charlie615's Profile

位於元朗錦上路嘅Cohee Studio係我最愛嘅咖啡店之一，一直期待去埋佢哋嘅另一分店試下。開業不足一年嘅Cohee 2.0 ，選址粉嶺裁判法院，離粉嶺站約7-8分鐘路程，位置唔算難揾。有幾張枱放置係門口戶外，門前有一細片空地，再有牆同鐵閘隔開法院同出面嘅大馬路。而鋪頭內全用玻璃外牆，採光度高，加上以木系及白色為主，空間感十足。平日午膳時間到達，唔洗等即刻有位。～** 蘑菇、牛油果、忌廉芝士貝果加沙律 $103**～蘑菇、牛油果同沙律菜都好新鮮，沙律汁有得揀黑醋汁或者芝麻醬，而包都有得揀要酸種包或者貝果。今次揀左貝果，口感有啲似普通面包，未有貝果煙韌口感，但整體感覺不差。～** Latte (SET+$15)**～啡味濃，上面都有棉密嘅奶泡，隨杯附上一張卡介紹返呢杯咖啡。形容返佢嘅味，甜度同酸度等。可以一路品嘗，一邊增加返對呢杯咖啡嘅了解。…Read More

～**一浪總匯吐司 $83**～材料豐富，特別係雞腿，超嫩滑，完全唔似平時啲餐廳嘅雞胸咁鞋口，而且加左薄薄一層花生醬，好似吐司有呢個配搭，少少咸口幾特別又幾開胃。餡料豐富，所以整體份量頗大。～**Iced latte $42**～凍latte加左冰都好濃，十分出色。初訪呢間位於大角咀嘅cafe，除左環境舒適同食物高質外，更令我印象深刻嘅係店員親切有禮嘅服務態度，門口都有寵物友善嘅空間，下次都一定會再嚟。…Read More

～** 自家製肉丸蕃茄意大利麵 $95** ～扁意粉嚟嘅，茄醬味道幾好，上面茄子翠玉瓜等都煎得幾香口，軟硬適中，係肉丸味道差少少。～** Latte $42**～不過不失，同後面大南街嘅大部份咖啡店水準都差唔多。是日陽光幾好，店入面又係落地玻璃為主，感覺開揚舒服，休息左陣，成個人精神晒。不過意粉等左20幾接近30分鐘先有，可能因為平日得兩位店員，如果一個去左用膳嘅話，另一個人就要同時負責晒咖啡同廚房，所以趕時間嘅應該會覺得上菜太慢。…Read More

～** 招牌椰爺秘傳叻沙湯面 黑醬特級肥牛 滷水燉金沙骨 摻摻 $88 **～肥牛份量好多，醃得好入味，另有四大舊燉金沙骨，加埋其喺餸、整體份量算大。湯嘅椰香同辣味都好平衡。～** 鮮香蕉，流心斑斕椰香手工咖央多士（自家鮮制）$38 **～斑斕醬唔特別出色，佢面包都唔係啲味道口感較優質嘅方包，加上食得出佢係香蕉醬而唔係鮮香蕉，個假嘅香蕉味扣晒分。店舖坐位擠逼，坐得有啲辛苦，當日想叫椰香手工拉茶，可惜無貨，最後店員完餐時送上一杯羅漢果茶，解一解叻沙摻摻嘅濃味。…Read More

精緻嘅日本小菜，而且可以自由搭配，非常吸引，今日就係附近睇戲之前嚟試下，與同行朋友合共叫左以下嘢食：～** 醬油蛋飯 $22 **～～** 月見博多地雞團子 $48 **～～** 味噌蕃茄煮鯖魚 $42 **～～** 松葉蟹薯仔沙律 $52 **～～** 葱燒厚切牛舌 $34 **～～** 蒜蔥燒牛肩肉卷 $45 **～醬油蛋飯用嘅係蘭王蛋，而咁多款最出色嘅係地雞團子，肉質軟硬適中，有口感，加埋生蛋同日式醬油，更香滑濃厚。 其他質素尚可。不過每碟份量唔多，如果食量大嘅真係未必夠，賣相精緻，但整體味道未算突出，試一次就夠，未有再食嘅慾望。…Read More

～** 月見海老魯肉飯 $62 **～加左大蝦嘅魯肉飯，大蝦係有輕輕燒過嘅，不過未見得個魯肉好出色，份量都唔算多。～** 熱芋泥鮮奶 $20 **～好味，鐘意佢唔甜，令芋泥香味更突出，香濃亦夠滑，唔會係出面手調飲品鋪個種假嘅芋頭奶味，飲完都好飽好滿足。～** 起司肉鬆蛋餅 $22 **～都係個幾種簡單材料整，整體中規中矩。當日係平日嚟嘅，大約一點到，要排隊等左一陣先有得入，另一次經過，都係大排長龍，呢排想食嘅朋友可能要預留返時間嚟等等位啦！…Read More

