酒吧地方寬敞，枱同枱之間空間好夠，有好多大枱，仲有桌球玩，好適合成班朋友開party。
Flower Market係蝶豆花加檸檬，有一杯小小嘅檸檬汁加糖漿，加入後攪勻就會由藍變紫，好夢幻。蝶豆花本身冇咩味道，所以飲落檸檬味比較突出，酸酸甜甜幾清新。
朋友本來想叫Thaijito，感覺好有新意，但冇香茅所以整唔到，唯有叫Mojito， 薄荷味較重，味道清爽。
蒜辣雞翼條非常有驚喜，開邊雞翼經過醃製，味道香濃，外皮炸得酥脆，加上蒜粉，非常之惹味！
同朋友一人點咗一份set meal，先送到嘅係簡單嘅沙律，以沙律菜同青瓜為主，淋上小量日式芝麻醬，清新開胃。
南瓜湯味道濃郁，質地微稠，入口非常creamy，我同朋友都大愛。
燒羊鞍質感嫩滑，幾乎入口即溶，加入香草芥末配露絲瑪莉汁，食落一啲都唔羶，如果份量大啲就完美。
肉眼扒五成熟，色澤粉嫩而且一啲血絲都冇，入口肉汁豐富，肉味突出，水準唔錯，如果厚啲就更好。另外必須一讚佢嘅伴碟，炸蓮藕片非常酥脆，味道帶有絲絲微甜，食多幾塊都唔會膩。
酒吧地方大又有私隱度，空間感媲美party room，同朋友開party嘅話都係一個好選擇。
