B.Duck & Buffy 德記茶樓 (Closed)

第一次去食卡通主題點心，嚟之前都擔心食物會又貴又唔飽，得個樣，但係食完好有驚喜，價錢好合理，而且份量好大，比想像中多，差 啲食唔曬㖭。呢度嘅環境已經加曬分，餐廳嘅所有佈置都充滿著b duck ＆buffy卡通，小朋友好興奮。店員都好友善，有笑容。除咗點心之外，呢度都有唔少主菜，所以一定食得飽肚，比起其他中式餐廳，價錢仲算優惠添。最驚喜係蒸鱸魚，魚肉肉質滑嫩，醬汁酸酸甜甜辣辣，好好味。鳳爪排骨蒸飯原本以為好似酒樓咁，細細盅，點知係用竹筒裝住，飯量超多，所以都食淨咗少少。當然仲嗌咗好多點心，例如蛋撻同奶皇包，都有b duck嘅公仔喺上面，好可愛。海膽沙律甜筒都好特別，賣相好似雪糕甜筒，上面有啲海膽甜筒，裏面係蘋果沙律，酸酸甜甜好開胃。