由細食到大，今日返難得返大埔，梗成要去回味下。～** 招牌雙拼炸雞翼墨魚條米線 $46 ** ～雖然墨魚同雞翼脆粉係偏厚身個種，但唔會覺得好粉感，仲炸得好香脆。特別要讚下佢個雞翼，醃得好入味，加埋脆卜卜嘅雞皮，好味！米線湯底係普通嘅咸味，加埋菜心兩條同少少葱，有啲似屋企呀媽會煮個種，但因為個餸好夠味，反而咁樣加埋呢個普通嘅湯仲配搭。而且四隻雞翼加兩條墨魚卷，呢個價錢嚟講唔算少，係碗麵嘅米量偏少，男人可能未必夠。…Read More

Bagel同咖啡一直都係我嘅最愛，呢間coffee shop就啱晒我，淨係得呢兩樣嘢食！雖然佢無其他類型嘅咸食同甜食，但由於佢呢兩樣嘢都做得好出色，而且每個月都轉新menu，基本上唔會遇到返重復嘅口味，啱晒怕悶又想試新嘢嘅我。星期六朝早去行山前，都特登過嚟飲啖啡食個包先。假日嘅關係，人流比較多，排第三張枱，不過好快就有位入，需時10至15分鐘。佢唔係個種豪華裝修嘅咖啡店，但簡約純樸嘅環境，反而令我覺得更舒服自在～** 炙燒香蕉燉蛋牛油軟包 $58 **～好難得嚟到呢度我唔係食bagel，完全比佢呢個樣同口味吸引左！牛油軟包真係好鬆軟，上面嘅燉蛋係佢哋自家制嘅乳酪醬，帶酸味，同時帶有一絲絲嘅蛋香味，而上面嘅香蕉用火槍火炙過，焦糖味濃又脆卜卜，整體好夾，係個有甜品特色味道嘅面包。～** 熱黑糖烏龍咖啡 $45 **～已經返嚟飲左好幾次！濃厚嘅烏龍茶底加咖啡，兩種味道配合得嚟仲互相襯托到對方嘅特色，加埋上面嘅黑糖，中和返茶同咖啡嘅苦澀味，層次多樣，必定要一試嘅咖啡。面包、bagel同scone加埋通常有8款，全部款式都會放晒係玻璃櫃入面，望到實物再揀啱心水嘅，吸引力大增。咖啡店坐落離大圍站約10分鐘路程嘅小商場內，位置唔算方便但好易揾，中間會經過小公園、村屋同單車徑，慢慢行過去，其實都好寫意。非常推薦大家嚟食！…Read More

～** 牛油果煙三文魚忌廉芝士面包圈 $89**～各種材料真係好新鮮，牛油果熟成度適中，又滑又香，三文魚都比左三大片，cream chees都唔吝嗇，搽得好厚食，個bagel係偏硬身個種口感，如果想食軟啲有煙韌咬感嘅朋友，呢個未必最適合你。～** Latte $40 **～咖啡豆烘焙程度較高，幾乎無酸味，苦同甜味較多，係厚身同濃郁嘅。地點位於太子同深水埗中間，出左地鐵站大約行10分鐘，雖然附近有頗多類似嘅選擇，但論咖啡加食物嘅質素，Cafe Sausalito算係同區咖啡店中比較高質嘅，而且佢係開得最早嘅一間，9點就開鋪，如果當日有其他行程，但又想早啲嘆杯啡先嘅，呢度就好啱你嚟。嚟左咁多次，今日朋友講起先睇到有breakfast set ，大約$80-$90就包左一份嘢食同一杯嘢飲品，下次要再嚟試下！…Read More

西營盤站附近嘅和風咖啡店，座落係半山位置，沿途嘅人流同車輛都唔多，尚算清幽。富有日本味嘅裝修同擺設，即使係細小嘅空間都充滿質感和特色。～** Apple Honey Toast $45 **～面包香口，烘熱至略帶鬆脆口感但又唔會太乾太硬，加埋蜜糖同蘋果酸味點綴，可口吸引。～** Matcha Latte (Hot) $45 **～綠茶味濃，但扣埋奶泡後，份量略為細杯。～** Marshmallow Croissant waffle w/Vanilla Ice cream $70**～賣相一流！底部嘅牛角包窩夫有好香濃牛油味，加埋麻糬，一軟一硬；配搭由雲尼拿雪糕做成嘅貓咪，一凍一熱，好食！總結嚟講，份量偏細但價錢唔平，唔算抵食，而且木櫈木枱空間較逼，若想享受短暫嘅偽日本遊，可以一試。…Read More