈均勻,有小小焦香,送飯一流由於為個盒其實好細,份量未必滿足大食既朋友仔,不過條鰻魚確實幾大條同肥美,又冇乜骨食埋蟹籽沙律同甜品（一口紅豆雪米磁）,剛好1點,即刻叫埋單！因為1點前埋單有85折,呢餐食左約120蚊,算係值回票價！總括而言,魚八係一間充滿日本風味既隱世小店,值得一試…Read More

平時當我想食日式鐵板燒既時侯,都會諗起紅磡既出羽櫻。平時一般鐵板燒人均都要3-400蚊以上，但出羽櫻既鐵板燒lunch set 最平只需要72蚊，仲要包面鼓湯,沙律, 白飯(如果個餐本身無炒烏冬）同飲品。雖然價格十分經濟,但食物卻是十分有質素！每次黎到出羽櫻,我都會選擇坐bar 枱,因為廚師會係你面前親自為烹調你所點既食物, 七十幾蚊既價錢你除左可以享受香噴噴既美食外,你仲可以欣賞到廚師既廚藝, 真係一個好正既體驗今次我就叫左竹餐, 鐵板鯖魚可以免費改成三文魚骨腩。我想講每一種食物都好好味。牛肉薄燒燒到啱啱好,唔會過生過熟，加埋入面d 蔥同蒜真係超級惹味。至於三文魚骨腩, 雖然係d “頭頭尾尾”既部位，但原來燒出黎係超有驚喜！師傳將d三文魚骨腩燒到好乾, 脆卜卜, d 骨都可以食埋, 而且d 三文魚油溶晒係d 肉入面, 令啖啖都有魚油香,好味！日本帶子雖然得一粒,但size 一d 都唔細,絕對無將價就貨！就算係炒雜菜都好好味, 我本身好怕食d 又生又無味既椰菜,但呢度d 椰菜就炒到好淋好入味！總之就樣樣都好好味啦！另外值得一讚既係雖然呢度係平民鐵板燒餐廳既優惠時段,但我留意到廚師每燒完一樣食物都會先清潔一塊鐵板,再煮新一樣食物, 十分講究！…Read More

假日訓到十一點幾,跟住去位於雅濤居既WM CAFE & BAR食午餐,午市係相對抵食既,出示指定既住戶證更可以享有九折。叫左兩份午餐（1）燒汁西冷牛扒配意粉+龍蝦湯+凍檸茶意粉煮得啱啱好,唔會太淋身,符合基本要求,西冷牛扒醃得入味,烹調時間剛剛好,又唔會太生或者太韌, 配上燒汁,口感同味道都加哂分美中不足係成碟野唔夠熱,呢點要改善一下！（2）安格斯牛肉漢堡配薯條+龍蝦湯+凍檸茶漢堡包既皮煙韌既,但我個人唔係太鍾意,牛肉有d乾身同唔夠多肉汁,較為薄切,蘑菇份量少又冇乜味,生菜正常又冇乜特別,成個包又得好小醬汁,整體感覺麻麻地,反而本人比較喜歡其他連鎖快餐店既安格斯牛肉漢堡包。龍蝦湯個湯幾重味,夠香濃既,不過入面冇咩料,個人覺得有dd龍蝦肉會好些,有d 咬口嘛!總括而言,呢間野普普通通,不過不失,但係性價比ok!…Read More