肉浦團火鍋放題 (Closed)

朋友話想打邊爐,揀左旺角女人街呢間肉蒲團火鍋放題。餐廳環境幾好,乾淨企理,座位好寬敞。電影主題裝修好有心思, 牆身有唔同經典電影海報創作,好特別。店員服務好好,見到湯底唔夠會主動加湯,收碟好快手,又會幫手排返好枱上嘅碟,值得讚一讚。今次揀左M5M8和牛set ($368) 入座嘅時候揀埋湯底,當日湯底有7款,我地揀左清酒味噌卜卜蜆湯, 蜆的份量都唔少,食落無沙,清酒會另外分開一壺俾我地自己加,加湯嘅時候可以自己加返少少。呢個set牛肉嘅種類唔少, 澳洲和牛、澳洲穀飼牛、美國安格斯牛,又有唔同部位,其他仲有豬、雞、海鮮等等。我地每款牛肉都叫左試試,最推薦澳洲 M8臀腰肉心,咬落有口感,牛味都唔錯,M5和牛牛肩胛和美國安格斯牛板腱都唔錯,牛味濃。其他推薦仲有原隻魷魚、廣島蠔、牛骨髓,比較特別。自助區超多選擇,比其他火鍋放題多,有唔同類型嘅菜、丸、響鈴、炸魚皮和其他即食炸物。飲品選擇都好多。最後每人一杯haagen-dazs雪糕,好滿足。