喺熟食市場食印度嘢，點都要踏出第一步去試下，返嚟嘅感覺係好值嘅，而且今後仲會成日encore𠻹！
食過幾次印度料理，學識咗「唔食set lunch嗰啲咖喱是常識吧？」
【 Chicken Tikka Masala 】4.5★
癲覆咗一向對Masala嘅印象，平時食開嘅係偏紅色帶啲酸味茄味。但呢度竟然走黃薑風格出場，係第一次見。
Chicken Tikka 係真係烤制過先俾你，雖然浸喺咖喱度，仍然食得到tikka風味。
撇除選擇喜好，就咁睇CP值呢款算係最抵食，因為起碼啲雞肉要做多層工夫。
【 Butter Chicken 】4.0★
牛油雞：相信係最入門大眾化最易入口嘅一款，標準橙黃色係其icon。
第一次冇頭緒食乜揀呢款就冇死喇。
【 Saag Chicken 】3.5★
蔬菜雞：呢間註明只係Saag，即係菜（唔知同Saagwala有冇分別），
但冇講明係Palek全菠菜，味道中規中矩，有可能淨用菠菜會較好味，呢款就望落靚仔開胃，都唔差啦！
【 Chana Masala 】4.0★
鷹嘴豆：我懷疑本地人唔多捧鷹咀豆場，但我食咖喱一定會食返次。賣相＆口味都不俗！飽肚感拍得住肉類。
【 Saag Mutton 】3.0★
蔬菜羊：本身唔太好羊所以唔識講，留意到一轉做「羊」，碟蔬菜色即加深顏色，明顯已經唔係油綠色。
雖然黑炆炆，但仍會見到有咖喱嘅黃色滴出嚟嘅。
【 Saag Chicken 】(Big Spicy) 4.0★
蔬菜雞：同一款雞（換咗兜）呢個只係提高咗辣度，但就又係變深色咗，係吊起多少少咖喱層次但賣相冇咁靚仔哈！
Tandoori Chicken 3.0 ★
好似略為乾身咗啲＆略為冇咁惹味。
⭕️呢間辣度可能都係偏向本地人口味比較輕，食得辣嘅不妨大膽叫大辣，而中辣我就覺得係基本。
⭕️呢度啲咖喱份量（散叫）相信絕對足夠，就算麻甩佬都冇問題。一兜一定夠serve一份Naan有凸，或者仲夠你淨舐幾口咖喱汁𠻹！
基於呢個Volume，我覺得價錢非常合理。
⭕️ 咖喱絕對夠杰身，足夠洋荵，唔會水汪汪又稀，又唔會油膩膩，真材實料。
⭕️ 炒飯暫時未試
⭕️ 熟食市場環境雖然好極有限，但勝在已有心理準備，而且個場午市好多鋪都冇開，呢間鋪又多數冇乜人實唔駛等位，具有餐廳難得嘅寧謐。
而且至少檯櫈夠闊舒服進食，餐具有蓋冚好，極少機會隔離有人或搭檯。我寧願咁樣喇〜〜
