百花漁莊 (Closed)

灣仔QRE Plaza嘅百花漁莊主打粥底火鍋，最近推出咗個百花齊放火鍋放題套餐幾抵食，2個成人仲可以帶1位5歲以下小童免費享用，啱哂我同老婆帶埋囝囝三個去食。😆百花漁莊喺QRE Plaza 28樓，大部分座位都係貼住大玻璃，可外望到灣仔市景，裝修雅致舒適。可能因為餐廳推出緊優惠，我哋7點左右入座時都已經差唔多滿座。😯百花齊放套餐 $328/位呢個套餐係一個150分鐘放題，時間相當充裕。火鍋湯底任選而且可以雙拼，我哋揀咗餐廳出名嘅滿粥鍋同埋啱囝囝食嘅野菌豆乳湯底。套餐包咗海鮮鮮肉拼盤，包括安格斯牛肉同鮑魚、帶子等海鮮。海鮮夠新鮮，鮑魚同帶子都好厚肉鮮甜，安格斯牛肉油花都幾均勻，肉質軟嫩，質素都唔錯。😋蝦餃、燒賣同灌湯餃等多款手工點心同埋小菜都可以任點任食，當中用碟裝嘅傳統灌湯餃真係少見。火鍋配料同飲品亦都係任食任飲，仲包埋每位一杯嘅Häagen-Dazs。性價比非常高。👍🏻另外，喺OpenRicen有得買85折現金券，用優惠價$425買5張$100現金券，不過睇條款套餐應該用唔到。😁