Three on Canton

我上次食係2月份，今次見有8折所以拿拿聲book左先，過左一個星期就冇左8折優惠。唔好意思冇影到相，因為遲左黎有啲真係唔記得影。先講頭盤，沙律檔好細，我搵唔到煙三文魚，沙律菜得生菜同牛油菜，成個檔係求其到不如俾百零蚊去出面西餐廳食沙律仲好。食buffet最愛嘅海鮮不外乎龍蝦同生蠔，一心諗住最少都食半打蠔，但係食到第4隻我已經放棄。係我鍾意嘅法國蠔，不過完全係冇鮮味。係即開呀，但食落口個感覺係放左好耐咁。龍蝦啲色澤係好暗，又係唔知放左幾耐😵食左一隻冇食。熱食我冇掂過，因為冇一樣吸引到我拎黎食。燒味檔嘅片皮鴨，我見到師父喺蒸籠拎出黎嘅片係乾到佢自己都接受唔到，掉左幾塊。鴨係正常，但啲片好難食。肉檔有羊架、和牛同鵝肝。3樣都係正常，食得最多係鴨肝，配蘋果醬可以去油膩感，和牛燒得啱啱好，羊架亦好入味。整餐黎講最正常同好味嘅食物係喺呢度。甜品正常，但選擇不多，我覺得最好食係佢嘅朱古力撻。最怪係朱古力布朗尼加提子乾，我比較鍾意平時食開加nuts嘅版本。雪糕係Haagen Dazs，杯裝得士多啤梨、朱古力同雲尼拿，雪糕批有粉紅脆皮芒果味同脆皮焦糖咖啡味。我就食左兩條雪糕批，呢個係眾多較為回本嘅食物。