Sunprime Cafe (Closed)

其實好耐之前上工廈覓食已經見到佢，不過見一大道木門常關就無入到去試，情人節搵搵下又見到menu唔差就揀左試下。唔係好大間不過座位舒服，牆上面有貼上左果排既晚餐，牆上面有畫起左店名，加上陽光同花成個感覺好sunshine。入到去發現都唔少人，兩個人都係$520，先黎前菜《燒日本帶子配黑魚子醬》帶子燒完後變到幾細隻，沙律配上左檸檬油醋汁又幾清新。湯有《廣島蠔湯》將蠔打碎左先煮，一飲個蠔味真係幾重幾濃，成個湯都幾厚身。另一款《嫩鴨雜菜清湯》，入面都有好多鴨絲，加左雜菜清清地唔錯。主菜係《美國安格斯肉眼》五成已經切好左上方便食，不過再切下發現好多根位同咬落肉質都韌左少少，配左個《南瓜利可他芝士酥皮卷》，酥皮夠脆芝士好多食完都幾漏。另外有整到心心型既蘿蔔好有心思。第二道《香煎海鱸魚柳配海膽忌廉汁天使麵》，魚皮煎得香脆魚都夠滑，天使麵無拿埋一舊海膽汁都夠濃沾滿天使麵。野飲杯朱古力真係超推介，見到勁濃已經覺得好足料，飲落真係勁好飲朱古力味好重又唔會過甜，飲到尾仲有好多朱古力溶左係度。甜品《朱古力布朗尼配熱情果雪糕》，布朗尼外層太硬，但入面軟身朱古力味濃。熱情果雪糕足料真係咬到果籽，酸酸地中和下甜味。