Running 燒 (Closed)

秋風起，食燒肉。110分鐘放題任飲任食，除左豬牛雞羊同埋蔬菜等基本野，連海鮮都有，仲有韓色小食添，飲品有汽水同其他韓式罐裝，可以自己去雪櫃拎，想飲酒就要另外加錢。趁食物未到，食下韓式三小碟開下胃先，特別鍾意泡菜，調味剛好唔會太濃，岩我口味。叫左一大堆肉，睇得出質素唔差，絕對唔係雪左千年ge肉。先講牛肉，試左好多款，特別鍾意醬汁牛五花肉，醃得好好味，又快熟，兜幾兜就食得。豬肉呢我就試左厚切豬腩肉同辣味五花肉，用生菜包住黎食，肉唔韌，菜爽脆，雙重享受。雞我就推介醬醃春雞髀，好嫩滑，而青陽辣雞粒同雞賢都夠辣，好惹味。海鮮望落亦乾淨，廚師仲好鬼馬咁將帶子放左入魷魚筒。魷魚鬚同魷魚鬚圈好彈牙，輕易咬開，好正！蒜蓉芝士生蠔又幾夾，生蠔本身亦都新鮮無異味。大蝦、帶子等其他海鮮都新鮮。除左燒肉，仲食左柚子味同噴火炸雞，柚子味甜甜地，好似西檸雞，幾正，噴火即係辣味，真係會噴火，唔食得辣就唔好亂試。噴完火食返碗水冷麵就岩晒，清爽！最後就係甜品，見韓國雪條平時都有得食，就揀左時款西米露，食落先知原來係紅豆涼粉紫米西米露，好清潤，拍得住糖水舖！