佢喺每一道菜之前，都會有一段投射嘅影片，每段影片都符合嚟緊嗰道菜嘅主題。畫面非常優美，絕對係視覺嘅享受。而且亦都令你沉浸喺嗰道菜嘅空間嘅感覺。
Burrata
小廚師從田裏拔出蔬菜，畫面清新療癒。仲有蝴蝶飛舞。
味道方面，Mozzarella Cheese 淡淡嘅奶味同忌廉味，就算唔鍾意芝士味嘅朋友都會比較容易入口。蕃茄清甜，成件事都好清新。
Bouillabaisse
畫面去到馬賽嘅海港，小廚師與八爪魚奮鬥。
龍蝦湯味道鮮甜，符合預期。上面仲有魚子醬，同埋頗多嘅海鮮喺湯入面可以食。
Canard En Papillote
呢道菜麻麻。畫面係小廚師去咗森林原野，用各種材料整燒雞。令人期待下道菜係燒雞，但只係類似紙包雞用膠袋裝住，味道十分普通。雞又唔滑，個汁只係快餐店水準。
佢有個黑松露可以自己刨，但無論刨左幾多，都係食唔到黑松露嘅味道。呢碟係全晚最失望，個味道普通到唔應該係呢d 場合出現。
👌🏼Steak Au Poivre
澳洲和牛西冷扒，牛扒生熟度啱啱好，比較厚身同有咬口，唔係和牛果種非常柔軟嘅口感，但又未至於好硬實，整體還可以。另外仲有鵝肝，不過就煎得有啲太熟。
👌🏼Vanilla Cream Brulee
可以自己用火槍燒焦糖。自己燒唔識掌握火候，結果外皮太硬。味道就可以。
整體嚟講，食物唔算係好特別好驚喜，但係又唔係伏。雖然價錢偏貴，但結合埋各種視覺享受同互動元素，同朋友都享受咗一個好好玩嘅夜晚。
