魔鬼莎拉's Profile

附近搵唔到啱食嘅，咁啱見到幾靚，又有早餐供應，就入去試試啦。未入座職員話咖啡師十一點先返，所以飲品只有果汁或者美式咖啡，想飲其他咖啡嘅請留意返。因為朝早，客人唔多，落單後好快就有得食。松露滑蛋煙三文魚三文治配沙律菜（唔揀煙三文魚可以揀煙肉）蛋唔滑，無乜松露香味，而麵包比較薄，但又唔夠脆，整體嚟講係一般。店內仲有一區有貓貓，不過店員話疫情關係唔會放佢哋出嚟，可惜⋯店內環境好好，比人好舒服嘅感覺，有機會都會再去。…Read More

「海陸雙饗」下午茶，官方相幾靚嘅，所以決定一試。加 $80 有龍蝦，唔算太大隻，味道還可以。香脆大蝦牛油果醬沙律，牛油果味唔算濃，蝦唔算大隻，係勝在夠熱。慢煮豬腩肉配菠蘿及薯蓉，一上枱有陣怪味，賣相又唔吸引，不過但食落又無嘢嘅。都係加 $80 有牛扒，叫咗五成熟，嚟到變 well done，又薄又乾⋯仲衰過我去嗰啲 xx 餐廳食嘅扒⋯成餐最好食係 Movenpick 雪糕囉⋯眼見附近食客上至大人下至細路全部都食淨嘢，就知啲嘢食有幾好味⋯真心失望，明明之前食過下午茶自助餐唔錯架嘛⋯…Read More

常客，一星期都幫襯一次，基本上都無乜特別評價，嘢飲唔錯，係開門時間好似成日唔同咁，有時未夠一點就開門，有時一點都未開，好奇怪。今日寫食評主要想講職員態度問題，一向啲職員都無乜問題，今日嗰位姐姐除咗無戴口罩，我比錢嗰時佢仲一手搶咗我嘅錢，無錯，係搶而唔係收錢，我呆咗⋯希望唔會再遇到 lee 個姐姐，態度太差了。…Read More

打去叫咗個辛辣麵 + 紫菜包飯，去到拎先發現阿姐煮咗牛肉芝士麵比我⋯（其實都知要佢整過啱嘅麵比我咁本身煮好嘅佢會掉，有衣食所以算數啦⋯）因為唔食芝士，就問阿姐芝士應該唔大塊架呵？可唔可以自己挑走佢⋯阿姐答我唔大塊嘅⋯辛辣麵餐係 $30 而牛肉芝士麵餐係 $35，阿姐自己出錯竟然想收我 $35 囉⋯反到去發現係個麵有芝士味，而唔係阿姐放片芝士落去⋯（對於唔食芝士嘅人嚟講，其實無乜分別⋯都係一陣令人難受嘅芝士味⋯）食過咁多次，真係每況愈下囉⋯望到舖頭貼住「頂讓」，我諗都係時候架啦⋯…Read More

其實幫襯咗最少都有一年，係早幾日食咗間難食到喊嘅雲吞麵先令我突然諗起老表⋯由 $23、4 食到 $25 碗，價錢還可接受。雲吞唔會因為加價而變細或者偷工減料。今日難得有時間，去咗堂食。雖然都有一排無食，慶幸水準依舊，雲吞大大粒，最少有兩隻蝦喺入面。可惜嘅係支裝汽水只有細 size，如果有大 size 就好了！另外如果再有返水餃 & 牛腩就好了⋯…Read More

雲吞有異味，叫阿姐換過，阿姐話係師傅包嗰時無落麻油所以有味喎⋯換嚟水餃，一樣有異味⋯（唔係梘水味）水餃內嘅蝦唔靚，霉嘅⋯粥味道比較淡，要自行落鹽⋯乾炒牛河都係比較淡⋯基本上所有嘢都麻麻⋯難怪星期日都無客⋯…Read More

