Chop Chop 食神叉燒 (新城市廣場) (Closed)

「叉燒啊～好好味嘅叉燒啊」呢句經典對白耳熟能詳，食神叉燒夠膽用食神之名去開舖，就吸引咗我去食。位置係新城市廣場三期、一田樓上。店舖面積都唔算細，容納到20幾人，枱與枱中間空間都算闊。不過唔知點解，店內所有餐具都係即棄，有少少唔環保。食神黯然銷魂飯 $79店員話叉燒每日分五段時間出爐，撞正新鮮出爐嘅叉燒真係正！叉燒肥瘦適中，燒得外脆內淋，入口有口感但唔會太軔。煎蛋整得好靚，好似假嘅一樣。一篤開中間蛋黃流晒出嚟，撈埋個黯然銷魂汁食，餸飯一流。食神乾炒牛河 $75同一般茶記乾炒牛河好唔同，上面鋪咗日式木魚好香。炒河非常足料，牛肉仲多過河粉。牛肉質地夠淋，醃得入味。河粉除咗比較碎，調味都OK，唔會過份油膩。雙併燒味 $109 （切雞、燒鵝）切雞好滑溜，肥瘦適中，雞味濃郁，調味剛好唔會過份鹹，就咁食唔洗配飯都得！燒鵝烤得香脆，油香味十足，有淡淡煙薰味，正宗港式燒鵝味道。