Sing Kee Seafood Restaurant

好多人同我一樣都好鍾意食海鮮，尤其去最有特色嘅地方食會有一番風味，是日又同好友一齊去咗西貢係其中一度最著名嘅食海鮮勝地開飯，目的地係西貢大街嘅勝記海鮮酒家

佢都係攞咗米芝蓮一星嘅餐廳，鋪面外嘅裝飾好有特色風情，如果晚黑嚟應該仲靚地方打卡一流望住過海，事不宜遲開始點餐嘅時候，海鮮當然唔少得啦，佢仲有其他特色菜式提供，先來有呢款小吃香煎手打墨魚餅，襯埋個酸辣汁，入口香脆內軟口感飽滿

香煎手打墨魚餅

再來就係海鮮菜式正式登場，先來係酒糟粉絲蒸鮮元貝，平時都係蒜頭蒸粉絲，今次係酒糟味道食落好開胃，元貝肉質又鮮甜多汁

酒糟粉絲蒸鮮元貝

緊隨係呢度嘅招牌菜式必食之一椒鹽鮮鮑魚，色香味俱全，肉質鮮嫩爽彈，配上椒鹽食落當然惹味

椒鹽鮮鮑魚

海鮮陸續有來，接着龍吐珠XO醬炒海斑球，賣相特別精緻睇得出廚師工架出色，厚切魚片入口啖啖肉之餘魚味濃郁

龍吐珠XO醬炒海斑球

除咗食到魚片之外，仲有佢嗰副香脆嘅魚骨連肉，同時有一鮮一炸兩種口感滋味十足

蜜糖芥末山楂骨

跟住係蜜糖芥末山楂骨，味道會有幾種層次，肉質好腍骨肉分離，唔經唔覺又食了幾款出色美食，係時候食返個泰風味肉碎炒飯，估唔到可以喺度食到泰式風味美食有驚喜

泰風味肉碎炒飯

自家製甜品

唔止海鮮出色其他都有咁高水準，最後甜品糕點係桂花糕同益力多，唔經唔覺又品嚐完一餐海鮮盛宴。