之前已經留意到呢間餐廳，今次特登嚟呢度食，貪呢度無乜人
餐廳係樓上鋪，我哋喺留吓望望有咩食，其實都象徵式做個樣望望餐牌，見到二人餐都幾抵食$84，我哋就手牽手入去食
上到去唔算多人，冷氣好夠凍，起碼有四五部電視安裝喺唔同位置讓食客邊食邊睇電視，左揭右睇最抵都係二人餐包兩個碗湯、兩個小菜、兩碗白飯、兩杯飲品(注意：凍飲係唔駛加錢，試問依家邊間餐廳凍飲係唔駛加錢呀？係咪值得嚟先:))
摯愛揀咗中湯，佢估計係紅蘿蔔豬骨湯，應該係日日唔同o架，而我就揀咗西湯羅宋湯，個湯好稠(所謂o既"杰")唔會好稀，夠味又多渣！
白飯其實無乜必要影，但真係又實又大碗，我就食唔晒lu
單叫小菜係$43，估唔到啲豬頸肉同四季豆o既比例係一半一半，好多肉呀，又唔係肥肉，不過就多油咗少少，請廚房師父下次比少啲油呀，唔該:)
名符其實係有枝竹、火腩、豆腐，全部比例都係一樣，唔會有一款搶晒風頭，枝竹索晒啲汁o既味道，火腩又唔會太肥，正
我哋加咗$8點咗個菜，絕對唔係平時去食麵加幾蚊白灼菜o既份量，係酒樓炒出嚟嗰隻o既份量呀，真係抵到爛啦
我唔記得影我哋兩杯飲品呀，因為最後先上枱，摯愛係飲紅豆冰，凍飲唔駛加錢之餘呢款都算係特飲呀，都唔駛加錢，餐廳所謂叫套餐轉特飲都係加$8，而我本來係叫熱朱古力，但嚟咗凍朱古力，我見唔駛加錢就算啦，個杯好大應該有500ml(即大約兩包250ml紙包飲品)
我唔知應該點sale呢間餐廳好，喺我同摯愛o既角度真係覺得超抵，平時我哋去廳餐、食米線、叫小菜......都唔止呢個價錢，呢度環境唔差o架，位又多，重有VIP Room，咁平點解都無乜人嚟幫襯呢？定係咁啱我哋呢日嚟&呢個時間(大約20:00)係無乜人呢？and then，呢度重有得睇足球直播o架，最低消息都係每位$60，落bar都唔得啦，呢度又坐得舒服。最貼心係佢會為行動不便人士著想，有專用o既lift，老闆好細心喔
一定要嚟試吓呀，長沙灣都有分店o架~
