地點：紅磡馬頭圍道
菜式：西餐
午市套餐包是日餐湯或者忌廉龍蝦湯，主食有肉類，焗飯，意大利粉、漢堡等多款選擇，包凍西柚子蜂蜜綠茶或者熱飲，可以加錢升級餐飲，都可以加錢要小食或者甜品。平日無加一。
3
忌廉龍蝦湯
忌廉龍蝦湯雖然唔大碗，不過龍蝦味好濃厚，面頭加上少少忌廉。
紐西蘭穀飼肉眼扒伴時令蔬菜 $138
紐西蘭穀飼肉眼扒帶少少筋，牛味唔錯，就算全熟都好嫩，唔會太乾。有三款汁揀，我揀左牛肝菌汁，味道都唔錯，唔會太重口味。下面好多粗身連皮薯條，熱辣辣炸起，好脆口又啖啖澱粉，已經跟有茄汁一細兜。時令蔬菜有清淡西蘭花。
加錢叫左兩份小食。
芝士焗西蘭花 加$18
呢個價錢份量好多，西蘭花面頭係滿滿焗到微焦芝士，好味又健康。
卡邦尼芝士焗椰菜花 加$18
呢個卡邦尼芝士焗椰菜花仲加有火腿同洋蔥絲添，個汁更加滑溜帶鹹香，令d椰菜花好正。
1
下午茶套餐有11款，包熱咖啡或者熱茶，有沙律，小食，意大利麵，甜品等，可以加錢升級特飲。價錢好抵。
蜜瓜田園沙律配巴馬火腿 $40 另加一
蜜瓜田園沙律配巴馬火腿係新鮮生菜底配車厘茄，加有酸甜醬汁，面頭係新鮮哈蜜瓜粒配幾片巴馬火腿同大量芝士粉。健康夠味。唔鍾意巴馬火腿都可選煙三文魚。
安格斯牛柳拿破崙意大利麵 $52 另加一
安格斯牛柳拿破崙意大利麵係好大碗圓幼身spaghetti撈有嫩口牛柳同雜菜，個拿破崙汁番茄味濃，酸酸甜甜好開胃。份量好大碗。
日式雜莓蜜糖熱香餅配雲呢拿雪糕 $68 另加一
日式雜莓蜜糖熱香餅配雲呢拿雪糕係三層鬆軟熱香餅面頭加上一層忌廉同一大球雲呢拿雪糕，仲有蜜糖醬，配好多新鮮雜莓，包括藍莓，紅莓同士多啤梨。軟綿綿熱香餅配熱熔冰凍滑溜雪糕真係絕配。
雪沙草莓 加$18 另加一
雪沙草莓大大杯，面頭加上薄荷葉。士多啤梨味又香甜又滑溜，味道唔假，唔算太甜，仲有一粒士多啤梨。
冰川雪山 加$18 另加一
冰川雪山用隻好靚玻璃杯上枱，係好吸引人嘅藍色雪山！飲落味道清新，好似係檸檬梳打味，甜甜地，雖然面頭雪糕變左芒果味，賣相都好好，雪糕超大球，而且個人更鍾意芒果味雪糕。
熱檸水
熱檸水有三片檸檬，好夠熱，可解解膩。
總括而言，今餐食物質素不俗，份量好多，呢個價錢好抵食。餐廳座位舒適，服務唔錯。