一入去，坐低連 menu 都未睇，阿姐就企喺隔離等落單，想點？好嘞，叫人落單，個阿叔鞋口鞋面咁，唔知以為我殺咗佢全家囉。海南雞飯，一啲都唔好味，又唔香，飯又唔熱。煎餃唔知乜鬼菜，OK 脆卜卜，不過愈食愈油，凍咗啲油簡直嚇死人，要去咗層脆皮先食到。勝利小炒王，魷魚好重味，腰果蝦米都好脆，顯得肉粒勁無味。食食吓有人搭枱，竟然有例湯送，大家都係海南雞飯啫！不過見到湯水啲色就無胃口，算，唔計較咁多。TB 哥哥收錢嗰吓先勉強一笑，辛苦晒！見到黎諾懿買外賣，甄文達嚟堂食，忍唔住諗，因為多名人幫襯所以服務態度就咁差嗎？真心佢哋仲寸過澳牛，人哋澳牛就有鐵漢柔情丫，Lee 度？乜都無囉。…Read More

遲來的食評。我係網上訂座嘅，直到去餐廳前都好擔心，因為無人打嚟 confirm，而今次係同朋友慶祝生日嘅。(希望之後餐廳可以打比客人 confirm booking 啦)餐廳唔大，枱同枱之間會比較貼，不過不減情調。海鮮意粉，足料，好味！仲有個蜜桃黑毛豬 (無記錯的話，其實有相，只不過由於影埋人所以唔方便放上嚟)，雖然有點點肥肉，但唔會好肥膩。值得一讚係店員好細心，見我哋食完一道菜先再上第二道菜，唔怕凍晒，都適合我哋慢慢食慢慢傾。當晚人唔多，最後係變咗我哋包場，哈哈。最開心係本來應該得一個心太軟，最後餐廳送多一個比我哋。朱古力心太軟，一界開啲朱古力湧出嚟，好誇張！抹茶心太軟雖然無湧出嚟，不過味道比想像中好！…Read More

其實本身唔係想食 Lee 間，只係對面餐廳 full 晒先轉嚟 Lee 邊。唔駛等位就可入座，唔錯。最先嚟嘅係嘢飲，杯羽衣甘藍好似溝咗水咁，唔好味。小食拼盤，雖然炸到無色咁，不過味道還可以，炸蘿蔔糕幾得意。香蒜蝦扁意粉，明明睇之前食評係好靚好大碟，點知一上桌已大失所望，有隻蝦頭黑黑嘅，朋友隻蝦仲係霉嘅，意粉嘅汁又怪怪，總之成碟都好難食。煙肉流心蛋 Pizza，好味，好脆，唔錯！環境其實唔錯，不過適合一班人嚟，因為比較嘈。服務方面，侍應姐姐多次走嚟想收我哋嘅嘢食，但我哋其實仲有一半係未食完架囉，真係極討厭極擾人。…Read More

其實嘢食味道唔錯，但價錢比較貴。不過今次唔係評食物，係評服務！堂食，外賣自取，外賣都試過，今次想講吓外賣嘅服務。外賣員服務都幾差，叫兩個餐幾廿蚊又鞋口鞋面，叫七，八個餐差不多四百蚊都係鞋口鞋面，宜家我得罪你？真心，附近大把餐廳，唔係你獨市架囉。…Read More

