餐廳裝修以水泥牆做主調，配上木傢俬，走日系簡約工業風。餐廳播住柔和音樂，座位闊落舒適，好似坐喺 cafe 感覺，幾 chill～餐廳仲有 outdoor seatings，不過今日氣溫驟降，都係坐返室內 ❄️
落單以 QR code 方式，介面清晰易用，方便 👍 餐牌有丼物、自家製味噌麵團薄餅、手工意粉、特製薄餅夫、甜品等等，品種頗多。起初諗住淨係揀主菜，最後忍唔住追加雞翼 🤤 我同朋友都係雞翼控，一於叫兩款！
上菜速度快，打工仔唔洗驚食唔切！當餐點準備好，就由職員送上食物。
=========================
黑毛和牛牛扒丼青森溫泉玉子 $88
和牛薄切嫩紅，鋪滿飯面，牛肉半熟入口 juicy，肉味濃郁
將溫泉蛋戳開，蛋汁緩緩流出，拌以碗中燒汁、珍珠米，每啖混和肉汁蛋汁味道，大滿足！
靜岡柚子大蝦扁意粉 $98
扁意粉約一吋闊，有4至5隻大蝦 🍤
扁意粉掛汁，並冇湯湯水水嘅感覺，帶淡淡清新柚子皮香氣。
巴馬臣蒜牛油雞翼 $48
越南牛油雞翼就食得多，本身預咗日式嘅味道會偏淡，而且樣子平平無奇，點知，有驚喜！濃濃嘅蒜味，加上牛油、芝士，味道配合，十分濃郁，幾樣濃味嘅食材並無搶走對方風頭～ 大愛蒜頭嘅朋友，值得一試！
靜岡柚子胡椒雞翼 $48
相對「巴馬臣蒜牛油雞翼」，呢個味道行小清新路線 🌿 熱辣辣嘅雞翼面頭鋪上胡椒，加入柚子嚟提味，味道 mild，唔好餐牌上「辛口」嚇親啊 🙈 兩款味道各有特色👍
整體來講，「Fifth Element Shokudo」環境休閑舒適，食物質素唔錯，而且份量大方，女仔嚟講一定夠飽，最啱同朋友叫多幾個品種一齊 share，忙碌嘅生活中鬆一鬆。呢個價錢嚟講，cp值高 👍
之後睇返，經 OpenRice 訂座，仲有全單六折優惠，抵啊！趁優惠完之前，翻啅多次先 😎
=========================
Fifth Element Shokudo
📍 尖沙咀彌敦道100號The ONE 3樓L308號舖
