正 麻辣·茶·雲吞 (Closed)

長沙灣好多重建項目，其中蘇屋邨重建就快完成，呢條斜路卻數十年不變。喺呢條斜路上，卻又偶然發現呢間小店有中$25嘅茶餐，立即gogogo。小店坐位不多，但乾淨企理，光猛十足，最喜歡佢樓底超高，成二十呎高嘅樓底真的少有，所以空間感十足。坐低即刻叫左個茶餐，有撈雲吞一碟同埋一杯飲料，上枱時睇得出雲吞喺小店自己製作，唔係外面批發式採購番嚟，有五粒不同餡料雲吞，肉汁菜味十足，雖然收費便宜，但是呢碟撈雲吞卻是一絲不苟，雲吞上面都鋪有嘢味嘅BB蝦殻，再加上新鮮芫茜，簡單得嚟又有心思。飮品係一杯羅漢果野生靈芝茶，全天然材料，飲落感覺舒服。跟著又叫碗$42嘅珍珠雲吞擔擔麵，麵條煙肋適中，湯底味道濃郁，珍珠雲吞炸到脆卜卜，好味道。