名代宇奈備長炭燒鰻魚飯專門店 (希慎廣場) (Closed)

去日本多次，總係未食過鰻魚飯連鎖店「名代宇奈」（因為有太多其他餐廳更吸引），只知佢係平價高質店。自從知佢來香港開分店，一直都想試下，不過當然，又係一間長期排長龍店，有次係尖沙咀見到打左幾個蛇餅，真係嚇親，今次係銅鑼灣希慎，比想像中少人，人龍都去得好快，不過就係因為全部要搭枱，所以先咁快，唔鍾意搭枱的話就要三思。Menu好簡單，主打都係鰻魚飯，只係有唔同分量同presentation咁解。鰻魚重上（$138）有大約半條分量，一部分係魚腩，一部分係魚尾。魚腩部位好厚肉，肉質腍d油分多d，而魚尾就脆d香口d。香係幾香嘅，不過有個好大的問題，就係超多骨，每條都有1cm長，食起上來好唔方便，即使幾好食都係咁話。另一款係鰻魚飯三食（$88），平咁多係因為鰻魚分量少好多。三種食法係：鰻魚+飯、鰻魚+飯+wasabi、茶漬飯。雖然鰻魚細塊，但仍有多骨弊病，而加湯做茶漬飯，個湯都好淡，非常一般。即使大家唔怕骨，如果肚餓的話都要慎重考慮，因為落單後即整都要等最少15分鐘（爐頭同人手都少），要畀點耐性。