Chuckyshan's Profile

今日中午大約12點45分左右到達叫外賣，等外賣期間見到一個食客食完埋單，枱上有一盒仲有好多嘅花生，見到店員執枱時將盒花生冚好蓋，連同其他碗碟收走，放好啲碗碟之後拎返盒花生出嚟，四圍望，覺得無人見到就若無其事將盒花生放咗喺出餐位，我相信佢之後會將嗰盒花生重用🥲花生呢啲咁唔值錢嘅嘢都會咁做，其他食物我都唔敢想像🫣為咗幾蚊嘅嘢做衰間舖，我就唔會再幫襯銘興任何一間分店希望員工或者老闆會睇到，自己檢討下…Read More

天氣開始轉涼，又係食羊腩煲嘅季節！呢度已經變咗我嘅飯堂！！羊腩煲都有得食啦！今晚試咗，抵食～正！！2個人叫咗個羊腩煲加碗飯～飽哂！超滿足！羊腩唔羶，仲炆得好腍好入味…Read More

因為佢地啲阿姐啲態度，已經好一段時間無食大師傅，今日去係去咗，點知同上次去嘅遭遇一模一樣，我係買外賣的，首先入到去，無人理我，阿就企喺收銀隔離，到我叫嘢食佢先過嚟，我坐咗喺度等，樓面有2個阿姐，原本2個都係企喺度，到我啲嘢食整好咗，一個拎電話出嚟睇，同煮粥個阿姐應該討論緊買嘢，一個繼續企喺收銀隔離，佢企嘅位置係直線望到我嘅嘢食咖!最後行埋過去一齊討論，最後要整腸粉個阿姐叫先行過去包，同我對上一次幫襯係一樣，只不過上次係我開口話個阿姐，其實佢啲粥係無乜問題嘅，不過真心無以前咁好啦！真係希望啲姐姐改善下囉！唔好咁hea啦！唔該…Read More

今日行經見到就決定試下，叫咗2份早餐，分別係沙爹牛麵同五香肉丁麵，套餐包火腿，蛋，蒜蓉多士，見佢包緊嘅時候已經奇怪，因為個麵係用平嘅外賣盒裝，仲以為係撈麵，但有2杯嘢，咁應該一杯係湯！第一時間食多士先，一打開，個多士係黑色，燶哂咖，其實燶到咁樣真係唔應該食，更加唔應該比客食囉！2份都係！太過分了，0蒜蓉味，唔熱嘅，唔知係唔係整定？到麵啦！啲湯都係唔係好熱，因為係分開上嘅原因，啲麵需要浸一陣先食，唔係就有啲硬同乾，牛肉就一定會整定嘅，唔熱但牛味都濃嘅，個麵就不過不失，奶茶就麻麻地，有啲澀！其實如果食過唔好食，最多下次唔幫襯，但係佢塊多士絕對係趕客，叫你唔好再嚟食咁真係唔明白點解可以比呢塊多士去到個客手上…Read More

因為訂咗位，所以去到唔使等位~坐outdoor，坐出面感覺無咁迫，入面個格局十足十放題咁!不過坐出面就預咗無人出嚟落單，加茶，要入去叫人或者等帶位時叫佢囉！叫咗個2人餐~首先嚟個鐵板牛肉，好腍，墊底嘅芽菜就油咗啲!跟住嚟個蟹子沙律，正常~有個天婦羅拼盤（4件，2件蝦，1件南瓜，1件蕃薯）真係即炸嘅~熱辣辣，個粉唔會太厚~幾好!!碟牛肉食到最後嗰舊有頭髮呀 我已經即刻想嘔……淨係想拿拿聲食完走~有個豬軟骨拉麵，唔太熱，味道普通，豬軟骨細粒到好似五香肉丁咁……麵豉湯，唔會有期望啦！一定係即沖咖啦！食完哂啲熱嘢先嚟六式壽司，望落唔多新鮮，而且魚生唔係應該喺雪櫃拎出嚟咩？一啲都唔凍嘅點解？魚生面係乾真真嘅，自嗰舊牛肉之後，我每樣嘢都只係敢再食一啖就算啦……仲有套餐每人另加$10有日本雪糕食~抹茶雪糕，正常!每位包2杯熱飲，凍飲加錢，叫咗一杯熱咸檸水，好難飲，一杯凍巨鋒提子汁，正常，似唔會太甜，唔知係唔係太多冰嘅關係，飲到最後好淡!網上Openrice訂位有85折，埋單先知套餐係無折，咁就應該淨係折咗個雪糕錢，係平咗3蚊咁多咖……好心有折扣就咪咁小家啦！個套餐$498絕對唔值呢個價!…Read More

今次見到有團購又近近地，所以就去試下~首先叫個雞煲小辣(同行友人唔食我辣),味道偏甜,唔辣,如果食得辣嘅要叫大辣!所有火鍋配料都係自取的，不過無攞過肉，因為啲肉睇落好唔新鮮，只係食咗丸，烏冬，餃子見有個姐姐包嘅，味道都ok嘅!熟食有4款（炒麵，咖哩魚蛋，雞翼，煎餃），有雪糕，汽水，啤酒任飲不過同團購上面所列出嚟嘅食物就有好大出入啦！團購上列出嘅款式，我食嗰日就應該只出現3分2，肉類見佢啲色都唔多新鮮，所以其實可選擇嘅食物都唔太多~我見如果唔係買團購呢就每人送5串串燒嘅!我地係團購所以就無得送啦！…Read More

