Little Sheep

上星期元朗新店開張嗰日去咗幫趁，因為新店開張全線一星期裡面都食$100送$100，得到6張$50現金券，唔用好似好嘥，出開尖咁又冇咩特別嘢想食，所以唔算特別鍾意食都嚟咗呢到。

宵夜時段入嚟要$128一位，任飲仲要加$15，其實我覺得相對其他任食打邊爐唔係平，咁質數應該要好d。其實我地幾個人都唔鍾意濃味湯底，但佢嘅清湯底一樣好濃好鹹。d食物款式好似多過元朗少少，但第一round已經冇蝦，第二round想要粟米都冇，但冇又唔會有人話你聽，同人講冇嚟到佢先話冇晒。不過最大問題係d食物質素好麻麻，差過上星期元朗。d肥牛肥羊平時卷得好靚咁攞過嚟，但今日呢間係卷咗但一「pat」咁撻喺碟到，個樣好唔新鮮好似放咗好耐，我上次食食到尾淨係到嗰d出咗水就係咁樣，唔計個樣味道亦麻麻地。脆肉鯇唔得，上次元朗都覺得係脆嘅，呢間嗰d煮一下已經爛。其實食物幾本上普通，冇咩特別。

全場好似唔夠人做野，我地張檯好入，搵親waiter都舉手舉足幾分鐘先有人見到。先係搵人俾豉油，我地3個人但第一個waiter只係俾兩碟豉油，以為佢冇手攞分兩次，但最後冇再返嚟，要再搵第二個阿姐。後其搵人加水，因為唔鍾意加湯咁鹹，但叫做幾次都冇加，個鍋滾到得番好少水好鹹都未加到水，我地向同一個阿姐講第二次要加水，佢轉身走去搵水嘅時候我聽到佢同其他同事講唔見咗水壺水。埋單先慘，我地11點叫埋單，因為揸車唔想超時泊車，所以等咗5分鐘未埋到單就搵人去攞車先。我見幫我埋單嘅女經理攞住4本薄埋單，諗住其中一本係我地嘅，點知4本都唔係，唔知點解好似遲過我地埋單嘅都埋到單都未到我地，我地張檯d嘢反而已經俾人收晒。埋單唔知點解個個都攪好耐，見佢每個位起碼講3分鐘。最後見佢4本埋完掉頭走，我地已經足足等到11:20，於是自己走去收銀搵單，啱啱將單喺另一個經理嗰度，喺counter又要等碌卡，個counter好混亂，好似有waiter收咗個客現金券唔見咗，仲之d單攪到好亂。最後再攪咗起碼5分鐘先走得，好彩預早埋單同攞車。

雖然食完又送番200蚊coupon，不過我應該唔會再幫趁。