漁吉海鮮丼專門店 (Moved) New Location

人人黎九龍城食泰國菜，唔通人人黎九龍城都食泰國菜咩！我哋今次就特別啲，唔食泰國菜，揀咗呢間新開嘅日本餐廳食晚飯。首先，你以為日本餐廳有綠茶飲，咁你就錯啦，呢度綠茶變左做味噌湯，壺湯擺咗喺枱面，斟之前搖一搖，將湯搖勻，可以無限添飲。服務員超有禮貌，送餐時會向逐個食客介紹嘢食同埋要點樣食。我哋叫咗兩個丼飯，同兩個小食。丼飯極大碗，碗碗都超多蟹籽多到好似倒瀉左。特選丼有左口邊, 三文魚, 白肉豚, 台立, 櫻花魷魚, 帆立貝, 赤蝦, 三文魚籽, 海膽, 蟹籽, 玉子好豐富！櫻花魷魚味道好特別，有少少似甜蝦嗰種鮮甜，又有櫻花香味食落甘甘地。豪快丼就有三文魚, 油甘魚, 白肉豚, 甜蝦, 帆立貝, 蟹籽, 玉子, 一樣都係大大碗。牛脷係真厚切！多肉汁幾嫩口，又多蒜又多蔥，最特別係個柚子醬，幾清新酸酸地鹹鹹地。清酒煮蜆，有20幾隻蜆，加埋韓國粉絲，酒味很濃郁。