俗語有云辛苦搵黎自在食，返工辛苦過後梗係食餐好的慰勞下自己。最近工作上波折重重，幾經辛苦終於完成左，唔食返餐好的又點對得住自己呀!
呢間燒肉店人氣吾錯，除左主打鹿兒島和牛外，仲有一款聽個名就已經好吸引的[4%奇跡之牛]，所以豪不猶疑咁選左呢間餐廳做今次的"慰勞宴"。
餐廳位置相當方便，地鐵站出口一分鐘距離，環境有格調而且寬敞，感覺唔會局促。為左試[4%奇跡之牛]，點左一份[極上烤肉二人套餐]，雖然價錢唔平，但成個套餐相當豐富，只係烤肉已經有六款包括4%奇跡之牛極上牛肩肉，薩摩牛上等牛赤肉，薩摩牛上等牛肋肉，薩摩牛Sukiyaki上等牛腰背肉，極上牛舌(鹽燒)，及是日精選牛扒。除此之外仲有前菜，牛肉湯，牛肉沙律，白飯，甜品同餐飲，真係十分豐盛的套餐。
上菜速度十分快，先上牛肉湯及牛肉沙律。牛肉湯鮮甜牛味重，牛展炆得夠腍。而沙律新鮮份量大大份，配上黑酯十分開胃又解膩。
之後我最期待的畫面出現了~
左上: 是日精選(西冷牛肉粒)
右上: 極上牛舌(鹽燒)
中間: 4%奇跡之牛極上牛肩肉
左下: 薩摩牛上等牛赤肉
右下: 薩摩牛上等牛肋肉
最後就是薩摩牛Sukiyaki上等牛腰背肉，還附上生蛋，檸檬，鹽及醬油，可按個人喜好做出吾同食法。
最最最喜愛的一定是主角 4%奇跡之牛極上牛肩肉，只係外觀已經令人流口水，雪花分佈十分均勻及偏多，輕輕燒過後油香味已經飄晒出黎，入口即溶和油香味完全充滿著整個口，好味程度真係非筆墨能形容。
薩摩牛Sukiyaki上等牛腰背肉同樣喜歡，雪花紋無4%奇跡之牛咁多，所以牛肉味相對較重，但由於薄切的關係，同樣都有入口即溶的效果。
而薩摩牛上等牛肋肉就是太太的最愛，雪花同肉的比例各佔一半，牛肉味同油香味的比例剛剛好，而且又夠腍口。
極上牛舌亦吾錯，十分爽口。
順帶一提，職員會細心的提議品的先後次序，亦會為客人烤肉。對烤肉無信心的客人，就無需擔心因手殘而糟蹋了高級的肉了。
