極品靚鍋 (Closed)

已經食過幾次，今次試咗佢哋嘅套餐B，揀咗鴛鴦鍋，一個係海底椰雪耳竹絲雞湯，一個係家鄉胡椒酸菜豬骨湯，兩個湯底都真材實料， 十分鮮味，食唔到味精，前者夠滋潤後者夠惹味，打邊爐真係最緊要湯底夠味，呢度啲湯底清甜到要係淥野之前幾碗湯先。個套餐可以飲食嘅item好多，必食嘅就梗係幾款靚牛，美國封門柳淥幾秒就食得，牛肉味濃，入口即溶。至於安格斯肥牛，肥瘦均勻，油花豐富。除咗靚牛之外，西班牙豬梅肉片都好高質，每塊都切得好薄，嫩滑肉濃。除咗肉之外，仲有好多新鮮海鮮可以任食，最正嘅係超大隻新鮮海蝦，好彈牙，叫左好幾round！仲有韓國濟州蠔，一樣好大隻，好肥美！ 另外蟹子手打墨魚滑都係必食，自家製，所以質感零舍爽滑彈牙，每一口都食到嘅爽脆。除咗嘢食之外，飲品都絕對高質，有好多選擇，食完打邊爐都想飲番d野潤下個喉嚨，呢度自家製夏枯草涼茶同冰糖雪梨茶，真材實料，飲得出係冇添加，唔會太甜，飲完喉嚨即刻舒服晒！值得一題呢度啲啲侍應做嘢好快手，經常主動過嚟收碟。