or#Tm65438047's Profile

話說今日晏晝同朋友喺跑馬地打完波之後，見有少少肚餓，就打算到附近嘅祥興咖啡室食個下午茶。去到門口，除咗見到有兩名人士正在旁邊排隊買蛋撻、菠蘿包之類，另外有幾個年長嘅人士正從門口嘅位置以抱怨嘅語氣正在準備離開，我隱約聽到佢哋喺度講：「去第二間食啦，唔係剩係得佢一間啫」。我當時不以為然，只係以為冇位，但既然嚟到就即管入去睇吓啦。入到裏面發現有好幾張吉枱，於是我就隨便揀一張坐低。突然有個女侍應（類似阿嬸咁嘅物體）問我：「你幾多位啊？」，我答完佢之後，佢就叫我攞飛出去排隊。跟住我反駁佢話：「呢度咁多張吉枱都要排隊？」佢就話門口有好多人等緊位，費事其他客人嘮嘈。我心諗，唔通門口嗰兩個人唔係買蛋撻，而係排緊隊等位？我費事同佢一般見識，就即管攞張飛出去門口等一陣睇吓咩料！出到門口，旁邊排緊隊買蛋撻嘅人繼續排緊隊等蛋撻，而另一邊就完全冇人企喺度。我等咗兩三分鐘之後都冇人招呼我就開始唔耐煩，於是我就衝入去問個阿姐，我話：「門口啲人走晒囉喎，都冇人排隊，你咁多張吉枱都唔俾我入嚟坐？」。個阿姐就話：「係呀，未得啊，等多陣啦」。我即時火都嚟埋，就快想爆粗咁鬧鬼佢：「懶巴閉咁，剩係得你先至有得食咩！」。眼都唔望佢多眼我就轉身即走。今時今日，大家成日聽到有好多餐廳、食肆執笠，當然經濟周期同埋旅客嘅消費模式改變多多少少都有影響，但係喺舖價同埋租金都下跌嘅大前提之下，其實服務態度同埋食物質素先至係關鍵，或者令到生意難做嘅主因。呢類型嘅食肆，恃住自己係所謂嘅老字號，以為唔優做！ 所以啲人成日瀨市道唔好，但你見人哋兩餸飯同埋新興嘅茶飲店排晒大隊、開到成行成市。所以啲人墨守成規、一成不變，唔去檢討自己、自我反省，遲早都會變成歷史、被社會淘汰！…Read More