31-10-2010
Brunch 想食碗牛尾通, 本來想試喜蓮咖啡的, 但原來佢星期日唔開門, 兜兜轉轉返到官也街一帶, 見呢度都有供應, 又試試.
熱奶茶: 多茶少奶, 而茶味當然唔係港式的「複雜」啦, 不過幾香又唔澀, 都幾啱飲; 唯一唔好就係飲完嚡口嚡脷的.
牛尾湯通粉: 通粉係有坑紋嗰隻, 淥得幾有咬口, 不過唔好講 al dente 唔 al dente 喇, 茶記 style 湯通粉你想點?
湯底的茄膏味幾濃烈, 飲落好酸, 完全唔似牛尾湯, 叫「蕃茄濃湯」貼切好多 
, 不過撈吓撈吓, 又真係有兩件幾鬆化的連骨牛尾喎. 其他配料就以紅蘿蔔為主, 索滿勁酸湯底, 味道就有點「漬物」feel
朋友食豬扒包, 包身烘得脆口鬆化, 不過連骨豬扒就幾韌幾乾嚡, 唉. :(
環境衛生 ok, 格局同一般茶記無異, 不過食客不少店內都好安靜, 幾舒服的, 喺又迫又嘈到爆的官也街, 都算係一個「綠洲」.
埋單 total $60 有找, 食飽離開時忽然發覺無試呢度的「名物」合桃蛋糕
咁即係下次過澳門「又要」再返嚟啦.