一早知舖頭存在，成日經過都好想試，趁住放假嘅晚上終於去咗。店舖細細，如果多過兩個人真係要認真考慮去唔去食。坐落職員已講明無牛肉麵，明明嚟只想食牛肉麵，唉。落單時發現唔止牛肉麵，連牛肉湯都無。即係連點牛肉湯餃子都唔得，只可以揀淨餃子。。。最後決定點鹽酥雞飯，淨餃子 & 朱古力雪香。首先講鹽酥雞飯，一送上嚟，賣相已令人失望，可能習慣咗出面食嗰啲係金黃色嘅，見到一堆深啡色嘅雞真係無言。咬一啖雞，好乾好硬，應該係翻炸嘅。滷水蛋比較乾 & 硬，整體而言，鹽酥雞飯一啲都唔好味。至於淨餃子，包得太工整，應該係出面買嘅，要讚嘅係個醋，好好味！朱古力雪香，不過不失，無乜特別。要讚嘅係店員好 nice，不過食物方面真係有待改進。P.S. 店員溫提，假日請早啲去。因為八點幾食緊嘅時候，好多嘢已賣晒了。。。…Read More

第一次嚟食晚餐，無諗過環境比想像中舒適，環境唔太嘈，枱同枱唔會太貼，好闊落。晚餐揀咗羊架 & 漢堡包。先講羊架，唔"酥"，唔老，好味！許願樹薯蓉好得意，一條條嘢似係炸咗嘅公仔麵，但唔肯定。漢堡包，雖然話係牛柳，但感覺比較乾。薯條好脆，好好味！無諗過朱古力都可以拉花，好靚好有心，雖然熊仔好似跳跳虎。提外話，話說朋友大肚，訂枱時已問職員可唔可以比啲入少少，唔好比路口位我，始終太多人出入怕會撞到朋友。結果對方話唔 full 的話會比張四人枱我哋，而最後，真係有四人枱坐。另外，waiter 哥哥見個黑板 menu 距離我哋張枱太遠，見我哋望得辛苦，就直接拎個黑板放喺我哋枱隔離，太貼心了。=)…Read More

雖然住喺附近咁耐，但今次只係第二次食，聽聞就執笠，所以去幫襯一下。正值新年假期，唔算多人，唔想食太多，就單點炸脾，比完錢拎住飛仔去吧枱，廚師哥哥就叫我放低飛等。因為炸脾即炸要等，只好乖乖坐定定。等咗大約十分鐘，終於有得食，由於即炸關係，所以炸脾好熱辣辣香噴噴，不過雞皮唔夠香脆，而且有一半皮唔見咗！而味道唔均衡，入面嘅肉無味，肉質比較老比較鞋，而外皮有啲位無味，難得某啲位有味，無奈味道偏咸。不過雞脾 Size 幾大，基本上食一隻已經好飽，$22 嚟講，都算抵。整體而言，失望。…Read More

偶爾經過但一直無機會試，今日終於試到了。先講環境，唔錯，唔太迫，不過座位比較少。Order 食物後就坐低慢慢等，發現舖頭細細竟然有七，八個員工喺度，太多人了吧？食物終於送上，Snow Ball Latte 係是日精選定唔知乜，送上嚟嘅時候發現有個雪人仔，幾得意，幾驚喜，因為無 req. 過的，而味道還可以。黑松露菇菇飯，好大碗，但唔覺有黑松露，亦食唔到有黑松露味，而且成碗飯味道偏淡。牛油果碎蛋牛角包，賣相唔錯，但碎蛋變咗片蛋嘅？可惜個包係凍嘅，如果係熱相信會好味好多。整體而言，有改善空間，除咗味道，仲有員工態度，雖然係自助，但唔好個個都黑口黑面咁。…Read More

第二次嚟啦！第一次嚟應該係睇完報紙介紹，得知係澳牛老闆嘅公子開，就決定嚟試。先講炒蛋，上一次係失望而回，可能嗰時剛開業啩，總之個炒蛋唔好食囉！今次有啲陰影吓再試，OK 喎，滑嘟嘟！而厚厚嘅多士好脆，唔錯。再配上牛奶，感覺好健康，哈哈。香腸公仔麵還可以，不過腸仔比較咸。老闆依舊好有禮貌，唔會一副想趕你走嘅樣。如果唔想去澳牛又趕又要受氣仲要坐得好迫，可以嚟試吓！…Read More