白宮咖啡室 (Closed)

去完荃灣廣場睇完戲 就過咗呢後面呢間cafe 白宮 初頭以為舖頭好細 原來2樓仲有空間 我哋上咗2樓坐 隔離仲有影相區可以畀你打卡影相添 小食叫咗個蜜糖雞翼雞翼有5隻 佢本身好嘢味 之後上面加上蜂蜜 注意係蜂蜜！好香嘅味道同普通蜜糖完全唔同！明太子三文魚子煙三文魚意粉 呢度菜有幾種海鮮加埋 但係味道都好夾 煙三文魚整到成個花咁 好靚 再加上巨型嘅三文魚子 啖啖鮮味 而明太子就加咗落忌廉汁嗰度同意粉煮埋一齊 明太子嘅風味好搶 慢煮安格斯肉眼扒 牛扒好大塊 而且厚身 差唔多有一吋 切開入面係好吸引人嘅粉紅色 而且肉質好軟淋 咬落口仲好多肉汁 加上粗薯條 脆卜卜 仲有少少沙律 可以畀你消滯 黎到cafe 梗係要嗌番杯靚嘢飲 我就叫咗紫薯拿鐵 隻味淡淡地 不過飲落口好舒服 奶味好香 男朋友就叫咗蜂蜜朱古力 蜂蜜味好香微甜 加上朱古力 都幾夾 最特別係有line嘅公仔 雖然我唔係粉絲 但係都覺得好得意