韓膳宮 (Closed)

最近好鍾意去通菜街嘅Deli²搵食，今日就揀咗位於一樓嘅韓膳宮。$88就可以享用韓燒放題，仲要唔使加一，真係要試吓。坐低之後，店員首先會奉上韓式前菜，佢嘅泡菜相當好食，另外我都鍾意佢嘅菠菜同芽菜，全部都係無限追加。 $88嘅放題會包括一份定食，我哋就揀咗新鮮牛肉，用嚟快炒都唔錯。其他肉類都相當豐富，我尤其鍾意五花腩同雞翼。雞扒同醬燒雞髀肉嘅味道都唔錯。廚師腸都好受歡迎，去到中段仲聽到店員話已經沽清。另外當然都要食吓蔬菜，南瓜同粟米平時就食得多，薯仔片都係第一次食，原來燒烤係咁好食。除此之外仲有生菜，用嚟包住肉類嚟食可以減去油膩感。另外仲有炸薯條，下次要帶埋阿仔嚟。除咗放題，仲有下午茶同午市套餐，全部都好抵食，難怪可以座無虛席。