PHI Coffee & Pancake (尖沙咀中心)

Open Now

Now Closed

尖沙咀中心地下嘅 PHI COFFEE & PANCAKE近期推出嘅泰式風味晚餐。餐廳裝修走簡約清新風，白色同木色調為主，坐得舒舒服服，好啱傾下計慢慢嘆。椰香冬蔭功海鮮意粉真係好惹味！冬蔭功個湯底酸酸辣辣，帶少少椰香，掛喺條意粉上，味道濃郁但唔會搶晒海鮮味,大蝦同青口都新鮮爽口，肉質彈牙. 漢堡扒全日早餐分量都幾足，漢堡扒Juicy又夠厚身，切開仲流住肉汁，好香口。配埋煙三文魚、香腸、牛油果同多士，整個組合好滿足。牛油果，煙三文魚同多士呢個組合健康得黎又好味。 糯米芒芒椰奶沙冰，呢杯真係夏天救星，打出嚟又香又滑。朋友嗌嘅羅勒檸檬特飲清新解渴，酸酸地帶微甜，飲完成個人口氣好清爽，好適合配重口味嘅冬蔭功。 甜品係泰式梳乎芒果糯米飯。賣相好靚，梳乎厘好有空氣感，軟綿綿嘅梳乎厘同香甜熟透嘅芒果，配上椰香糯米飯，入口煙靱但又唔會硬，仲帶住啖啖椰香，食落去清甜又唔膩，好有泰國熱情風味。