SUKIYA すき家 (亞皆老街)

Open Now

Now Closed

記得岩岩開嗰陣，依間過江龍排隊排好長好誇張咁。今次咁岩出開旺角食午飯，見淨係得兩三個人排隊，就諗住試下。其實佢間鋪唔算細，但感覺上坐嘅位置比較少，格局有啲奇怪。不過好彩今次黎等得唔耐，同埋見啲人都食得好快，食完就走。餐牌都頗多選擇，除左牛丼之外仲有燒肉飯/咖喱飯，不過第一次黎當然諗住試下牛肉飯。我叫左最普通嘅牛丼(M size $29)，雖然話係M size但對我黎講已經好夠食。而且見如果叫L size嘅話就要貴多$10，我覺得個價錢都差幾遠下。至於味道方面，其實坦白講我覺得同吉野家差唔多😂 不過依度啲飯汁都幾多，成碗飯佈滿牛肉汁，唔似吉野家咁啲汁勁少完全唔夠撈飯，每次都要主動叫加汁....而且依度嘅牛肉同洋蔥分量感覺上都比較多。雖然味道唔係話非常驚艷，但M size依個價錢係抵食嘅。不過如果話要大排長龍我就覺得誇張左，講到底都係一碗普通牛肉飯，印象亦都唔係特別深刻。或者下次有機會黎嘅話我會試下其他飯。結論係可以一試，但如果見到好多人排隊嘅話我就唔會揀佢喇。