地處筷子基”海皮”對面的Amazing Cafe都幾易搵，裝修都唔錯
，好似係花園主題咁，入到去咁岩有位(好在咋，後尾見到勁多人等位)，仲要係沙發的四人位，真係開心!!
我同朋友兩個點咗紫薯牛奶、紫薯香芋雪糕牛奶、紫薯心太軟蜜糖吐司和Amazing 焗雞中翼。
兩杯野飲先上，我黎m簡咗杯熱飲，個紫薯牛奶都ok，唔會太甜，但又唔係話好有紫薯味，不過不失，朋友個杯佢都無咩特別評價。
之後上的雞中翼，你話佢係唔係真係好似佢個名咁咁Amazing 呢又未至於，但係就都幾好味，幾多汁，而且香口得黎有陣辣味的刺激，口感唔會太齋，朋友覺得幾正，但係因為我食得出係紅椒粉味，覺得自己係屋企應該都整到，所以就未到覺得驚艷
最後到戲肉的蜜糖吐司，朋友一切開，d紫薯溶就狂漏出黎，夾埋d Cream、紫薯雪糕、吐司、紫薯大福同紫薯絲粒一齊食，感覺真係好Full，仲都幾甜下，或者蜜糖吐司本身就係咁甜，唔好甜食的我未必接受到，覺得有d膩
，朋友就覺得ok。
其實個人覺得紫薯都幾難整得好味，因為本身都甜甜地，想突顯到佢個味得黎又唔死甜，好似真係幾高難度，又或者係我仲未試到好正的紫薯料理吧，但因為間Cafe環境真係唔錯，同朋友吹下水，飲下野，食下甜野，都叫渡過咗一個和熙的下午，咁就已經覺得幾開心
