2
中環H Queen's 頂層26樓新開澳洲扒房 Omaroo Grill
主菜點選了足1公斤的澳洲濕式熟成有骨肉眼扒，真心好大份，3個大男人食都覺得好夠份量，而且熟度好好，外邊烤到焦脆，裡邊保持到好有肉汁，同埋Rib Eye帶骨有兩個亮點，第一係帶骨位特別濃肉味，而第二係側邊肥膏位烤到焦香，真心正。
頭盤好推薦 北海道香煎原隻帆立貝，用煙肉包住，非常香脆，底下有自家製西班牙辣肉腸XO醬，帶出到帶子既鮮甜味。帶子本體非常肥厚，煎完無縮水，勁漲卜卜！用麵包沾埋d汁食，正！
另一款主菜 香脆薯仔威靈頓，配香蘑菇濃湯，嘩呢個好有驚喜，店員會係你面前淋上熱辣辣既蘑菇濃湯，一切開酥皮就會見到好大好大好大隻炭燒蘑菇Portobello，仲有忌廉菠菜同芝士。講真你當佢一個side dish 3-4人分又得，當main course食都得！天氣凍凍地食呢個真心好飽肚暖胃！
甜品 即焗芒果熱情果梳乎厘 配 雲呢拿汁 及 軟芝士 。店員一上台 已經好香蛋味好想食，然後影完相會切開倒入雲呢拿汁同軟芝士。一罷入口，冰心既口感無得輸，話就話係兩人份，但其實我好想一個人食晒！！！
食完埋單，已經諗緊lunch再黎睇下佢日頭景有幾靚！推！
