餐牌有甜班戟，季節限定班戟，Mont Blanc班戟，鹹班戟，慢煮系列主菜，輕食餐，同飲品。尋日放題食嘅野仲飽緊，今日食得輕盈啲，只係叫左一個丼同一份班戟兩個人分。
蟹王丼 $198 另加一
呢個係丼飯及蟹粉限定之選。用一個井字木架上枱，不過其實唔太熱，份量的骰。白飯呈瘦長形，似絲苗米。上面有蟹肉蟹粉蟹籽，仲有一隻温泉蛋，再灑上少少紫菜絲。餐牌話厨師精選5款時令當造螃蟹生拆嘅蟹膏，蟹肉，蟹油而成蟹粉。撈埋蛋汁食滑啲。
丼飯包餐湯，沙律，冷熱麥茶。
餐湯係粟米忌廉湯，加左少少香草，帶少少梛漿味。
沙律係沙律菜加胡麻醬。餐湯同沙律份量的骼。
麥茶叫左熱，好香麥味。
日本楓糖洋梨班戟 $138 另加一
日本楓糖洋梨班戟係原味班戟底上面有梨肉，外圍加左白色厚身忌廉，一球雲呢拿雪糕，再加上好香嘅楓糖漿，碟邊有少少梨肉圍邊，賣相不俗。
班戟好鬆軟，配香滑忌廉好味道，而楓糖嘅甜度適當又香。梨肉脆脆哋。成份甜品都幾輕盈，一人一半絕對唔夠喉。
如果正常餓度，呢個份量應該唔夠兩個人食。
環境都唔錯，今日坐係門口近假樹，適合影相打卡。
