新光海鮮酒家 (Closed)

新光酒樓係屋苑茶樓，都有唔少老人家常客。龍蟠苑近日有人確診肺炎，令到少咗人去茶樓食嘢。我因為要去附近辦事處，所以順便食個午飯。新光嘅點心質素同服務就麻麻地，不過價錢比起其他連鎖式酒樓或點心專門店便宜。千絲蘿蔔酥- 唔熱嘅蘿蔔酥。口感過硬，蘿蔔餡料份量唔多，味道尚可。百花釀魚肚- 呢個點心味道太鹹，完全食唔到魚肚同蝦滑嘅原味。蝦滑應該加咗唔少肥豬肉落去，冇蝦味。燕麥流沙包- 唯一嘅推介！流沙包新鮮蒸起，食起上嚟軟綿綿嘅，內餡奶黃味道豐富，有淡淡的鹹蛋黃香味，質感非常流心，食嘅時候要注意，小心辣親。八星點心拼盤- 拼盤唔差，有蝦餃、燒賣、叉燒包、素翅餃同千層香芋糕。樣樣都幾好食，香芋糕做甜品作一餐嘅完結好滿足。雞絲粉皮- 醬汁係芝麻醬，少咗一份鹹味，令味道失衡。如果加啲醬油，應該會好味好多。