湘川滬 (粉嶺中心)

Open Now

Now Closed

呢間嘢真係超抵食，食物質素水準有高，真係不得不讚。今次因為香港運動，所以我哋晏咗到餐廳。估唔到反而因禍得福，因為呢度八點半打後， 加十蚊就可以任食四色小籠包 真係超抵呀。 我哋叫咗個二人餐超抵食仲包咗兩個燉湯。 分別係花膠螺頭燉湯同埋人參蟲草花燉排骨。 兩度湯都好清好好味，又夠足料，絕對冇加味精， 非常好飲。 前菜就有四喜烤麩同埋蔥油海蜇。海蜇好新鮮彈牙，鮮味十足。烤麩就好特別，食落唔油， 送飯一流。 主菜叫咗醬炒年糕軟殼蟹，估唔到中式餐廳都有呢啲咁特色嘅fusion菜， 味道非常惹味，而且大大碟，夠曬飽肚。 另一款朋友就叫咗醬爆跳跳蛙， 我就唔係好食田雞嘅，不過都聞到成碟嘢炒得好香口。朋友話田雞肉非常之甜，再加上辣辣地嘅味道，配搭一流。 加咗一度必食嘅醉雞。醉雞係黃油雞，睇到一層啫喱喺啲皮度，非常嫩滑。而且花雕酒量適中，食落唔會太濃味。 最後當然唔少得加十蚊嘅小籠包啦。有四款任揀，不過我哋叫咗一籠已經飽到投晒降。 每款都各有特色，而且皮薄餡靚， 最好食當然係黑松露芝士味，味道濃郁，入口散發著陣陣嘅黑松露香。