阿妮沙茶麵 (Closed)

尋日同男朋友去食，見到雖然冇乜裝修，但勝在ok平，男朋友叫了一個招牌菜沙茶麵加豬大腸，我就叫了蚵仔麵線，之後仲加左個小食細蚵仔煎(我覺得兩個人係食唔晒)。我發覺D蚵仔麵線冇平時果D個獻咁杰，D蚵仔又好味，我試左粒豬大腸，冇臭wor，因為試過豬大腸整得唔好食會臭。食食下發現廚房有人用攪伴機(唔係果汁果D)攪緊D黃色物體，之後發現廚師走左出黎就問下佢，原來果D係蒜頭! 仲有其他配料，跟住佢就指住我碗麵線話就係落左落去。之後同廚師幾好傾，我仲知道原來個蚵仔煎係用番薯粉將D蚵仔chi埋一齊，佢又介紹我地食個$8的冰鎮茫果，係青色架!有D冰o係上面，佢話D台灣茫果係未熟就摘落黎再一包包運番黎，不過一D都唔酸，原來D冰其實係糖水!好好味好特別，好似細個食果D冰鎮木瓜呢。下次要食佢個棕，佢話連D米都一齊鹵所以咁深色!我覺得呢間野其實幾有heart，飲食男女都介紹過，但唔知點解冇乜人幫襯，連食評都冇！希望寫咁多字可以幫佢平反下啦。