我地分別叫咗兩個All Day Breakfast、一份Two-way Avocado Toast同一份Smoked Salmon Toast等等。本身朋友想試吓個蛋撻，但原來蛋撻下午三點先出爐，所以我地就轉咗試Basque Cheesecake，口感幼滑柔軟，淡淡嘅芝士味，味道係ok嘅，但本人就略嫌蛋糕質感太過soft。Toast就唔使點講，上一次食過Apple Toast都已覺得味道唔錯，而且佢Toast嘅份量都係偏大，朋友個Two-way Avocado Toast可以有兩種唔同整法選擇-sliced或smashed，可以食出兩種唔同感覺，不錯！朋友最後揀咗sliced，成個牛油果薄切而上，睇得出個牛油果真係又大又新鮮！而我今次試嘅Smoked Salmon Toast都唔弱，有成六塊煙三文魚，再加埋菠菜同牛油果蓉，呢個配搭唔錯、好好食，但食完真係勁飽！而最令我欣賞嘅係個Toast上加咗啲醃紅洋蔥，除咗可以消除油膩感，亦都有調味、幫助消化嘅作用。洋蔥本身含有二烯丙基二硫，可以幫助血液循環，仲可以有助去除體內自由基、提升免疫系統，所以食多啲洋蔥係有益嘅！不過，有服用抗凝血劑藥物嘅人士就建議唔好過量攝取洋蔥啦，因為有機會降低血液凝結嘅速度。
食到咁上下，就有個侍應提醒我地仲有5分鐘用餐時間（用餐時間為90分鐘），於是乎唯有快快手食/飲埋啲野再轉下場啦。真心覺得啲Cafe set死晒啲用餐時間，真係無晒去Cafe嘅意義，想relax下chill下都話唔得，但無奈都要接受呢啲所謂嘅「香港文化」。
