記得我第一次去"松本"，係因為我地一行八人，口味各有不同，一啲就想食日本嘢，一啲就想打邊爐、一啲就想食海鮮，唉！令到就得人嘅我相當苦惱，突然比我諗到一間(其實係之前朋友推介過)，即刻攪掂班麻煩友，一於去試吓先！
一入到去，環境都好舒適，我即刻向侍應講，我地一定要食嘅嘢，其他就由大廚發板！第一道黎嘅係"藍龍蝦、花竹蝦刺身拼盤"，嘩！隻藍龍蝦同花竹蝦上枱時仲郁架，生猛到有d驚，明明係分割咗架嘛....啲魚生超新鮮、好鮮甜，再黎就係"焰拖羅"，入口即溶，我而家仲未搵到一間好食得過佢囉！"海膽壽司" ~ 日本運到，完全唔腥，唔同我平時食果d腥腥哋囉！
食完生嘅嘢，之後就有燒物，之後就到我嘅至愛....就係火鍋喇，湯底我地點咗鴛鴦鍋....龍蝦鍋 + 鮮魚白濃鍋，龍蝦鍋味度濃郁，而鮮魚白濃鍋就非常鮮甜，完全無落味精，好似我阿媽煲嘅魚湯咁，我朋友仲一次過飲咗兩大碗添呀！火鍋配料係我最鍾意嘅海鮮...有肥美大大隻桶蠔、出面好少有得食嘅大尿蝦、大廚手打嘅蝦滑、墨魚滑、雪花肥牛...仲有好多海鮮...數之不盡，食到極為暢快，去到尾聲已經好...好...好...飽，突然有碟好香芝士味嘅焗飯上枱，"藍龍蝦頭海鮮芝士焗飯"...原來仲有個飯囉，食落，嘩！好好味呀，真係唔停得口，我以為芝士焗飯一定好"漏"，點知原來唔係囉...唉！仲食咗兩碗添呀，真係估我唔到呀！
真係太飽，咪八啩周圍望吓，比我發現突然有人送海鮮黎，睇吓時間已經夜晚9點幾，點解仲有人送海鮮黎嘅？海鮮店已經收哂舖好耐啦，我一於八啩到底，一問之下，原來"松本鮨鍋"嘅老闆，亦都係灣仔鵝頸橋街市附近海鮮店嘅老闆，咁方便唔怪之得d海鮮可以新鮮到咁啦！最後就係甜品....燒菠籮...ok！滿足哂！
咁嘅價錢，一次過食哂咁多好款好味嘅嘢，對於三心二兩嘅我就至啱囉！
