不得不提既係入到去全部都係卡位，氣氛都好好🤭都不禁讚嘆一下，對於鐘意坐卡位既人真係一大福音;好多放題店都好逼，啲野食黎到都無位放。
一去到就開始order野食，落單紙由a至k，前盤去到甜品咩都有，連火鍋都有！不過驚食唔晒就無叫，認真包羅萬有。
落左order唔洗5分鐘已經上緊前菜同刺身，效率真係夠晒高，叫同黎既數量都無多無少！ 刺身厚度啱啱好唔會食到好膩，味道都夠新鮮，帶子,珍寶赤蝦同三文魚真係非常推薦👍🏻👍🏻
壽司大細非常合理，叫多幾舊都唔怕！雖然食到咁上下就發現漏左手卷無黎到，不過都有壽司補翻數。 黑松露系列壽司一定要試下，松露份量好夠，加埋刺身食真係好正！😵
好快就黎埋其他野食。雖然速度快，但全部野食都係岀煙咁熱，唔會凍冰冰！
非常推薦香蒜煙肉焗北海道帆立貝同和風芝士焗廣島蠔！牛油香，蒜蓉夠多，啱晒我口味！帶子同蠔都焗得啱啱好，唔會太熟，而且一啖一隻好正！
見到有日式花蟹粥就叫黎試一試，好貼心咁加左胡椒粉，有好多粟米令到個粥口感好豐富，味就更鮮。雖然睇佢細細碗，裏面真係有半隻蟹係度！
士多啤梨骨同安格斯牛柳粒好夠味，但分量真係好多，同朋友好落力先食得晒😂士多啤梨骨味道好特別，熱食仲有少少脆。牛柳粒京蔥同牛味都好濃！
串燒方面，冬菇串燒燒得好多汁！羊架燒得夠淋，而且唔肥，都一樣好juicy!
最後仲叫埋炸物，所有炸物個炸皮都唔會好厚，一口炸豆腐外脆內軟，而且裏面豆腐又滑又熱辣辣好正！串燒蝦都好新鮮好大隻。榴蓮炸彈一咬落去好有空氣感，啲榴蓮蓉就係裹面流岀黎！
最後既最後就當然係甜品，一人可以揀一款，我地就揀左牛奶奶凍同迷你心太軟。奶凍滑，奶味重，又唔太甜！心太軟雖然細細個，但朱古力味好濃，軟心效果都做得到，但就有少少太甜。
整體黎講，質素幾好而且環境感覺唔錯，午市都無令我失望，又可以慢慢食！佢地仲有$10生蠔，仲有泰式主題既料理，不過我就無叫，因為有好多野食都未叫得晒。雖然係放題，又有咁多款野食，但⼀啲都唔求其，下次有機會會再食！
