一鍋豐 (Closed)

同事升職請食飯， 本來想去一間國內品牌火鍋店，但等唔到位就改嚟咗創興廣場，諗住佢夠多食肆。 我哋一路搭𨋢上，去到14樓、15樓、16樓都係超多人，但去到18樓呢間一鍋豐， 竟然可以有位直入。坐低睇一睇，價錢基本消費188蚊，比樓下嘅多30蚊，但佢好似勝在有魚生同刺身。我哋加多60蚊叫咗個鯊魚骨猴頭菇同胡椒豬肚湯底。 但我對湯底其實都幾失望，因為兩個都係淡而無味。魚生方面，唔算好新鮮。三文魚一啲都唔肥美。其他餸方面，手切肥牛一啲都唔肥牛，仲要好好睇住時間，因為淥多陣就一定會變得好奀。羊肉叫做好少少，不過都係太肥。牛筋腩好恐怖，成碟牛腩黑蚊蚊， 唔知喺雪櫃雪咗幾耐先拎出嚟。 另外，我啲牛筋呢？午餐肉應該係梅林牌，又霉，又林，一夾就散。魚皮好鹹，炸響鈴一啲都唔脆。 貢丸嘅雪味太重。手打蝦丸，太細粒，又無蝦味。菜方面，食返生菜比較穩陣啲。水餃都算正常。所以話，一定要 follow 民眾既智慧， 事出係必有因嘅。以後嚟到創興識揀啦。