水煮牛肉基本上係我食川菜必點嘅~一食，唔辣，無味，啲肉已經醃到鬆哂，唔知自己食緊咩肉到口水雞，又係唔辣嘅~啲汁又小又“傑”😔呢個上湯浸菜心，話說我係想叫金銀蛋嘅~餐牌上有個金銀蛋（唔記得波菜定莧菜）我同阿落單姐姐講，要金銀蛋菜心/白菜仔，得唔得？佢指住個餐牌上嘅金銀蛋(波菜/莧菜）話呢個呀？我話我想要菜心，佢指住上湯菜心，我再話我要金銀蛋，佢再指返金銀蛋救命呀。。。😩我再講一次，我想要金銀蛋但要菜心，唔係上湯，佢話要問有冇。。。。已經激死咗。。。😠返轉頭同我講無，咁大個廚房一味餸只係改個菜都做唔到。。。唔係呀嘛！最後要咗上湯菜心，個菜嚟到，開頭食無乜嘢，可以嘅~食到底下嗰啲一陣肉腥味。。。普通無味嘅皮蛋，無嘢好講!底下墊咗啲青瓜絲😖到最後，阿姐話有個咩蝦特價$1隻，要唔要？好似係叫蒜香咁上下，我問咁係點咖？佢話有啲炸蒜喺面嘅，我問係咪類似避風塘嗰啲呀？佢話唔同，呢個唔係避風塘咖，講到呢度，😒阿姐你贏，唔想再同佢爭論啦！落單吧啦~~呢個係唯一叫有味，係重味嘅~所以我覺得成晚最讚嘅竟然係呢個$1呢個海鮮湯飯都可以，唔差嘅!都幾多海鮮，不過就要用啲牙力啦!好韌😯啲阿姐咁話頭醒尾。。。實唔會去第二次啦……唉!!😵😵😵…Read More

話說呢個蜂巢雪糕風頭一時無兩，不過睇食評多數都係話細杯唔抵食，之後見到有團購就一於買嚟試下~分別試咗原味蜂巢雪糕同Yahoo限定芝士奶茶味，先講原味，無乜特別，夾埋蜂蜜食其實真係有點過甜!蜂巢咬完之後個口感認真麻麻~之後到個限定味道--奶茶味唔錯，加埋啲粉幾好食，不過有微微芝士味嘅粉佢放哂喺底，其實去到最後係食粉多過雪糕~同埋好似見到有淨雪糕（無蜂巢）但都2x一杯，咁我就情願食Haagen dazs啦~總括嚟講，奶茶味係可以一試嘅~不過份量的確係少咗啲!如果正價我就唔會再食，再有團購都可以再考慮嘅~…Read More

見團購做咗好多次，終於試咗~因為訂咗枱所以去到就有位，被安排坐正門口位~叫咗個中辣，雞煲嚟到，侍應就話食得，望一望D汁都未撈均，食落甜甜地，雞都滑嘅,個辣味只係加咗辣椒粉/碎，老實講，有點求其~之後到加湯打邊爐，加咗湯之後完全無味，問，可唔可以加啲雞汁比我？結果佢拎到出嚟嘅我相信係一兜海鮮醬!用海鮮醬加辣椒粉/碎，就叫雞煲？會唔會太無誠意呀？其他料都不過不失，不過餐前小食叫咗幾款一個都無嚟到!飲品款式都有5，6款，算唔錯……仲有雪糕,不過因為太飽無食到~不過以咁嘅價錢我唔會再去囉！…Read More

聽朋友話呢間燒肉好好食，見openrice啲人話午餐平好多，所以就趁放假特登訂位嚟試下，訂咗都要等10分鐘左右先入得，我地坐嘅位置，相信晚餐時會係一間房，午餐我地就坐咗3枱客，入到去好熱，無咩冷氣，叫人寫嘢叫咗2次，我地叫咗個伊呂波套餐，一個和牛牛排套餐，上菜都幾快，食落好普通，無特別!牛肉有啲韌，三文魚有骨有個蒸蛋，好滑，呢個係呢餐我覺得最好嘅嘢食!總括嚟講，食物普通，服務麻麻!都未必會再嚟食午餐，可能晚餐收貴啲會好啲掛。。。…Read More

成日經過，見到佢外賣晚餐$58，價錢都算ok，今晚就試下！點知。。。。其實入面只有兩枱客，但都等咗成四五個字，我只係叫咗兩份晚餐！返到去一睇，呢個咸魚煎肉餅真係少得可憐，只有四片，係真係只可以用片嚟形容，因為真係好薄，佢只有一個籌碼咁大片，如果只係叫一個餐，半碗飯都送唔到囉！下次都唔會再去！…Read More

第一次去~環境唔錯,可能因為平日,去到時係無人,同埋我地有訂位,所以唔使等,入到去就有位!湯底有好多款選擇,今次揀咗個瑤柱冬瓜,店員話因為過咗時節嘅關係,所以唔係成個冬瓜盅上~不過湯都好香好好飲~配料唔算平(我覺得有點貴添~),加$10可以雙拼(啱哂2個人又唔怕一碟食唔哂,又可以叫多2款~),但都幾新鮮,叫咗個細手切牛,都唔錯,不過有點厚,所以太熟會韌,伙記好有禮貌,食完仲有生果送~以深水埗嚟講,呢度都算係環境好,食物好,服務態度又好~真係值得一讚不過下次應該會搵多幾個朋友去,可以叫多d嘢!…Read More